Car Mileage : पेट्रोलपेक्षा डिझेल कार जास्त मायलेज का देतात?, जाणून घ्या, खरं कारण

Car Mileage: कार खरेदी करणारे लोक फीचर्ससोबत मायलेजचाही विचार करतात. पण मायलेजची अपेक्षा असणारे बहुतेक जण डिझेल कारला पसंती देतात. पेट्रोलच्या तुलनेत डिझेल कार जास्त मायलेज का देतात, याचा तुम्ही कधी विचार केला आहे का?, याबाबत जाणून घेऊयात.  

मायलेज का महत्त्वाचे आहे?

नवीन कार खरेदी करताना अनेकजण सर्वात आधी मायलेजबद्दल विचारतात. रोज प्रवास करणाऱ्यांसाठी इंधनाचा खर्च मोठा भार असतो. विशेषतः डिझेल कार पेट्रोल कारपेक्षा जास्त मायलेज देते, असा समज खूप काळापासून आहे. हायवे ड्राइव्ह असो किंवा लांबचा प्रवास, डिझेल कार चांगला ॲव्हरेज देतात. यामागे काही स्पष्ट कारणे आहेत.

डिझेल इंधनात जास्त ऊर्जा असते

डिझेल कारला जास्त मायलेज मिळण्याचे मुख्य कारण म्हणजे डिझेल इंधनातील जास्त ऊर्जा. एक लिटर पेट्रोलच्या तुलनेत एक लिटर डिझेलमध्ये जास्त ऊर्जा असते. म्हणजेच, तेवढ्याच इंधनात डिझेल कार जास्त अंतर कापू शकते. त्यामुळे कमी इंधनात जास्त किलोमीटर धावते. सोप्या भाषेत सांगायचे तर, डिझेल इंधन अधिक प्रभावीपणे काम करते.

डिझेल इंजिनमध्ये उच्च कम्प्रेशन रेशो

डिझेल इंजिन पेट्रोल इंजिनच्या तुलनेत जास्त कम्प्रेशन रेशोवर काम करतात. साधारणपणे पेट्रोल इंजिन 8:1 ते 12:1 कम्प्रेशनवर चालते, तर डिझेल इंजिन 20:1 किंवा त्याहून अधिक कम्प्रेशन वापरते. या उच्च दाबामुळे इंधनाचे पूर्णपणे ज्वलन होते. परिणामी, प्रत्येक थेंबातून जास्त ऊर्जा मिळते, ज्यामुळे मायलेज वाढते.

कम्प्रेशन इग्निशन टेक्नॉलॉजी

पेट्रोल कारमध्ये इंधन पेटवण्यासाठी स्पार्क प्लगची गरज असते. पण डिझेल इंजिनमध्ये स्पार्क प्लग नसतो. येथे हवा उच्च दाबाखाली कॉम्प्रेस केली जाते. त्यामुळे तापमान प्रचंड वाढते आणि डिझेल इंधन आपोआप पेट घेते. यालाच कम्प्रेशन इग्निशन टेक्नॉलॉजी म्हणतात. या पद्धतीमुळे इंधनाचे ज्वलन नियंत्रित होते, अपव्यय कमी होतो आणि मायलेज वाढते.

लांबच्या प्रवासात डिझेल कार फायदेशीर

डिझेल इंजिन कमी RPM वर जास्त टॉर्क देतात. त्यामुळे हायवे ड्रायव्हिंगमध्ये इंजिनवर कमी ताण येतो. लांबच्या प्रवासात इंधनाचा वापर संतुलित राहतो. याच कारणामुळे डिझेल कार जास्त मायलेज देतात. तथापि, शहरात कमी अंतराच्या प्रवासासाठी पेट्रोल कार एक चांगला पर्याय आहेत.

एकंदरीत, डिझेल इंधनाची ऊर्जा, उच्च कम्प्रेशन रेशो आणि विशेष इग्निशन पद्धतीमुळे डिझेल कार पेट्रोल कारच्या तुलनेत चांगले मायलेज देतात. कार खरेदी करण्यापूर्वी, तुमच्या प्रवासाच्या गरजेनुसार इंधनाचा पर्याय निवडणे चांगले.