Curd Recipes: उन्हाळ्यात किचनमध्ये नो-एन्ट्री! १५ मिनिटांत बनवा दह्याच्या ४ झक्कास रेसिपी

मे-जूनच्या कडक उन्हात किचनमध्ये जास्त वेळ घालवायचा नसेल, तर दह्यापासून बनणाऱ्या या ४ सोप्या आणि चविष्ट रेसिपी नक्की ट्राय करा. या डिश फक्त १०-१५ मिनिटांत तयार होतात.

मे-जूनच्या उकाड्यात तर कधीकधी एसी-कूलर पण फेल वाटतात. अशावेळी किचनमध्ये जाऊन जेवण बनवणं म्हणजे एक मोठं कामच. रोज काय नवीन बनवायचं या टेन्शनमध्ये तुम्हीही असाल, तर आम्ही तुमच्यासाठी काहीतरी खास घेऊन आलोय. दह्यापासून बनणाऱ्या या ४ डिशेस फक्त १०-१५ मिनिटांत तयार होतात. नाश्ता, दुपारचं जेवण किंवा रात्रीच्या जेवणासाठीही हे उत्तम पर्याय आहेत. दह्यामुळे शरीराला थंडावा मिळतो आणि पोटही भरलेलं राहतं, हे तर तुम्हाला माहीतच असेल.

दही-कांदा रायता

उन्हाळ्यात थंडावा आणि चव दोन्ही देणारा हा रायता बेस्ट आहे. एका वाटी दह्यात बारीक चिरलेला कांदा आणि मिरची टाका. आता मोहरीच्या तेलात राई, कढीपत्ता आणि हिंगाची फोडणी द्या. ही फोडणी रायत्यावर घातल्यास चव दुप्पट होते. तुम्ही हा रायता भात, पोळी किंवा पराठ्यासोबत खाऊ शकता.

दही तडका कसा बनवतात?

झटपट बनणारी 'दही तडका' ही डिश गेल्या काही वर्षांपासून खूपच लोकप्रिय झाली आहे. विशेष म्हणजे, ही डिश बॉलिवूड सेलिब्रिटींचीही आवडती आहे. ही डिश बनवण्यासाठी, एका पॅनमध्ये थोडं तेल घेऊन कांदा आणि मिरची हलकी सोनेरी होईपर्यंत परतून घ्या. दुसऱ्या भांड्यात दही घट्ट होईपर्यंत चांगलं फेटून घ्या. आता हे दही पॅनमध्ये घालून परतून घ्या. पोळी आणि भातासोबत याची चव अप्रतिम लागते आणि ही डिश खूप लवकर तयार होते.

चुखौनी रेसिपी

दह्यापासून बनणारी ही डिश नेपाळमध्ये खूप प्रसिद्ध आहे. यासाठी बटाट्याचा वापर केला जातो. सगळ्यात आधी एका भांड्यात ३-४ उकडलेले बटाटे कुस्करून घ्या. त्यात हिरवी कोथिंबीर आणि मिरची घाला. मसाल्यांमध्ये हळद आणि लाल तिखट वापरा. आता त्यात दही, लिंबाचा रस आणि मीठ घालून मिक्स करा. शेवटी मेथी घालून मोहरीच्या तेलाची फोडणी द्या. ही डिश पराठा आणि भात या दोन्हींसोबत छान लागते.

दही-बटाटा बनवण्याची सोपी पद्धत

यूपी-बिहारमध्ये दही-बटाट्याची भाजी सर्वात जास्त पसंत केली जाते. ही भाजी बनवताना दही फाटू नये म्हणून एका वाटीत फेटलेल्या दह्यात हळद, लाल तिखट आणि धने पावडर मिक्स करून घ्या. आता एका कढईत तेल किंवा तूप गरम करून त्यात जिरं-हिंग टाका. हिरवी मिरची आणि आलं घालून परतून घ्या. आता त्यात कापलेले बटाटे घालून २-३ मिनिटं फ्राय करा. आता मंद आचेवर दह्याचं मिश्रण हळूहळू घालत राहा आणि सतत ढवळा. यामुळे दही फाटणार नाही. एक उकळी आल्यावर ५-६ मिनिटं शिजू द्या. दही घट्ट झाल्यावर शेवटी मीठ आणि कसुरी मेथी घालून सर्व्ह करा.