Safest Cars : पैशांपेक्षा कुटुंब महत्त्वाचं? भारतातील टॉप-10 सुरक्षित कार, खरेदी करण्याआधी रेटिंग तपासा

India's Top 10 Safest Cars : आजकाल भारतात गाडी घेताना सुरक्षेला खूप महत्त्व दिलं जातंय. भारत NCAP (BNCAP) क्रॅश टेस्टमध्ये 5-स्टार रेटिंग मिळवून भारतातील सर्वात सुरक्षित ठरलेल्या टॉप 10 गाड्यांची लिस्ट.

मुंबई : आजच्या काळात गाडी खरेदी करताना ग्राहक फक्त किंमत आणि मायलेज बघत नाहीत, तर गाडीच्या सुरक्षेलाही तितकंच महत्त्व देतात. यामुळेच आता क्रॅश टेस्ट रेटिंग खूप महत्त्वाचं ठरलं आहे. भारताची स्वतःची क्रॅश टेस्ट एजन्सी, भारत न्यू कार असेसमेंट प्रोग्राम (BNCAP), गाड्यांची सुरक्षा तपासून रेटिंग देते. नुकतंच, नवीन टाटा पंच ईव्ही फेसलिफ्टनेही 5-स्टार सेफ्टी रेटिंग मिळवून या यादीत स्थान मिळवलं आहे. या गाडीला प्रौढांच्या सुरक्षेसाठी ३२ पैकी ३१.४६ गुण आणि लहान मुलांच्या सुरक्षेसाठी ४९ पैकी ४५ गुण मिळाले आहेत. एकूण ८१ पैकी ७६.४६ रेटिंगसह ही गाडी सुरक्षित ठरली आहे. BNCAP स्कोअरनुसार भारतातील टॉप १० सुरक्षित गाड्या कोणत्या?

महिंद्रा XEV 9e (Mahindra XEV 9e)

सुरक्षेच्या बाबतीत महिंद्राची XEV 9e सध्या टॉपवर आहे. या गाडीला प्रौढांच्या सुरक्षेसाठी ३२ पैकी तब्बल ३२ गुण मिळाले आहेत. तर लहान मुलांच्या सुरक्षेसाठी ४९ पैकी ४५ गुण मिळाले आहेत. तिचा एकूण सेफ्टी स्कोअर ८१ पैकी ७७ आहे. प्रौढ आणि लहान मुलं या दोघांसाठीही 5-स्टार रेटिंग मिळवलेल्या या इलेक्ट्रिक एसयूव्हीने सेफ्टीमध्ये आपली ताकद दाखवून दिली आहे.

टाटा हॅरियर ईव्ही (Tata Harrier EV)

टाटा हॅरियर ईव्हीसुद्धा सुरक्षेच्या बाबतीत मागे नाही. या गाडीलाही प्रौढांच्या सुरक्षेसाठी ३२ पैकी ३२ पूर्ण गुण आणि लहान मुलांच्या सुरक्षेसाठी ४९ पैकी ४५ गुण मिळाले आहेत. एकूण ८१ पैकी ७७ गुणांसह, हॅरियर ईव्ही भारतातील सर्वात सुरक्षित एसयूव्हींपैकी एक आहे.

महिंद्रा BE 6 (Mahindra BE 6)

महिंद्राचं आणखी एक मॉडेल, BE 6, याला प्रौढांच्या सुरक्षेसाठी ३२ पैकी ३१.९७ गुण मिळाले आहेत. लहान मुलांच्या सुरक्षेसाठी या गाडीला ४९ पैकी ४५ गुण मिळाले आहेत. तिचा एकूण सेफ्टी स्कोअर ८१ पैकी ७६.९७ आहे. या गाडीची मजबूत बॉडी आणि सेफ्टी फीचर्स यासाठी महत्त्वाचे ठरले आहेत.

किया सेल्टॉस (Kia Seltos)

किया सेल्टॉसनेही 5-स्टार सेफ्टी रेटिंग मिळवलं आहे. या गाडीला प्रौढांच्या सुरक्षेसाठी ३२ पैकी ३१.७ गुण आणि लहान मुलांच्या सुरक्षेसाठी ४९ पैकी ४५ गुण मिळाले आहेत. तिचा एकूण सेफ्टी स्कोअर ८१ पैकी ७६.७ आहे.

