Home Buying Tips : वयाच्या 20-30व्या वर्षी नाही, तर 40व्या वर्षी घर का घ्यावं? अंकुर वारिकूंचा मोलाचा सल्ला

तरुण वयातच कर्ज काढून घर घेण्यापेक्षा वयाच्या ४० व्या वर्षी घर घेणं जास्त फायद्याचं ठरतं, असं प्रसिद्ध फायनान्स एक्सपर्ट अंकुर वारिकू यांनी सांगितलंय. आयुष्यात स्थिरता, आर्थिक ताकद आणि कुटुंबाच्या गरजा समजल्यानंतरच हा मोठा निर्णय घेणं कसं शहाणपणाचं आहे, हे त्यांनी समजावून सांगितलंय.

मुंबई : आपल्याकडे स्वतःचं घर असणं हे प्रत्येकाचं मोठं स्वप्न असतं. नोकरी लागली की लगेच, म्हणजे विशीत किंवा तिशीतच होम लोन काढून घर घेणं हुशारीचं मानलं जातं. पण, प्रसिद्ध उद्योजक, लेखक आणि फायनान्स एक्सपर्ट अंकुर वारिकू यांनी यावर एक वेगळाच विचार मांडलाय.

सोशल मीडियावर त्यांनी एक पोस्ट शेअर केलीय. यात त्यांनी वयाच्या ४० व्या वर्षी आपलं पहिलं घर घेतल्याचं सांगितलंय. तरुण वयात घाईघाईने घर घेण्यापेक्षा ४० व्या वर्षी घर घेणं हा कसा योग्य निर्णय आहे, याची ३ महत्त्वाची कारणं त्यांनी दिली आहेत.

१. वयाच्या ४० व्या वर्षापर्यंत कुठे राहायचं याची स्पष्टता येते

विशीत असताना आपलं आयुष्य खूप अनिश्चित असतं. नवीन नोकरीची संधी तुम्हाला मुंबईला घेऊन जाऊ शकते, प्रमोशन मिळाल्यावर कोलकाता गाठावं लागतं किंवा परदेशातही जाण्याची वेळ येऊ शकते. लग्नानंतरही नवरा-बायकोच्या करिअरनुसार शहरं बदलत राहतात.

अशा वेळी विशीत किंवा तिशीत घर घेतलं, तर भविष्याचा विचार न करता एकाच जागी अडकून पडल्यासारखं होतं. अंकुर वारिकू आणि त्यांची पत्नी रुची वारिकू यांना वयाची ४० वर्षे पूर्ण होईपर्यंत आपण दिल्लीतच स्थायिक होणार, हे पक्कं समजलं होतं. या स्पष्टतेमुळे त्यांना एक उत्तम घर निवडायला मदत झाली.

२. उत्तम आर्थिक ताकद आणि घर घेण्याची क्षमता

घर घेणं हा फक्त भावनिक निर्णय नसून, त्यामागे खूप मोठी आर्थिक जबाबदारी असते. बँकेकडून होम लोन मिळवणं आणि दर महिन्याला कोणताही ताण न घेता ईएमआय भरणं, यात खूप फरक आहे.

याशिवाय, डाऊन पेमेंट, रजिस्ट्रेशन, स्टॅम्प ड्युटी, इंटिरिअर आणि दर महिन्याचा मेंटेनन्स असा घर घेण्याचा खर्च खूप मोठा असतो. ४० व्या वर्षापर्यंत चांगली बचत आणि आर्थिक स्थिरता आल्यामुळे, कोणतीही आर्थिक ओढाताण न होता आपल्या स्वप्नातलं प्रीमियम घर घेणं शक्य झालं, असं वारिकू सांगतात.

३. कुटुंब आणि मुलांच्या गरजांची पूर्ण समज

तरुण वयात ऑफिसजवळचा एखादा छोटा फ्लॅट पुरेसा वाटू शकतो. पण, कुटुंब वाढतं आणि मुलं होतात, तेव्हा गरजा पूर्णपणे बदलतात. मुलांसाठी प्रशस्त खोल्या, खेळायला मैदान, चांगल्या शाळा आणि वैद्यकीय सुविधांची गरज भासू लागते.

वयाच्या ४० व्या वर्षापर्यंत कुटुंबाच्या खऱ्या गरजा काय आहेत, हे फक्त कागदावरच नाही तर प्रत्यक्ष अनुभवातून समजतं. त्यामुळेच, अंकुर आणि त्यांच्या पत्नीला कोणतीही तडजोड न करता आपल्या कुटुंबासाठी एकदम योग्य असं प्रीमियम घर निवडता आलं.

वयापेक्षा आर्थिक तयारी जास्त महत्त्वाची!

स्वतःचं घर असणं म्हणजे एखाद्या ठराविक वयाचा टप्पा गाठणं नाही, तर तुमच्या प्राधान्यक्रम, कुटुंबाच्या गरजा आणि तुमची आर्थिक क्षमता यांचा योग्य ताळमेळ साधणं होय.

— अंकुर वारिकू, उद्योजक आणि पर्सनल फायनान्स एक्सपर्ट.

मग प्रत्येकाने ४० व्या वर्षापर्यंत वाट पाहावी का?

अंकुर वारिकू यांचा हा अनुभव प्रत्येकासाठीच लागू पडेल असं नाही. ज्यांच्याकडे स्थिर उत्पन्न, चांगली बचत आणि रिटायरमेंट फंड आहे, त्यांनी लवकर घर घेण्याला काहीच हरकत नाही. पण, समाजाच्या दबावाखाली येऊन किंवा 'लवकर घर घेतलेलं कधीही चांगलं' या जुन्या समजुतीपोटी घाईघाईने निर्णय घेण्यापेक्षा, आयुष्यात आणि आर्थिक बाबतीत स्थिरता आल्यावरच एवढी मोठी गुंतवणूक करणं शहाणपणाचं ठरतं, हेच या उदाहरणातून दिसून येतं.