Birkin Bag : सोनं विकून खरेदी केली हँडबॅग, काय आहे या बॅगचं रहस्य? म्हणतात सोन्यापेक्षाही भारी?

दुबईतील एका महिलेने सोन्यापेक्षा चांगली गुंतवणूक म्हणून स्वतःचे दागिने विकून हर्मिस (Hermès) कंपनीची बॅग खरेदी केली आहे. हाताने बनवलेल्या या 'बर्किन' बॅग्सची उपलब्धता खूप कमी असल्यामुळे सेकंड हँड मार्केटमध्ये त्यांना प्रचंड मागणी आणि किंमत आहे. अर्थात, सामान्य माणसासाठी सोनं विकून पैसे उभे करणेच जास्त सोपे आहे.

मुंबई : आपल्याकडे अडीअडचणीला सोनं कामी येतं, म्हणून आपण थोडे-थोडे पैसे साठवून सोनं खरेदी करतो. पण, जगात असेही लोक आहेत जे लग्नातले दागिने विकून त्या पैशातून एक हँडबॅग खरेदी करतात. हे ऐकून तुम्हाला आश्चर्य वाटेल, पण हे खरं आहे. दुबईतील एका महिलेने तिचे सर्व दागिने विकून हर्मिस (Hermès) या फ्रेंच लक्झरी ब्रँडच्या बॅग्स खरेदी केल्या आहेत. पण हे फक्त फॅशनसाठी नाही, तर ही एक गुंतवणूक असल्याचं तिचं म्हणणं आहे. या बॅग्स भविष्यात सोन्यापेक्षाही जास्त परतावा देतील, असा तिचा विश्वास आहे.

आता तुम्ही म्हणाल की हर्मिस बॅगमध्ये असं काय खास आहे? बाजारातल्या सगळ्याच लक्झरी बॅग्स काही गुंतवणुकीसाठी योग्य नसतात. पण हर्मिसच्या 'बर्किन' (Birkin) आणि 'केली' (Kelly) या दोन मॉडेल्सना याबाबतीत राजाचा मान आहे. गंमत म्हणजे, तुमच्याकडे पैसे असले तरी तुम्ही दुकानात जाऊन या बॅग्स लगेच खरेदी करू शकत नाही. या ब्रँडचे जे जुने आणि विश्वासू ग्राहक आहेत, फक्त त्यांनाच या खास बॅग्स खरेदी करण्याची संधी मिळते. त्यातही कोणतं मॉडेल मिळेल हे आधीच सांगता येत नाही. याच कारणामुळे या बॅग्सची निर्मिती मर्यादित असते आणि त्या सहजासहजी उपलब्ध होत नाहीत. त्यामुळेच सेकंड हँड मार्केटमध्ये या बॅग्सना सोन्यासारखा भाव आहे. अनेकदा तर शोरूमच्या किमतीपेक्षा जास्त किमतीला या बॅग्स विकल्या जातात.

गेल्या दहा वर्षांचा विचार केला, तर बर्किन आणि केली बॅग्सच्या सेकंड हँड किमतीने सोन्यालाही मागे टाकलं आहे. ज्यांनी आपली बर्किन बॅग व्यवस्थित सांभाळून ठेवली, त्यांना विकताना दुप्पट नफा मिळाल्याची अनेक उदाहरणं आहेत. उदाहरणार्थ, 'ब्लॅक टोगो 30 बर्किन' या मॉडेलची किंमत पाच वर्षांत दुप्पट झाली. अर्थात, हा नफा बॅगचं मटेरियल, तिची कंडिशन आणि बदलत्या ट्रेंडवर अवलंबून असतो.

या बर्किन बॅगच्या जन्माची गोष्टही मोठी इंटरेस्टिंग आहे. गोष्ट आहे 1984 सालची. प्रसिद्ध गायिका आणि अभिनेत्री जेन बर्किन (Jane Birkin) पॅरिसहून लंडनला विमानातून प्रवास करत होत्या. त्यांच्या बॅगमधून सामान काढताना ते खाली सांडलं. तेव्हा त्या जवळ बसलेल्या व्यक्तीकडे तक्रार करत म्हणाल्या, "आजकाल आई झालेल्या बायकांसाठी चांगली, मोठी आणि सोयीस्कर बॅग मिळतच नाही." गंमत म्हणजे, त्यांच्या शेजारी बसलेली ती व्यक्ती हर्मिस कंपनीचे तत्कालीन सीईओ, जाँ-लुई ड्यूमा (Jean-Louis Dumas) होते. जेन यांनी विमानातल्या 'सिक बॅग'वर (आजारी वाटल्यास उलटी करण्यासाठी असलेली पिशवी) एका बॅगचं डिझाइन काढून दिलं आणि पुढे जाऊन हीच डिझाइन जगप्रसिद्ध 'बर्किन बॅग' म्हणून ओळखली जाऊ लागली.

एका सामान्य बर्किन बॅगची किंमत साधारणपणे १० लाख ते ५० लाखांपेक्षा जास्त असते. पण हिऱ्यांनी जडवलेल्या किंवा हिमालयीन मगरीच्या कातड्यापासून बनवलेल्या दुर्मिळ बॅग्सची किंमत कोटींमध्ये जाते. प्रत्येक बॅग मशीनशिवाय, पूर्णपणे हाताने शिवली जाते. एक बॅग बनवायला १८ ते ४८ तास लागतात. व्हिक्टोरिया बेकहॅम, किम कार्दाशियन आणि आपल्या नीता अंबानी यांच्यासारख्या सेलिब्रिटींकडे या बॅग्सचं मोठं कलेक्शन आहे.

मग सोनं चांगलं की बॅग?

सामान्य माणसासाठी हा प्रश्न खरंतर निरर्थक आहे. या बॅग्सची किंमत वाढू शकते, पण ती विकत घ्यायला तयार असलेला ग्राहक शोधणं तितकं सोपं नाही. शिवाय, बॅगची कंडिशन आणि ती ओरिजिनल आहे की नाही, यावर तिची किंमत ठरते. याउलट, सोन्याची बाजारपेठ खूप मोठी आहे. तुम्हाला गरज असेल तेव्हा तुम्ही सोनं कुठेही आणि कधीही विकून पैसे उभे करू शकता.