Eye Health: तुम्ही पण सारखे डोळे चोळता का? मग हे धोके नक्की वाचा!

Eye Health डोळ्यांना खाज किंवा काहीतरी टोचल्यासारखं वाटलं की आपण लगेच डोळे चोळतो. पण ही सवय वाटते तितकी साधी नाही आणि यामुळे डोळ्यांचं मोठं नुकसान होऊ शकतं. यामागे ॲलर्जीपासून ते ड्राय आय सिंड्रोमपर्यंत अनेक कारणं असू शकतात.

सारखं सारखं डोळे चोळण्याची सवय बऱ्याच जणांना असते. डोळे कोरडे पडल्यावर किंवा खाज आल्यावर आपण नकळतपणे डोळे चोळतो. पण तुम्हाला माहित आहे का, आपल्या हातांवर अनेक प्रकारचे जंतू असतात. जेव्हा आपण त्याच हातांनी डोळे चोळतो, तेव्हा डोळ्यांना इन्फेक्शन होण्याचा धोका वाढतो. इतकंच नाही, तर जास्त डोळे चोळल्यामुळे डोळ्यांच्या आजूबाजूच्या बारीक रक्तवाहिन्या तुटतात आणि डोळ्यांखाली काळी वर्तुळं (dark circles) येतात. जे लोक सतत डोळे चोळतात, त्यांना इन्फेक्शन किंवा डोळ्याच्या कॉर्नियाला इजा होण्याचा धोका जास्त असतो.

डोळ्यांना खाज येणं किंवा अस्वस्थ वाटणं, ही काही सामान्य कारणं आहेत ज्यामुळे लोक डोळ्यांच्या डॉक्टरकडे जातात. डोळ्यांना खाज सुटली की आपण लगेच ते चोळतो. यामागे 'ॲलर्जिक कंजंक्टिवायटिस' (Allergic Conjunctivitis) हे सर्वात मोठं कारण असू शकतं. जवळपास ५० टक्के प्रकरणांमध्ये हेच आढळून येतं.

ॲलर्जिक कंजंक्टिवायटिस म्हणजे डोळ्याच्या पृष्ठभागावर असलेल्या पारदर्शक त्वचेला (कंजंक्टायवा) ॲलर्जीमुळे येणारी सूज. जेव्हा ॲलर्जीचे कण डोळ्यांच्या पेशींना चिकटतात, तेव्हा काही केमिकल्स बाहेर पडतात आणि त्यामुळे डोळ्यांना खाज सुटते. यासोबतच डोळे लाल होणं, सूज येणं किंवा पापण्यांच्या आतल्या बाजूला छोटे फोड येणं अशी लक्षणंही दिसतात. कधीकधी डोळ्यात धूळ गेल्यासारखं वाटतं किंवा डोळे कोरडे पडतात, तेव्हाही डोळे चोळण्याची इच्छा होते. हे अनेकदा 'ड्राय आय सिंड्रोम' (Dry Eye Syndrome) किंवा 'ब्लेफेरायटिस' (Blepharitis) चं लक्षण असू शकतं.

डोळे चोळल्यामुळे 'सबकंजंक्टायव्हल हॅमरेज' (subconjunctival hemorrhage) सुद्धा होऊ शकतं. यात डोळ्यातील एखादी छोटी रक्तवाहिनी फुटते आणि डोळा एकदम लाल दिसू लागतो. जर डोळे चोळल्यानंतरही तुम्हाला सतत त्रास होत असेल, डोळे लाल राहत असतील किंवा डोळे बंद करताना वेदना होत असतील, तर याकडे दुर्लक्ष न करता लगेच डॉक्टरचा सल्ला घ्या.