Triumph Bikes: बजाज-ट्रायम्फची कमाल, भारतात विकल्या १ लाख गाड्या; आता नवी 350cc बाईक येणार?

Triumph Bikes बजाज ऑटोसोबतच्या भागीदारीमुळे ट्रायम्फ मोटरसायकल्सने भारतात १ लाख बाईक विक्रीचा महत्त्वाचा टप्पा ओलांडला आहे. देशभरात आपलं नेटवर्क वाढवणारी आणि १८ देशांमध्ये निर्यात करणारी ट्रायम्फ, आता २०२६ पर्यंत नवीन 350cc बाईक्स लाँच करण्याच्या तयारीत आहे.

Triumph Bikes प्रीमियम मोटरसायकल ब्रँड ट्रायम्फ मोटरसायकल्सने (Triumph Motorcycles) भारतात एक मोठा टप्पा गाठला आहे. कंपनीने भारतीय रस्त्यांवर १ लाखांपेक्षा जास्त मोटरसायकल विक्रीचा आकडा पार केला आहे. बजाज ऑटो-ट्रायम्फ भागीदारीमुळे कंपनीने जवळपास अडीच वर्षांत ही कामगिरी केली आहे. या भागीदारीमुळे भारतातील प्रीमियम मोटरसायकल सेगमेंटमध्ये ट्रायम्फने आपलं स्थान झपाट्याने मजबूत केलं आहे. भारतात ट्रायम्फला रॉयल एनफिल्डचा थेट स्पर्धक मानलं जातं.

बजाज-ट्रायम्फ भागीदारी ठरली यशस्वी
ट्रायम्फच्या भारतातील यशामागे बजाज ऑटोसोबतची (Bajaj Auto) पार्टनरशिप हे मुख्य कारण आहे. ही भागीदारी २०२३ च्या दुसऱ्या तिमाहीत सुरू झाली आणि तेव्हापासून कंपनीच्या विक्रीत सातत्याने वाढ दिसून येत आहे. बजाज ऑटो भारतात ट्रायम्फ मोटरसायकलची निर्मिती आणि वितरण करते. बजाजची उत्पादन क्षमता, संशोधन आणि विकास (R&D) आणि मजबूत डीलर नेटवर्कमुळे ट्रायम्फ भारतीय बाजारपेठेत वेगाने जम बसवत आहे, असं रिपोर्ट्स सांगतात.

२०० हून अधिक शहरांमध्ये नेटवर्क
गेल्या काही वर्षांत ट्रायम्फ मोटरसायकल्सने भारतात आपलं नेटवर्क झपाट्याने वाढवलं आहे. आज कंपनीची उपस्थिती देशभरातील २०० हून अधिक शहरांमध्ये पसरली आहे. ट्रायम्फचं डीलर आणि स्टोअर नेटवर्कही वेगाने वाढलं आहे. सध्या, कंपनीची भारतात २३० हून अधिक डीलरशिप आणि आउटलेट्स आहेत. या विस्तारामुळे प्रीमियम बाईक खरेदीदारांपर्यंत ब्रँडची पोहोच लक्षणीयरीत्या वाढली आहे.

१८ देशांमध्ये निर्यात
भारतात बनवलेल्या ट्रायम्फच्या 400cc रेंजमधील मोटरसायकल फक्त देशांतर्गत बाजारपेठेपुरत्या मर्यादित नाहीत. या मोटरसायकल आंतरराष्ट्रीय बाजारपेठेतही निर्यात केल्या जात आहेत. सध्या, भारतात बनवलेल्या ट्रायम्फ मोटरसायकल जपान, ऑस्ट्रेलिया, मेक्सिको, तैवान आणि दक्षिण कोरियासह १८ देशांमध्ये निर्यात केल्या जातात. यावरून भारतात बनवलेल्या या मोटरसायकलची गुणवत्ता आणि कामगिरी जागतिक स्तरावर स्पर्धात्मक असल्याचं सिद्ध होतं.

नवीन ट्रायम्फ 350cc बाईक्स लवकरच येणार
येत्या काळात बजाज आणि ट्रायम्फ आपली मोटरसायकल लाइन-अप आणखी मजबूत करण्याच्या तयारीत आहेत. बजाज ऑटोचे एमडी आणि सीईओ राजीव बजाज यांच्या म्हणण्यानुसार, ट्रायम्फची नवीन 350cc मोटरसायकल रेंज एप्रिल २०२६ मध्ये लाँच होण्याची शक्यता आहे. ही नवीन बाईक सध्याच्या 400cc लाइन-अपसोबत किंवा त्याच्या जागी लाँच केली जाऊ शकते. सध्या या सेगमेंटमध्ये ट्रायम्फ स्पीड 400 (Triumph Speed 400) आणि ट्रायम्फ स्क्रॅम्बलर 400X (Triumph Scrambler 400X) सारख्या मॉडेल्सचा समावेश आहे. GST 2.0 च्या कर नियमावलीनुसार किंमती स्पर्धात्मक ठेवण्यासाठी नवीन 350cc बाईक्स आणल्या जात असल्याचं बोललं जात आहे.