Roti Tips: चपाती गोल नाही, नकाशा होतो ? पोळ्या होतील गरगरीत आणि मऊ!

तुमच्या चपात्या गोल होण्याऐवजी वेगवेगळ्या देशांच्या नकाशांसारख्या दिसतात का? टम्म फुगलेली, मऊ आणि गोल चपाती बनवणं ही एक कला आहे. पण काही सोप्या टिप्स वापरल्या, तर तुम्हीही अगदी सहज गोल चपात्या बनवू शकता.

गोल आणि मऊ चपाती बनवणं दिसायला सोपं वाटत असलं, तरी त्यासाठी थोडी प्रॅक्टिस आणि योग्य पद्धत माहिती असणं गरजेचं आहे. योग्य पद्धत माहित नसेल, तर चपाती गोल होण्याऐवजी वाकडीतिकडी किंवा एखाद्या देशाच्या नकाशासारखी दिसू लागते. विशेषतः सुरुवातीच्या काळात असं होणं खूप सामान्य आहे आणि त्यामुळे अनेकांना लाजिरवाणं वाटू शकतं. पण काळजी करू नका. कणिक योग्यप्रकारे मळण्यापासून ते हलक्या हाताने लाटण्यापर्यंतच्या काही गोष्टी शिकलात, की चपाती किंवा पोळी आपोआप गोल आणि मऊ होते. सरावाने ही कला सहज जमते.

परफेक्ट गोल चपाती बनवा

खाताना चपातीच्या आकाराने तसा फरक पडत नाही, पण ताटात सुंदर गोल चपाती बघायला सगळ्यांनाच आवडते. आपल्या समाजात गोल चपातीबद्दल एक वेगळंच कौतुक आणि अपेक्षा असते. याच कारणामुळे अनेकांना ती बनवता आली नाही की कमीपणा वाटतो. तुम्हीसुद्धा गोल चपाती बनवण्यासाठी धडपडत असाल, तर चिंता सोडा. कणिक नीट मळणे, समान आकाराचे गोळे बनवणे आणि हलक्या हाताने पोळी फिरवत लाटणे, या तंत्राचा वापर केल्यास तुम्ही सहज परफेक्ट गोल चपाती बनवू शकता.

कणिक योग्यप्रकारे मळली तरच हे शक्य

कणिक मळताना सर्वात महत्त्वाची गोष्ट म्हणजे तिचा पोत (texture). जोपर्यंत तुम्ही चपाती बनवण्यात एक्सपर्ट होत नाही, तोपर्यंत कणिक खूप काळजीपूर्वक मळा. लक्षात ठेवा की कणिक जास्त पातळ किंवा जास्त घट्ट होता कामा नये. कणिक खूप मऊ झाली, तर लाटताना ती पोळपाटाला चिकटते आणि आकार बिघडतो. त्याचप्रमाणे, ती खूप घट्ट झाली, तर चपातीसुद्धा कडक होते. मळलेली कणिक किमान १५-२० मिनिटे झाकून ठेवल्यास ती छान मुरते आणि लवचिक होते, ज्यामुळे चपाती लाटायला आणि बनवायला दोन्ही सोपं जातं.

थोडा वेळ मुरण्यासाठी ठेवा

कणिक भिजवण्यासाठी साध्या पाण्याऐवजी कोमट पाणी, दूध किंवा थोडं तूप वापरल्यास जास्त फायदा होतो. यामुळे कणिक मऊ होण्यास आणि चपाती जास्त काळ मऊ राहण्यास मदत होते. विशेषतः दूध किंवा तूप वापरल्याने चपातीची चवही वाढते. कणिक मळल्यानंतर लगेच चपात्या करू नका, त्याऐवजी ओल्या सुती कापडाने झाकून ठेवा किंवा त्यावर थोडे पाणी शिंपडून काही वेळ बाजूला ठेवा. सुमारे १५-२० मिनिटे कणकेला अशी विश्रांती दिल्यास ती चांगली सेट होते, ज्यामुळे चपाती लाटणे सोपे होते.

अशाप्रकारे लाटा

गोल चपाती बनवण्यासाठी, आधी कणकेचा गोळा व्यवस्थित गोल करून घ्या. नंतर त्यावर थोडे कोरडे पीठ लावून त्याला चपटे करा, जेणेकरून लाटताना ती चिकटणार नाही. आता लाटण्याने हलक्या हाताने चपातीच्या कडेने फिरवत तिला घड्याळाच्या उलट्या दिशेने (anti-clockwise) हळूवारपणे फिरवत राहा. यामुळे चपाती पोळपाटावर समान पसरेल आणि गोल आकार घेईल. काही वेळा लाटल्यानंतर चपाती उलटून दुसऱ्या बाजूनेही समान लाटा. योग्य तंत्र आणि हलक्या हातांचा वापर केल्यास तुमची चपाती केवळ गोलच नाही, तर पातळ आणि मऊसुद्धा होईल.

खूप पातळ करू नका, फुगणार नाही

टम्म फुगलेली आणि मऊ चपाती बनवण्यासाठी काही खास गोष्टींकडे लक्ष देणे आवश्यक आहे. चपाती लाटताना ती खूप जास्त पातळ करू नका, कारण त्यामुळे ती फुगत नाही. तसेच, गरजेपेक्षा जास्त कोरडे पीठ वापरल्याने चपाती कडक होऊ शकते. चपाती तव्यावर टाकल्यावर मध्यम आचेवर भाजा. एक बाजू थोडी भाजली की, दुसरी बाजू चांगली भाजा. यानंतर, गॅसची आच वाढवा आणि कापडाच्या मदतीने कडा हलक्या हाताने दाबा. यामुळे चपातीत वाफ तयार होऊन ती छान फुगते.