Second Hand Car : इंजिनपासून टायरपर्यंत... जुनी कार घेण्यापूर्वी या 7 गोष्टी नक्की तपासा

तुम्ही सेकंड हँड कार घेण्याचा विचार करताय का? फसवणूक टाळण्यासाठी इंजिन, टायर आणि कागदपत्रांची तपासणी कशी करावी?

सेकंड हँड कार घेताना लक्षात ठेवण्याच्या गोष्टी

भारतात हल्ली सेकंड हँड गाड्या घेणाऱ्यांची संख्या खूप वाढली आहे. नवीन गाड्यांच्या किमती वाढल्यामुळे अनेक मध्यमवर्गीय कुटुंबे नवीन कार घेण्याऐवजी जुनी कार कमी किमतीत घेणे पसंत करतात. कमी किंमत आणि कार लवकर सेट होते, यामुळे या ट्रेंडला चांगलीच पसंती मिळतेय. तुम्हीही जुनी कार घेण्याचा विचार करत असाल, तर खरेदी करण्यापूर्वी काही महत्त्वाच्या गोष्टी नक्की तपासा.

तुमच्या गरजांची यादी

कार घेण्यापूर्वी तुमची नेमकी गरज काय आहे, हे आधी ठरवा. कुटुंबातील सदस्यांची संख्या, कार घेण्याचे कारण, गाडी कुठे जास्त चालणार आणि तुमचे बजेट निश्चित करा. तुम्ही कारवर किती खर्च करू शकता आणि तुम्हाला कोणते फीचर्स हवे आहेत, याचा विचार करा. यावरून तुम्हाला LUV, MUV, SUV किंवा कॉम्पॅक्ट SUV पैकी कोणती कार हवी आहे, हे ठरवणे सोपे जाईल.

कारची तपासणी

सेकंड हँड कार नेहमीच नवीन कारसारखी नसते. मालकाने ती व्यवस्थित मेंटेन केली असेलच असे नाही. त्यामुळे शक्यतो चांगली मेंटेन केलेली कारच निवडा. गरज वाटल्यास कारची चांगली माहिती असलेल्या मित्राला सोबत घेऊन जा. १० वर्षांपेक्षा जुन्या गाड्या घेणे टाळा, कारण त्यांचा मेंटेनन्स खर्च जास्त असतो. शक्यतो सिंगल ओनर (Single Owner) असलेली कार घेण्याला प्राधान्य द्या.

इंजिनची तपासणी

सेकंड हँड कार घेताना तिचे इंजिन तपासणे सर्वात महत्त्वाचे असते. कार किती चालली आहे, हे कंपनीच्या सर्व्हिस सेंटरमध्ये जाऊन तपासा. खरेदीच्या तारखेपर्यंतचे सर्व्हिस रेकॉर्ड मागा आणि इंजिनचे काही काम झाले आहे का, याची माहिती घ्या. इंजिन चांगले असेल तरच तुमची गुंतवणूक योग्य ठरेल आणि तुम्ही ती कार जास्त काळ वापरू शकाल.

स्पीडोमीटर तपासणी (Odometer Check)

या तपासणीतून कार किती किलोमीटर चालली आहे, हे समजते. खरंतर कारची किंमत याच गोष्टीवर अवलंबून असते. कार १ लाख किलोमीटरपेक्षा जास्त चालली असेल, तर किंमत कमी करून मागा. अनेक जण स्पीडोमीटर रिसेट करून खरा ओडोमीटर आकडा लपवतात. त्यामुळे कार कंपनीच्या अधिकृत सर्व्हिस सेंटरमध्ये नेऊन याची खात्री नक्की करा.

इंटिरियर आणि एक्सटिरियर (Interior & Exterior)

कारची आतून आणि बाहेरून संपूर्ण तपासणी करा. तुम्ही घेत असलेली कार अपघातात सापडली असू शकते आणि तिचे काही भाग बदललेले असू शकतात. कारची बॉडी, डॅशबोर्ड, सीट, एसी, दरवाजे, बंपर, हेडलॅम्प आणि पेंट तपासा. कारला नवीन पेंट मारला असेल, पेंट जास्त खराब झाला असेल किंवा महत्त्वाचे भाग तुटलेले असतील, तर किंमत कमी करून मागा.

कार घेताना अनेक जण टायरची स्थिती तपासणे विसरतात. कार चांगली चालायची असेल तर तिचे टायर चांगल्या स्थितीत असणे गरजेचे आहे. एका टायरची किंमत ३,००० ते १०,००० रुपयांपर्यंत असते. टायर जास्त झिजलेले असतील तर ते लवकर बदलावे लागतील, ज्यामुळे तुमचे बजेट वाढेल.

काही गाड्यांमध्ये जुन्या टायरवर बनावट ग्रिप लावून ते नवीन असल्यासारखे दाखवले जाते. त्यामुळे ग्रिप बदलली आहे का, हे बारकाईने तपासा.

रेकॉर्ड आणि इन्शुरन्स (Records & Insurance)

कार घेण्यापूर्वी तिची कागदपत्रे आणि इन्शुरन्स योग्य आहे का, हे तपासा. तुम्ही घेत असलेल्या कारवर कर्ज (Loan) आहे का, मालकाची माहिती बरोबर आहे का, कंपनीत सर्व्हिसिंग झाली आहे का, इन्शुरन्स चालू आहे का आणि गाडीवर काही अपघात किंवा गुन्हेगारी केसेस आहेत का, याची संपूर्ण चौकशी करा. या सर्व गोष्टी योग्य असतील तरच ती कार घेण्याचा अंतिम निर्णय घ्या.