Rohtang Pass Maggi : रोहतांग पासवर मॅगी विकून दिवसाला 15 हजार कमाई; ऑफ-सीझनमध्येही बक्कळ पैसा, व्हिडिओ व्हायरल

रोहतांग पासवर मॅगी विकणाऱ्या एका व्यक्तीचा व्हिडिओ सध्या सोशल मीडियावर तुफान व्हायरल होतोय. ऑफ-सीझनमध्येही हा विक्रेता दिवसाला १४ ते १५ हजार रुपये कमवत असल्याचा दावा एका कंटेंट क्रिएटरने केलाय.

हिमाचल प्रदेश : हिमाचल प्रदेशमधल्या रोहतांग पासजवळ असलेल्या एका मॅगीच्या टपरीची सध्या सोशल मीडियावर जोरदार चर्चा सुरू आहे. सध्या तिथे ऑफ-सीझन सुरू आहे, त्यामुळे पर्यटकांची गर्दी तशी कमीच आहे. पण तरीही हा विक्रेता रोज ६० ते ७० प्लेट मॅगी आणि जवळपास २०० कप चहा विकतो. यातून त्याची दिवसाची कमाई तब्बल १४ ते १५ हजार रुपये होते.

रस्त्याकडेला असणारे छोटे व्यवसाय किती कमाई करू शकतात, यावर आता सोशल मीडियावर चांगलीच चर्चा रंगली आहे. या मॅगी विक्रेत्याची कमाई ऐकून अनेकांना धक्का बसलाय. पण, काही युजर्सने एक महत्त्वाची बाजू मांडली आहे. एवढ्या उंचावर सामान नेण्याचा खर्च, तिथलं कडाक्याचं ऊन-वारा-पाऊस आणि त्यासाठी लागणारी प्रचंड मेहनत पाहता, ही सगळी रक्कम म्हणजे निव्वळ नफा नसतो, असं त्यांनी निदर्शनास आणून दिलंय.

हर्ष चौहान या कंटेंट क्रिएटरने त्याच्या रोहतांग पासच्या ट्रिपमधला एक व्हिडिओ शेअर केलाय, ज्यातून ही सगळी माहिती समोर आली. पर्यटकांची गर्दी नसताना इथले व्यावसायिक नक्की किती कमाई करतात, याची हर्षला उत्सुकता होती. म्हणूनच त्याने थेट या मॅगी विक्रेत्यालाच त्याच्या रोजच्या कमाईबद्दल विचारलं.

या व्हिडिओमध्ये हर्ष सांगतो, "मी त्याला विचारलं की तुमची कमाई किती होते? त्यावर तो मॅगी विक्रेता म्हणाला की, सध्या ऑफ-सीझन आहे, त्यामुळे फारशी कमाई होत नाही. मग मी त्याला पुन्हा विचारलं की, तरीही ऑफ-सीझनमध्ये साधारण किती रुपये मिळतात?"

यावर त्या विक्रेत्याने दिलेली आकडेवारी खरंच थक्क करणारी होती. तो म्हणाला की, तो रोज साधारण ६०-७० प्लेट मॅगी आणि २०० कप चहा विकतो. याशिवाय अंड्यांच्या काही ऑर्डर्सही असतात, पण मॅगी आणि चहाच्या तुलनेत त्याची मागणी खूपच कमी असते.

हर्षने त्याच्या इन्स्टाग्राम व्हिडिओच्या कॅप्शनमध्ये या विक्रेत्याच्या रोजच्या कमाईचं गणितच मांडलं आहे. तिथे एका प्लेट मॅगीची किंमत १०० रुपये आणि एका कप चहाची किंमत ४० रुपये आहे.

हे गणित समजावून सांगताना त्याने लिहिलंय, "आम्ही रोहतांग पासला गेलो होतो आणि तिथे एका मॅगी विक्रेत्याला त्याच्या ऑफ-सीझनमधील कमाईबद्दल विचारलं! त्याने सांगितलं की तो रोज साधारण ६०-७० प्लेट मॅगी (१०० रुपये प्रति प्लेट) आणि २०० कप चहा (४० रुपये प्रति कप) विकतो. याचाच अर्थ, ऑफ-सीझनमध्येही त्याची रोजची कमाई १४,००० ते १५,००० रुपयांच्या घरात जाते!"

या आकडेवारीनुसार, अंड्यांच्या ऑर्डर्सचे पैसे बाजूला ठेवले तरी, या विक्रेत्याची रोजची उलाढाल १४ ते १५ हजार रुपये आहे. पण लक्षात घेण्यासारखी गोष्ट म्हणजे, ही त्याची एकूण कमाई आहे, निव्वळ नफा नाही. त्याचा खरा नफा काढायचा असेल, तर यातून कच्च्या मालाचा खर्च, सामान वरपर्यंत आणण्याचा वाहतूक खर्च आणि टपरीचा मेंटेनन्स वजा करावा लागेल.

पाहा व्हायरल व्हिडिओ

विशेष म्हणजे, ही सगळी आकडेवारी ऑफ-सीझनमधील आहे, जेव्हा पर्यटकांची संख्या खूप कमी असते. "हा तर फक्त ऑफ-सीझन आहे... विचार करा, जेव्हा पर्यटकांचा सीझन असेल तेव्हा यांची कमाई किती असेल!" असं हर्षने म्हटलंय.

छोट्या स्तरावर चालणाऱ्या व्यवसायांना कधीही कमी लेखू नये, यावर भर देत तो पुढे म्हणाला, "म्हणूनच म्हणतात, कोणताही व्यवसाय छोटा नसतो."

सोशल मीडियावरील प्रतिक्रिया काय?

या पोस्टवर कमेंट करताना एका युजरने लिहिलंय, "ते खूप मेहनत करतात. जर तुम्ही इतर खर्च वजा करून त्यांच्या कमाईचा हिशोब केला, तर ही कमाई काहीच नाही. पण त्यांची मॅगी खूप टेस्टी असते."

दुसऱ्या एका युजरने एवढ्या दुर्गम भागात सामान नेण्याच्या खर्चाकडे लक्ष वेधत लिहिलंय, "ट्रान्सपोर्ट चार्जेसही जास्त लागतात."

तिसऱ्या एका व्यक्तीने हा व्यवसाय चालवताना येणाऱ्या अडचणी समजून घेण्याचं आवाहन केलंय. त्याने लिहिलंय, "त्यांना किती अडचणींचा सामना करावा लागतो, हेही पाहायला हवं. त्यांनी खूप त्याग केलेला असतो."

असाच मुद्दा मांडताना आणखी एका युजरने टपरीपर्यंत सामान आणण्याच्या वाढीव खर्चाबद्दल सांगितलंय, "इथे सामान आणण्याचा खर्चही जास्त असतो."