WhatsApp Feature: स्पॅम कॉल्सपासून आता एका क्लिकवर होईल सुटका! जाणून घ्या अधिक

WhatsApp Feature: तुम्हाला अनोळखी नंबरवरून येणाऱ्या स्पॅम कॉल्समुळे तुम्ही वैतागला असाल, तर व्हॉट्सॲपच्या एका नवीन फीचरमुळे तुमची या त्रासातून सुटका होऊ शकते. यासाठी तुम्हाला फक्त तुमच्या फोनच्या सेटिंग्जमध्ये एक छोटासा बदल करायचा आहे.

व्हॉट्सॲप

आज स्मार्टफोन आणि व्हॉट्सॲप आपल्या आयुष्याचा अविभाज्य भाग बनले आहेत. पण सायबर गुन्हेगार याचाच गैरफायदा घेत आहेत. व्हॉट्सॲपचा वापर करून लोकांची बँक खाती रिकामी करण्याच्या घटना दिवसेंदिवस वाढत आहेत. अशा फसवणुकीला आळा घालण्यासाठी व्हॉट्सॲपने एक नवीन फीचर आणले आहे.

म्यूट अननोन कॉलर्स

अनोळखी नंबरवरून व्हॉट्सॲपवर येणारे कॉल्स उचलण्यास अनेकजण घाबरतात. अशा लोकांसाठी व्हॉट्सॲपने 'म्यूट अननोन कॉलर्स' (Mute Unknown Callers) नावाचे फीचर सुरू केले आहे. हे फीचर तुमच्या कॉन्टॅक्ट लिस्ट आणि कॉल लॉगच्या आधारावर काम करते. हे फीचर चालू केल्यास, तुम्हाला अनोळखी नंबरवरून कॉल्स येणार नाहीत.

हे फीचर कसे काम करते?

हे फीचर तुमच्या कॉन्टॅक्ट लिस्टमध्ये नसलेल्या आणि तुम्ही कधीही न बोललेल्या नंबरवरून येणारे व्हॉइस किंवा व्हिडिओ कॉल्स आपोआप म्यूट करते. मात्र, तुम्ही त्या नंबरवर कधी नॉर्मल कॉलवर बोलला असाल, तर हे फीचर काम करणार नाही. हे फीचर सुरू करण्यासाठी, आधी व्हॉट्सॲप उघडा. वरच्या उजव्या कोपऱ्यातील तीन डॉट्सवर क्लिक करा. त्यानंतर सेटिंग्समध्ये जाऊन प्रायव्हसी पर्याय निवडा. तिथे तुम्हाला 'म्यूट अननोन कॉलर्स' हा पर्याय दिसेल, तो चालू करा. बस, यानंतर तुम्हाला स्पॅम कॉल्स येणार नाहीत.