Relationship: ऑफिसमध्येच फुलतंय प्रेम; सर्वेक्षणातून समोर आली धक्कादायक आकडेवारी

Relationship: आजकाल एक नवीनच ट्रेंड आलाय. ऑफिस म्हणजे फक्त कामाची जागा नाही, तर लव्हबर्ड्सचा अड्डा बनू लागलंय. एका सर्वेमधून ऑफिस रोमान्सबद्दल काही खळबळजनक गोष्टी समोर आल्या आहेत.

काय आहे ऑफिस रोमान्स?

एका सर्वेक्षणानुसार ऑफिस रोमान्स आता खूप सामान्य गोष्ट झाली आहे. फोर्ब्सच्या रिपोर्टनुसार, 60% पेक्षा जास्त कर्मचारी आपल्याच ऑफिसमध्ये प्रेमात पडले आहेत. यामागे आधुनिक वर्क कल्चर हे मुख्य कारण आहे, ज्यामुळे व्यावसायिक आणि वैयक्तिक आयुष्यामधली सीमारेषा पुसट झाली आहे. जास्त वेळ ऑफिसमध्ये घालवणे, बाहेरच्या सोशल लाईफसाठी वेळ नसणे आणि रोज भेटणाऱ्या सहकाऱ्यांसोबत जवळीक वाढणे, या गोष्टींमुळे ऑफिस रोमान्स वाढत आहेत. सर्वेक्षणात 65% लोकांनी सांगितले की, रोजच्या ओळखीच्या चेहऱ्यांशी बोलणं सोपं वाटतं. तर 61% लोकांनी ऑफिसबाहेर नवीन लोकांना भेटायला वेळच मिळत नसल्याचं मत मांडलं. ऑफिसमधील ताणतणाव समजून घेणारा जोडीदार अनेकजण शोधत आहेत.

कामावर परिणाम होतो का?

ऑफिसमधील प्रेम प्रकरणामुळे आपल्या कामावर आणि निर्णयांवर परिणाम होऊ शकतो. सहकाऱ्यासोबत प्रेमात असताना ब्रेकअप झाल्यास काय होईल, ही भीती ऑफिसमधील कपल्सना सर्वाधिक सतावते, असं एका स्टडीमध्ये म्हटलं आहे. नातं तुटल्यानंतर ऑफिसमध्ये होणारी अडचण या चिंतेचं मुख्य कारण आहे. मात्र, 54% लोकांना वाटतं की त्यांच्या प्रेम प्रकरणामुळे वर्क-लाईफ बॅलन्सवर कोणताही परिणाम होत नाही.

ऑफिस लव्हवर सहकाऱ्यांची प्रतिक्रिया

ऑफिसमधील प्रेम प्रकरणं जास्त काळ लपून राहत नाहीत. आपलं नातं सर्वांना कळल्यावर सहकारी विचित्र वागतात, हे निम्म्याहून अधिक कपल्सनी मान्य केलं आहे. 60% लोकांनी आपल्या सहकाऱ्यांच्या अफेअरबद्दल गॉसिप ऐकल्याचं सांगितलं. तर तीनपैकी एका कर्मचाऱ्यामध्ये यामुळे मत्सराची भावना निर्माण होते. ऑफिसमध्ये या कपल्सचं जाहीर प्रेमप्रदर्शन (Public Romance) 41% लोकांना खटकतं, असंही सर्वेक्षणात समोर आलं आहे.

जुन्या नात्याला गुडबाय करून ऑफिस रोमान्स..

सहकाऱ्याच्या प्रेमात पडलेल्यांपैकी 40% लोकांनी आपल्या आधीच्या पार्टनरची फसवणूक करून हे नातं सुरू केलं. त्याच वेळी, 43% लोकांनी ऑफिसमध्ये भेटलेल्या व्यक्तीसोबतच लग्न केलं. हे नातं टिकवण्यासाठी जवळपास निम्म्या लोकांनी नोकरीसुद्धा बदलली. 30% लोक तर प्रेमप्रकरण अयशस्वी झाल्यास ऑफिसमध्ये कसं वागायचं, याचं प्लॅनिंग आधीच करून ठेवतात.

वन-नाइट स्टँड देखील जास्त..

जवळपास 62% कर्मचारी आपल्या नात्याबद्दल एचआर विभागाला माहिती देतात. कंपन्यासुद्धा आता अशी नाती बॅन करण्याऐवजी, त्यावर नियंत्रण ठेवण्याचा प्रयत्न करत आहेत. कर्मचाऱ्यांमधील नात्याचा टीम वर्कवर परिणाम होत असल्याची चिंता कंपन्यांना आहे. प्रत्येक पाच कर्मचाऱ्यांपैकी फक्त एकालाच सहकाऱ्यासोबत डेटिंग करणं चुकीचं वाटतं. इतकंच नाही, तर 50% लोकांनी सहकाऱ्यांसोबत फ्लर्ट करत असल्याचं, 39% लोकांनी सिक्रेट रिलेशनशिपमध्ये असल्याचं आणि 17% लोकांनी 'वन-नाइट स्टँड'चा अनुभव घेतल्याचं या सर्वेक्षणात सांगितलं.