दुसरीशी लग्न केल्याचा बदला:माजी प्रियकराच्या पत्नीला नर्सने टोचले HIV बाधित रक्त

प्रियकराने दुसऱ्या महिलेशी लग्न केल्याच्या रागातून, आंध्र प्रदेशातील कुर्नूलमध्ये एका महिलेने डॉक्टर असलेल्या त्याच्या पत्नीला एचआयव्ही बाधित रक्त टोचले. अपघात घडवून आणून हे क्रूर कृत्य करण्यात आले.

कुर्नूल: प्रियकराने दुसऱ्या महिलेशी लग्न केल्याचा बदला घेण्यासाठी, त्याच्या डॉक्टर पत्नीला एचआयव्ही बाधित रक्त टोचण्यात आले. आंध्र प्रदेशातील कुर्नूलमध्ये ही धक्कादायक घटना घडली. या प्रकरणी मुख्य आरोपी ३४ वर्षीय बी बोया वसुंधरा, तिला मदत करणारी नर्स के ज्योती आणि तिच्या दोन मुलांना पोलिसांनी अटक केली आहे. ही घटना ९ जानेवारी रोजी दुपारी २.३० वाजता घडली.

कुर्नूलमधील एका खासगी वैद्यकीय महाविद्यालयात सहाय्यक प्राध्यापक असलेली पीडित महिला, काम संपवून स्कूटरवरून घरी परतत होती. विनायक घट्टीजवळ आरोपींनी बाईकवरून येऊन जाणूनबुजून तिच्या स्कूटरला धडक दिली. खाली पडून जखमी झालेल्या डॉक्टरला मदत करण्याच्या बहाण्याने वसुंधरा आणि तिचे साथीदार जवळ आले. जखमी डॉक्टरला ऑटोरिक्षात बसवण्याचा प्रयत्न करत असताना, वसुंधराने तिच्याजवळ ठेवलेले एचआयव्ही विषाणू असलेले रक्त डॉक्टरच्या शरीरात टोचले. डॉक्टरने आरडाओरड करताच आरोपींनी घटनास्थळावरून पळ काढला.

एका खासगी रुग्णालयात नर्स म्हणून काम करणाऱ्या ज्योतीच्या मदतीने वसुंधराने एचआयव्ही बाधित रक्त मिळवले होते. सरकारी रुग्णालयात उपचार घेत असलेल्या रुग्णांकडून संशोधनाच्या नावाखाली हे एचआयव्ही रक्त गोळा करण्यात आले होते. हे रक्त फ्रीजमध्ये ठेवल्यानंतर, गुन्हा करण्यासाठी सिरिंजमध्ये भरून आणले होते.

वसुंधरा ज्या डॉक्टरवर प्रेम करत होती, त्याने दुसऱ्या महिलेशी लग्न केल्यामुळे तिच्या मनात राग होता. या जोडप्याला वेगळे करण्याच्या उद्देशाने वसुंधराने त्याच्या पत्नीला आजारी पाडण्याची योजना आखली, असे पोलिसांनी सांगितले. पीडितेच्या पतीने दिलेल्या तक्रारीच्या आधारे, भारतीय न्याय संहितेच्या विविध कलमांखाली गुन्हा दाखल करून आरोपींना अटक करण्यात आली आहे.