WhatsApp Feature: आता १३ वर्षांखालील मुलंही व्हॉट्सॲप वापरणार, पण कंट्रोल पालकांकडे! नवं फीचर येतंय
सार
व्हॉट्सॲपने १३ वर्षांखालील मुलांसाठी 'पेरेंट मॅनेज्ड अकाउंट्स' नावाचं एक नवीन फीचर आणलं आहे. यामुळे पालकांना मुलांच्या अकाउंटवर नियंत्रण ठेवता येणार आहे आणि ते कोणाशी बोलतात यावर लक्ष ठेवता येणार आहे. या अकाउंट्समध्ये स्टेटस, चॅनल्स सारखे फीचर्स नसतील, पण एंड-टू-एंड एन्क्रिप्शनची सुरक्षा मात्र कायम असेल.
WhatsApp Feature कॅलिफोर्निया: जगातलं सगळ्यात लोकप्रिय इन्स्टंट मेसेजिंग ॲप असलेल्या व्हॉट्सॲपने मुलांच्या सुरक्षेसाठी आणि पालकांच्या नियंत्रणासाठी एक मोठं पाऊल उचललं आहे. कंपनीने १३ वर्षांपेक्षा कमी वयाच्या मुलांसाठी 'पेरेंट मॅनेज्ड अकाउंट्स' (Parent-Managed Accounts) नावाचं एक खास फीचर जाहीर केलं आहे. येत्या काही महिन्यांत हे फीचर टप्प्याटप्प्याने युझर्सना दिलं जाईल, असं व्हॉट्सॲपने सांगितलं आहे.
काय आहे व्हॉट्सॲपचं 'पेरेंट मॅनेज्ड अकाउंट्स'?
मेटाच्या मालकीच्या व्हॉट्सॲपने एका ब्लॉग पोस्टमध्ये सांगितलं की, कुटुंब आणि सायबर सुरक्षा तज्ज्ञांच्या सल्ल्यानुसार हे नवीन फीचर तयार केलं आहे. लहान वयातच मेसेजिंग प्लॅटफॉर्म वापरायला लागणाऱ्या मुलांसाठी एक सुरक्षित आणि नियंत्रित डिजिटल वातावरण तयार करणं हा याचा मुख्य उद्देश आहे.
पेरेंट मॅनेज्ड अकाउंट्समध्ये सामान्य व्हॉट्सॲप अकाउंटपेक्षा जास्त कडक प्रायव्हसी सेटिंग्ज असतील. मुलांचं अकाउंट स्वतः पालक किंवा त्यांचे गार्डियन तयार करतील आणि तेच मॅनेज करतील. विशेष म्हणजे, मुलांचं अकाउंट पालकांच्या व्हॉट्सॲप अकाउंटशी जोडलेलं असेल. त्यामुळे मुलं कोणाशी बोलतात, काय करतात यावर पालकांना सहज लक्ष ठेवता येईल.
या अकाउंट्समध्ये फक्त प्रायव्हेट मेसेजिंग आणि व्हॉइस कॉल्सची सुविधा असेल. म्हणजेच, मुलं फक्त कुटुंबातील सदस्य आणि विश्वासू कॉन्टॅक्ट्ससोबतच संवाद साधू शकतील. मुल कोणत्या ग्रुपमध्ये सामील होईल, यावरही पालकांचं नियंत्रण असेल आणि ते निर्णय घेऊ शकतील.
या अकाउंट्समध्ये काही फीचर्स मिळणार नाहीत
या खास अकाउंट्समध्ये काही महत्त्वाचे फीचर्स मात्र नसतील. स्टेटस अपडेट, चॅनल्स आणि मेटा एआय (Meta AI) सारखे फीचर्स यातून वगळण्यात आले आहेत. इतकंच नाही, तर वन-टू-वन चॅटमध्ये 'डिसअपिअरिंग मेसेज' फीचरही काम करणार नाही. अनोळखी नंबरवरून आलेले मेसेज आपोआप 'मेसेज रिक्वेस्ट' फोल्डरमध्ये जातील. हे फोल्डर उघडण्यासाठी पालकांच्या पिनची गरज लागेल. जेव्हा मुल एखादा नवीन कॉन्टॅक्ट ॲड करेल, किंवा कोणाला ब्लॉक किंवा रिपोर्ट करेल, तेव्हा पालकांना लगेच नोटिफिकेशन मिळेल. यामुळे मुलांच्या ऑनलाइन ॲक्टिव्हिटीबद्दल त्यांना स्पष्ट कल्पना येईल.
पण, सुरक्षेच्या बाबतीत कोणतीही तडजोड केली जाणार नाही, असं व्हॉट्सॲपने स्पष्ट केलं आहे. पेरेंट मॅनेज्ड अकाउंट्सनाही व्हॉट्सॲपच्या इतर अकाउंट्सप्रमाणेच एंड-टू-एंड एन्क्रिप्शनचं (End-to-end encryption) संरक्षण मिळेल. त्यामुळे मुलांचे संवाद पूर्णपणे खासगी आणि सुरक्षित राहतील, अशी हमी कंपनीने दिली आहे.