TVS iQube : 'MillionR' एडिशन लाँच; किंमत किती? नवी स्कूटर घ्यायचा विचार असेल तर एकदा फिचर्स पाहाच

TVS ने आपल्या iQube स्कूटरच्या 10 लाख युनिट्सच्या विक्रीचा टप्पा ओलांडल्याबद्दल एक नवीन 'MillionR' एडिशन लॉन्च केली आहे. या स्पेशल एडिशनमध्ये काही नवीन फीचर्स जोडले आहेत आणि तिची किंमत स्टँडर्ड मॉडेलपेक्षा थोडी जास्त आहे.

मुंबई : भारतात इलेक्ट्रिक स्कूटरची बाजारपेठ वेगाने वाढत आहे आणि त्यात रोज नवनवीन मॉडेल्स दाखल होत आहेत. याच स्पर्धेत TVS ने आपल्या लोकप्रिय iQube स्कूटरचा एक नवीन अवतार सादर केला आहे. कंपनीने 'TVS iQube MillionR' नावाची एक स्पेशल एडिशन स्कूटर लॉन्च केली आहे. आकर्षक रंग, नवीन डिझाइन आणि काही अतिरिक्त फीचर्समुळे ही स्कूटर लक्ष वेधून घेत आहे.

नवीन स्कूटरची किंमत

TVS iQube MillionR एडिशनची किंमत 1.40 लाख रुपये ठेवण्यात आली आहे. ही किंमत सध्याच्या 3.5kWh बॅटरीवाल्या स्टँडर्ड मॉडेलपेक्षा फक्त 3,551 रुपयांनी जास्त आहे. या थोड्याशा अतिरिक्त रकमेत ग्राहकांना 3.5 लीटरची जास्त स्टोरेज स्पेस आणि एक USB Type-C चार्जिंग पोर्ट मिळत आहे. ज्यांना स्कूटरमध्ये जास्त सोयी आणि जागा हवी आहे, त्यांच्यासाठी हा एक चांगला पर्याय आहे.

10 लाख ग्राहकांचा मैलाचा दगड

TVS iQube स्कूटरने 10 लाख ग्राहकांचा टप्पा गाठला आहे. हा मोठा आनंद साजरा करण्यासाठी कंपनीने ही 'MillionR' एडिशन बाजारात आणली आहे. याआधी 2016 मध्ये, जेव्हा TVS Jupiter स्कूटरची विक्री 10 लाखांवर पोहोचली होती, तेव्हा कंपनीने अशाच प्रकारे 'MillionR' बॅजसह स्पेशल एडिशन लॉन्च केली होती. आता तोच सन्मान iQube ला देण्यात आला आहे.

बॅटरी, परफॉर्मन्स आणि नवीन काय?

या MillionR एडिशनमध्ये बॅटरी, मोटर आणि परफॉर्मन्समध्ये कोणताही बदल केलेला नाही. ते स्टँडर्ड मॉडेलसारखेच आहेत. यात खास 'MillionR' बॅजिंग देण्यात आली आहे. महत्त्वाचे बदल म्हणजे 3.5 लीटरची अतिरिक्त स्टोरेज स्पेस आणि USB Type-C पोर्ट. या नवीन स्कूटरसाठी बुकिंग सुरू झाले असून, ग्राहक जवळच्या अधिकृत डीलर्सकडे जाऊन ही स्कूटर खरेदी करू शकतात.