Reusing Cooking Oil: तेल असं दिसलं की समजा खराब झालंय! पण ते फेकू नका, तर असं वापरा

Reusing Cooking Oil: पुरी, पकोडे किंवा भजी तळल्यानंतर उरलेल्या तेलाचं काय करायचं, हा प्रश्न सगळ्यांनाच पडतो. पैसे वाचवण्यासाठी अनेक जण ते तेल पुन्हा वापरतात. पण वापरलेलं तेल कधी विषारी बनतं आणि ते कधी फेकून द्यावं, याची माहिती इथे दिली आहे.

कॅन्सरसारख्या आजारांनाही कारण

आपल्यापैकी अनेक घरांमध्ये एकदा वापरलेलं तेल फेकून द्यायला जीवावर येतं. पुढच्या वेळी स्वयंपाकासाठी ते बाजूला ठेवलं जातं. वरवर पाहता हा पैसे वाचवण्याचा मार्ग वाटत असला तरी, प्रत्यक्षात ते आरोग्यासाठी खूप घातक आहे. तज्ज्ञांच्या मते, तेल वारंवार उच्च तापमानात गरम केल्यावर त्यात रासायनिक बदल होतात. ऑक्सिडेशनमुळे त्यात हानिकारक घटक तयार होतात, जे कॅन्सरसारख्या आजारांनाही कारण ठरू शकतात.

उरलेलं तेल किती दिवस सुरक्षित?

जर तुम्हाला उरलेलं तेल वापरायचंच असेल, तर ते फक्त 1 ते 2 दिवसांच्या आत वापरून संपवा. त्यापेक्षा जास्त दिवस ठेवणं धोकादायक आहे. तज्ज्ञ सांगतात की, एकच तेल फक्त एकदाच पुन्हा वापरावं. प्रत्येक वेळी तेल गरम केल्यावर त्याचा दर्जा खालावत जातो.

साठवण्याची योग्य पद्धत

तेल उरल्यास, सर्वात आधी ते चांगलं गाळून घ्या. तेलात उरलेले अन्नाचे कण ते लवकर खराब करतात. त्यानंतर ते हवाबंद (Airtight) आणि कोरड्या डब्यात भरून ठेवा. डबा उन्हापासून आणि ओलसर जागेपासून दूर ठेवा. कढईतच तेल ठेवणं चुकीचं आहे, कारण धूळ आणि हवेच्या संपर्कात आल्याने ते लवकर खराब होतं.

तेल खराब झालंय हे कसं ओळखायचं?

काही लक्षणांवरून तेल आता वापरासाठी योग्य नाही हे समजू शकतं. जसं की, तेलातून खराब किंवा उग्र वास येत असेल. तेलाचा रंग नेहमीपेक्षा जास्त गडद झाला असेल. तेल गरम करताना खूप जास्त फेस येत असेल. तेल खूप घट्ट झालं असेल. अशी लक्षणं दिसल्यास ते तेल पुन्हा न वापरता लगेच फेकून देणं तुमच्या आणि तुमच्या कुटुंबाच्या आरोग्यासाठी चांगलं आहे. स्वयंपाकासाठी गरजेपुरतंच तेल वापरणं हा यावरचा सर्वोत्तम उपाय आहे.