Drone Delivery : आता ड्रोनने होणार फूड डिलिव्हरी! उबर आणि झिपलाइनची मोठी घोषणा, ५ ते १० मिनिटांत डिलिव्हरी घरात

उबर इट्सच्या ग्राहकांना आता निवडक शहरांमध्ये झिपलाइनच्या ड्रोनद्वारे काही मिनिटांत रेस्टॉरंटमधील फूड ऑर्डर आणि इतर वस्तू मिळू शकणार आहेत. यासाठी दोन्ही कंपन्यांनी पार्टनरशिप केली आहे.

वॉशिंग्टन : घरपोच अर्थात होम डिलिव्हरीद्वारे ऑनलाइन फूड मागवणं ही अत्यंत सोपी प्रक्रिया आहे. जवळपास ३० ते ४५ मिनिटांत अन्न आपल्या दारापर्यंत पोहोचतं. मात्र, आता या पद्धतीत काही असे बदल होणार आहेत, जे पाहून तुम्हालाही आश्चर्य वाटेल. कारण आता फूड डिलीव्हरी रस्त्यावरून नाही, तर आकाशातून तुमच्यापर्यंत पोहोचणार आहे.

नेमकं काय आहे?

'उबर ईट्स'ने (Uber Eats) 'झिपलाइन' (Zipline) या ड्रोन कंपनीसोबत पार्टनरशिप केली आहे. याअंतर्गत अमेरिकेतील ग्राहकांना ड्रोनद्वारे अन्नपदार्थ पोहोचवले जातील, यासाठी डिलीव्हरी करणाऱ्या लोकांची, डिलीव्हरी एजंट्सची गरज लागणार नाही. ज्या अमेरिकन शहरांमध्ये 'झिपलाइन'ची सेवा आधीच सुरू आहे, तिथे २०२६ च्या अखेरीस ड्रोनद्वारे डिलिव्हरी सुरू होऊ शकते. त्यानंतर, अमेरिकेतील इतर अनेक शहरांमध्ये ही सेवा वाढवली जाण्याची योजना आहे.

२०२९ पर्यंत दररोज १० लाख ड्रोन डिलिव्हरीचं लक्ष्य

या कंपन्यांनी दिलेल्या माहितीनुसार, उबर इट्सच्या ग्राहकांना आता निवडक शहरांमध्ये झिपलाइनच्या ड्रोनने काही मिनिटांतच ऑर्डर मिळू शकेल. या वर्षाच्या अखेरीस याची सुरुवात करण्याची योजना आहे.

२०२९ च्या अखेरपर्यंत दररोज १० लाख ड्रोन डिलिव्हरी करण्याचं या दोन्ही कंपन्यांचं लक्ष्य आहे. उबरच्या डिलिव्हरी नेटवर्कमध्ये आता माणसांसोबतच ड्रोन आणि रस्त्यावरून चालणाऱ्या रोबोट्सचाही समावेश असेल.

झिपलाइन सध्या ४ खंडांमध्ये काम करते आणि दर २० सेकंदाला एक डिलिव्हरी पूर्ण करते. कंपनी ५,००० हून अधिक हॉस्पिटल्सना सेवा देते. आतापर्यंत झिपलाइनने २७ लाख ट्रिप्समधून २ कोटींहून अधिक वस्तूंची डिलिव्हरी केली आहे. झिपलाइनचा दावा आहे की त्यांचे ड्रोन ५ ते १० मिनिटांत डिलिव्हरी करतात, ज्यामुळे ट्रॅफिक आणि कार्बन उत्सर्जन दोन्ही कमी होतं.

इन्स्टंट डिलिव्हरी मार्केट १० पटीने वाढणार - झिपलाइनचे सीईओ

झिपलाइनचे सह-संस्थापक आणि सीईओ केलर रिनाउडो क्लिफ्टन यांनी सोमवारी CNBC ला दिलेल्या मुलाखतीत सांगितलं की, इन्स्टंट डिलिव्हरी मार्केट येत्या काही वर्षांत १० पटीने वाढू शकतं.

क्लिफ्टन म्हणाले, "झिपलाइनचे अनेक ग्राहक रोज ही सेवा वापरत आहेत. याचा अर्थ, रोबोटिक्स आणि AI वापरून इन्स्टंट डिलिव्हरी मार्केट १० पटीने वाढवण्याची संधी आहे. आम्ही अशी सेवा तयार करू शकतो, जी लोकांचा वेळ आणि पैसा दोन्ही वाचवेल." त्यांनी पुढे सांगितलं की, ड्रोन डिलिव्हरी पारंपरिक वाहनांच्या तुलनेत स्वस्त तर आहेच, पण ती अधिक वेगवान, शांत आणि प्रदूषणमुक्त आहे.