E20 Petrol : तुमच्या जुन्या गाडीत इथेनॉल-पेट्रोल वापरताय? मग या गोष्टी नक्की लक्षात ठेवा

देशात इथेनॉल-मिश्रित पेट्रोलचा वापर वाढल्याने जुन्या गाड्यांच्या मालकांना चिंता वाटत आहे. पण तज्ज्ञांच्या मते, योग्य काळजी घेतल्यास बहुतेक जुन्या गाड्यांमध्ये हे पेट्रोल वापरता येतं. गाडीची इंधन प्रणाली (fuel system) नियमित तपासल्यास आणि सर्व्हिसिंग वेळेवर केल्यास मोठं नुकसान टाळता येतं.

मुंबई : देशात इथेनॉल-मिश्रित पेट्रोल आता सगळीकडे मिळू लागल्याने जुन्या गाड्यांच्या मालकांमध्ये एकच चर्चा आहे. 2023 सालाच्या आधी बनवलेल्या गाड्यांमध्ये हे पेट्रोल वापरावं की नाही, हा सगळ्यांना पडलेला प्रश्न आहे. पण ऑटोमोबाईल क्षेत्रातील तज्ज्ञांच्या मते, बहुतेक जुन्या कार आणि बाईक्समध्ये हे पेट्रोल वापरता येतं. फक्त गाडीची थोडी जास्त काळजी घेतली तर घाबरण्याचं काही कारण नाही.

नवीन गाड्यांसाठी नो टेन्शन

2023 नंतर बनवलेल्या बहुतेक गाड्यांची रचना इथेनॉल-मिश्रित पेट्रोलला डोळ्यासमोर ठेवूनच केलेली आहे. त्यामुळे या गाड्यांमध्ये हे पेट्रोल वापरताना कोणतीही अडचण येत नाही. पण जुन्या गाड्यांच्या इंधन प्रणालीतील काही पार्ट्सवर या पेट्रोलचा दीर्घकाळ वापर केल्यास परिणाम होऊ शकतो, त्यामुळे थोडी अधिक काळजी घ्यावी लागते.

गाडी लगेच खराब होणार नाही, पण...

टाईम्स ऑफ इंडियाच्या रिपोर्टनुसार, तज्ज्ञांचं म्हणणं आहे की इथेनॉल-मिश्रित पेट्रोल वापरल्याने तुमची गाडी लगेचच खराब होणार नाही. तुम्ही गाडी वापरणं सुरू ठेवू शकता. पण, इथेनॉल हवेतील ओलावा शोषून घेतो, ही एक महत्त्वाची गोष्ट आहे. त्यामुळे गाडीच्या रबर सील, इंधन पाइप आणि गॅस्केटसारख्या भागांवर दीर्घकाळात परिणाम होऊ शकतो आणि ते खराब होण्याची शक्यता असते.

पेट्रोल टाकी रिकामी ठेवू नका

मेकॅनिकच्या मते, जर तुम्ही गाडी जास्त काळ वापरणार नसाल, तर पेट्रोलची टाकी शक्यतो रिकामी ठेवू नका. टाकीत जास्त पेट्रोल असेल, तर ओलसर हवेला आत जागा कमी मिळते. यामुळे टाकीत ओलावा जमा होण्याची शक्यता कमी होते.

फ्युएल फिल्टर वेळेवर बदला

इथेनॉलमध्ये जुन्या इंधन प्रणालीत साचलेली घाण विरघळवण्याची क्षमता असते. ही घाण नंतर फ्युएल फिल्टरमध्ये जमा होऊन तो ब्लॉक होऊ शकतो. त्यामुळे गाडीचा फ्युएल फिल्टर, फ्युएल पंप आणि फ्युएल इंजेक्टर नियमितपणे तपासा. गाडीची ठरलेली सर्व्हिसिंग कधीही चुकवू नका, हे खूप महत्त्वाचं आहे.

जुन्या गाडी मालकांसाठी दिलासा

आतापर्यंत या पेट्रोलमुळे फार मोठ्या समस्या समोर आलेल्या नाहीत. पण हळूहळू काही अडचणी येऊ शकतात, असं या क्षेत्रातील लोकांचं म्हणणं आहे. फिल्टर, फ्युएल पंप आणि इंजेक्टर नियमित तपासल्यास गाडीच्या परफॉर्मन्सशी संबंधित समस्या टाळता येतात, असं मेकॅनिक सांगतात.

नियमित सर्व्हिसिंग आणि इंधन प्रणालीवर लक्ष ठेवा

देशात इथेनॉल-मिश्रित पेट्रोलचा वापर वाढत असताना, गाडी मालक आपल्या गाडीसाठी हे इंधन योग्य आहे की नाही, याबद्दल अधिक माहिती घेत आहेत. तज्ज्ञांचा सल्ला स्पष्ट आहे - जुन्या गाड्या वापरणाऱ्यांनी घाबरून जाऊ नये; पण गाडीची नियमित सर्व्हिसिंग आणि इंधन प्रणालीवर लक्ष ठेवणं आता पूर्वीपेक्षा जास्त महत्त्वाचं झालं आहे.