Repo Rate Hike : महागाईने गाठला 6.30 टक्क्यांचा टप्पा, RBI डिसेंबरमध्ये वाढवू शकते रेपो रेट

युनियन बँक ऑफ इंडियाच्या अंदाजानुसार ग्राहक महागाई 6.3 टक्क्यांच्या जवळ पोहोचली आहे. अन्नधान्याच्या किमतीत सातत्याने वाढ होत असल्याने, डिसेंबरमध्ये RBI कडून रेपो दरात 25 बेसिस पॉईंट्सची वाढ होण्याची शक्यता वर्तवली जात आहे.

नवी दिल्ली : नोव्हेंबरमध्ये ग्राहक महागाई दर 6.3 टक्क्यांच्या जवळ पोहोचला आहे, ज्यामुळे रिझर्व्ह बँक ऑफ इंडिया (RBI) डिसेंबरमध्ये पुन्हा एकदा व्याजदरात वाढ करण्याची शक्यता निर्माण झाली आहे. युनियन बँक ऑफ इंडियाच्या एका अहवालातून ही माहिती समोर आली आहे. या अहवालात म्हटलंय की, 'नोव्हेंबरमधील आमचा अंदाज सध्या 6.30 टक्क्यांच्या जवळपास आहे आणि त्यात वाढ होण्याची शक्यता आहे, तरीही अन्नधान्यांच्या किमतीतील बदलांवर बारकाईने लक्ष ठेवणं गरजेचं आहे.'

या अहवालात असा अंदाज वर्तवण्यात आला आहे की, डिसेंबरमध्ये होणाऱ्या पतधोरण बैठकीत RBI रेपो दरात 25 बेसिस पॉईंट्सची वाढ करून तो 5.75 टक्क्यांवर नेऊ शकते. तसेच, पुढील बैठकांमध्ये यात आणखी 6 टक्क्यांपर्यंत वाढ होण्याची शक्यता आहे. एवढंच नाही तर, एकाच वेळी 50 बेसिस पॉईंट्सची मोठी वाढ होण्याची शक्यताही या अहवालात नमूद करण्यात आली आहे. 'एकंदरीत, आम्हाला डिसेंबरमध्ये 25 बेसिस पॉईंट्सची वाढ अपेक्षित आहे, पण तरीही एकाच वेळी 50 बेसिस पॉईंट्सची वाढ नाकारता येणार नाही,' असे अहवालात म्हटले आहे.

येत्या काळात मुख्य ग्राहक किंमत वाढीसाठी अन्न महागाई हाच प्रमुख घटक राहील, असे बँकेने स्पष्ट केले आहे. रब्बी पेरणीचा वेग, हवामानाची स्थिती आणि पुरवठा पूर्ववत होण्याचा वेग यावर महागाईची दिशा ठरेल. नोव्हेंबरच्या सुरुवातीच्या आकडेवारीनुसार, तृणधान्ये, डाळी आणि साखरेच्या किमतींमध्ये सतत वाढ होताना दिसत आहे. 11 नोव्हेंबरपर्यंत बाजार समित्यांमध्ये तृणधान्ये आणि डाळींच्या किमती अनुक्रमे 2.50 टक्के आणि 2.48 टक्क्यांनी वाढल्या आहेत, तर याच कालावधीत साखरेच्या किमतीत 5.02 टक्क्यांनी वाढ झाली आहे.

अहवालात असेही नमूद केले आहे की, केवळ अन्नधान्यांपुरतीच महागाई मर्यादित नसून ती इतर क्षेत्रांमध्येही वाढत आहे. ऑक्टोबरमध्ये गाड्यांच्या इंधनाव्यतिरिक्तचा मूळ महागाई दर सप्टेंबरमधील 4.33 टक्क्यांवरून 4.51 टक्क्यांपर्यंत वाढला आहे. तर मौल्यवान धातू वगळता मूळ महागाई दर 3.22 टक्क्यांवरून 3.78 टक्क्यांपर्यंत पोहोचला आहे. तसेच, मुख्य सीपीआय महागाई दर सप्टेंबरमधील 5.54 टक्क्यांवरून ऑक्टोबरमध्ये 6.09 टक्क्यांवर गेला आहे, जो RBI च्या सहनशीलतेच्या वरच्या मर्यादेपर्यंत पोहोचला आहे. याच कालावधीत अन्न महागाई दर 7.36 टक्क्यांवरून 8.50 टक्क्यांपर्यंत वाढला आहे.

आर्थिक वर्ष 2026-27 साठी युनियन बँकेचा सीपीआय महागाई अंदाज क्रूड ऑइलच्या 90 डॉलर्स प्रति बॅरल या दरावर आधारित आहे, जो आरबीआयच्या 5.40 टक्क्यांच्या अंदाजाशी बऱ्यापैकी मिळताजुळता आहे. पण क्रूड ऑइलच्या किमतीत झालेल्या घसरणीमुळे महागाई दर काहीसा कमी राहण्याची शक्यता आहे. तसेच, महागाईत झालेली ही वाढ तात्पुरती आहे की कायमस्वरूपी, हे ठरवण्यासाठी RBI नव्या आकडेवारीवर बारकाईने लक्ष ठेवेल. मध्यवर्ती बँकेच्या अधिकृत वेळापत्रकानुसार, RBI च्या चलनविषयक धोरण समितीची पुढील बैठक 2 ते 4 डिसेंबर 2026 दरम्यान होणार आहे.