DIY Home Decor: जुना झाडू फेकू नका! घर सजवण्यासाठी बनवा या ३ जबरदस्त वस्तू

जुन्या, खराब झालेल्या झाडूला फेकून देण्याऐवजी त्याचा वापर करून घराला एक नवीन आणि आकर्षक लुक द्या. आरसा, वॉल हँगिंग आणि फ्लॉवरपॉट सजवण्याच्या या सोप्या आयडियाज नक्की ट्राय करा, ज्यामुळे तुमच्या घराला एक 'एस्थेटिक' आणि गावाकडचा फील मिळेल.

आपल्या घरात झाडू सतत वापरून वापरून खराब होतो, त्याच्या काड्या तुटतात किंवा तो पातळ होतो. मग आपण तो टाकून देतो. पण थांबा! हाच जुना झाडू तुमच्या घराला एक 'एस्थेटिक' आणि गावाकडच्या घरासारखा लुक देऊ शकतो. चला, पाहूया या टाकाऊ झाडूपासून टिकाऊ आणि सुंदर वस्तू कशा बनवायच्या.

जुन्या झाडूने आरसा सजवा

सगळ्यात आधी जुना झाडू स्वच्छ करून घ्या आणि खालच्या बाजूने पूर्णपणे मोकळा करा. आता आपल्याला झाडूचा वरचा घट्ट भाग वापरायचा आहे. कात्रीने झाडूच्या वरच्या काड्या एका सरळ रेषेत कापून घ्या. तुमच्याकडे गोल किंवा अंडाकृती आरसा असेल, तर तो स्वच्छ करा आणि त्याच्या मागच्या बाजूला फेविकॉल लावा. आता कापलेल्या झाडूच्या काड्या आरशाभोवती गोल किंवा अंडाकृती आकारात चिकटवा. बघा, किती सुंदर डिझाइन तयार झालं! ही फ्रेम तुम्ही घरातल्या रिकाम्या भिंतीवर लावू शकता. जुन्या झाडूचा वापरही होईल आणि घरासाठी एक सुंदर वस्तूही तयार होईल.

सेमी-सर्कल वॉल डेकोर

घरातली एखादी मोठी भिंत रिकामी असेल, तर जुन्या झाडूने तिला सहज सजवता येतं. यासाठी तुम्हाला ज्यूटचं (तागाचं) पायपुसणं लागेल. हे पायपुसणं मधोमध कापून त्याचे दोन अर्धे भाग करा. आता यावर ग्लूच्या मदतीने झाडूच्या बारीक काड्या चिकटवा. दोन्ही तुकड्यांवर एकसारखं डिझाइन तयार करा. आता भिंतीवर तुमचे आवडते फोटो फ्रेम लावा आणि त्याच्या दोन्ही बाजूला हे तयार केलेले सेमी-सर्कल डेकोर लावा. हे दिसायला खूपच सुंदर दिसतं आणि घराला एक 'व्हिलेज वाइब' म्हणजे गावाकडचा फील देतं.

आणखी वाचा: शिंपल्यांनी सजवा कुंड्या: तुटक्या कुंड्यांना द्या नवा लुक, बनवा ८ डिझायनर पीस

जुन्या झाडूपासून फुलदाणीची सजावट

जुन्या झाडूचा वापर तुम्ही फ्लॉवरपॉट किंवा फुलदाणी सजवण्यासाठीही करू शकता. घरातल्या एखाद्या रिकाम्या कोपऱ्यात काचेचा किंवा बांबूचा प्लँटर ठेवा. त्यात जुन्या झाडूच्या काड्या लावा आणि सोबतच त्यावर गोंदाने कृत्रिम रंगीबेरंगी फुलं चिकटवा. आजूबाजूला छोटी लायटिंग लावली तर संध्याकाळच्या वेळी हा कोपरा आणखीनच सुंदर दिसेल.