मारुती व्हिक्टोरिस (Maruti Victoris)

मारुती सुझुकीच्या नवीन मॉडेल व्हिक्टोरिसनेही सेफ्टी टेस्टमध्ये चांगली कामगिरी केली आहे. या गाडीला प्रौढांच्या सुरक्षेसाठी ३२ पैकी ३१.६६ गुण आणि लहान मुलांच्या सुरक्षेसाठी ४९ पैकी ४३ गुण मिळाले आहेत. तिचा एकूण सेफ्टी स्कोअर ८१ पैकी ७४.६६ आहे.

मारुती ई-व्हिटारा (Maruti e-Vitara)

मारुती ई-व्हिटारा हे देखील 5-स्टार सेफ्टी रेटिंग मिळवलेलं मॉडेल आहे. या गाडीला प्रौढांच्या सुरक्षेसाठी ३२ पैकी ३१.४९ गुण आणि लहान मुलांच्या सुरक्षेसाठी ४९ पैकी ४३ गुण मिळाले आहेत. तिचा एकूण सेफ्टी स्कोअर ८१ पैकी ७४.४९ आहे.

टाटा पंच ईव्ही फेसलिफ्ट (Tata Punch EV Facelift)

नवीन टाटा पंच ईव्ही फेसलिफ्टने सेफ्टीच्या यादीत महत्त्वाचं स्थान मिळवलं आहे. या गाडीला प्रौढांच्या सुरक्षेसाठी ३२ पैकी ३१.४६ गुण आणि लहान मुलांच्या सुरक्षेसाठी ४९ पैकी ४५ गुण मिळाले आहेत. या गाडीचा एकूण सेफ्टी स्कोअर ८१ पैकी ७६.४६ आहे.

ह्युंदाई व्हेन्यू (Hyundai Venue)

ह्युंदाई व्हेन्यूसुद्धा 5-स्टार सेफ्टी रेटिंग मिळालेल्या गाड्यांच्या लिस्टमध्ये आहे. या गाडीला प्रौढांच्या सुरक्षेसाठी ३२ पैकी ३१.१५ गुण आणि लहान मुलांच्या सुरक्षेसाठी ४९ पैकी ४४.४६ गुण मिळाले आहेत. तिचा एकूण सेफ्टी स्कोअर ८१ पैकी ७५.६१ आहे.

टाटा सिएरा (Tata Sierra)

टाटा सिएराला प्रौढांच्या सुरक्षेसाठी ३२ पैकी ३१.१४ गुण आणि लहान मुलांच्या सुरक्षेसाठी ४९ पैकी ४४.७३ गुण मिळाले आहेत. तिचा एकूण सेफ्टी स्कोअर ८१ पैकी ७५.८७ आहे. सिएराची मजबूत बिल्ड क्वालिटी ही तिची मुख्य ताकद आहे.

महिंद्रा थार रॉक्स (Mahindra Thar Roxx)

ऑफ-रोड एसयूव्ही महिंद्रा थार रॉक्सनेही सेफ्टी टेस्टमध्ये चांगली कामगिरी केली आहे. या गाडीला प्रौढांच्या सुरक्षेसाठी ३२ पैकी ३१.०९ गुण आणि लहान मुलांच्या सुरक्षेसाठी ४९ पैकी ४५ गुण मिळाले आहेत. तिचा एकूण सेफ्टी स्कोअर ८१ पैकी ७६.०९ आहे.

सुरक्षेला अधिक महत्त्व देणारी भारतीय बाजारपेठ

भारतात 5-स्टार रेटिंग मिळवणाऱ्या गाड्यांची संख्या दिवसेंदिवस वाढत आहे. मजबूत बॉडी, एअरबॅग्ज, इलेक्ट्रॉनिक सेफ्टी फीचर्स आणि लहान मुलांसाठीच्या सेफ्टी सिस्टीम या नव्या पिढीच्या गाड्यांची प्रमुख वैशिष्ट्ये बनली आहेत. आता ग्राहक गाडी निवडताना मायलेज, किंमत आणि फीचर्ससोबतच सेफ्टी रेटिंगलाही जास्त प्राधान्य देत आहेत.