ChatGPT : आता फायनान्सवाल्यांसाठी आलं खास व्हर्जन, बँकिंग आणि गुंतवणुकीची कामं होणार सोपी

OpenAI ने खास आर्थिक क्षेत्रासाठी 'चॅटजीपीटी फॉर फायनान्शियल सर्व्हिसेस' हे नवीन व्हर्जन लाँच केलं आहे. इन्व्हेस्टमेंट बँकिंग आणि इक्विटी रिसर्चवर लक्ष केंद्रित करणाऱ्या या प्लॅटफॉर्ममध्ये प्रीमियम फायनान्शियल डेटा, मॉडेलिंग टूल्स आणि एंटरप्राइज सुरक्षा एकत्र आणली आहे.

मुंबई : OpenAI ने आता खास फायनान्स क्षेत्रातील कंपन्यांसाठी चॅटजीपीटीचं एक नवीन व्हर्जन आणलं आहे. यामध्ये प्रीमियम फायनान्शियल डेटासेट, फायनान्शियल मॉडेलिंग टूल्स आणि एंटरप्राइज लेव्हलची सुरक्षा एकाच प्लॅटफॉर्मवर मिळणार आहे.

'चॅटजीपीटी फॉर फायनान्शियल सर्व्हिसेस' (ChatGPT for Financial Services) असं या प्रोडक्टचं नाव आहे. सुरुवातीला याचं मुख्य लक्ष इन्व्हेस्टमेंट बँकिंग आणि इक्विटी रिसर्च या क्षेत्रांवर असणार आहे. OpenAI ने सांगितलं की, मॉर्गन स्टॅनले (Morgan Stanley) आणि एव्हरकोर (Evercore) यांसारख्या मोठ्या वित्तीय संस्थांसोबत काम केल्यानंतर त्यांच्या टीमसमोरील मोठी आव्हानं समजली. OpenAI च्या मते, "विश्वासार्ह डेटा मिळवणं आणि उच्च दर्जाचे रिपोर्ट्स तयार करणं हे त्यांच्या टीमसमोरील सर्वात मोठे अडथळे होते." कंपनीने पुढे सांगितलं की, या पार्टनरसोबतच्या कामामुळे भविष्यात प्रोडक्टमध्ये आणखी सुधारणा करण्यास आणि इतर आर्थिक सेवांमध्ये विस्तार करण्यास मदत होईल.

एकाच ठिकाणी मिळणार महत्त्वाचा फायनान्शियल डेटा

या नवीन प्रोडक्टचं सर्वात मोठं वैशिष्ट्य म्हणजे यात Daloopa, PitchBook, LSEG News आणि Crunchbase यांसारख्या कंपन्यांचा फायनान्शियल डेटा आधीपासूनच उपलब्ध आहे. या डेटामध्ये कंपन्यांचे ताळेबंद (financial statements), कमाईचे आकडे, कंपन्यांची मूलभूत माहिती आणि खासगी कंपन्यांची माहिती अशा अनेक गोष्टींचा समावेश आहे. OpenAI च्या मते, कंपन्यांना आता वेगळे करार न करता किंवा स्वतंत्र कनेक्टर न लावता थेट हा डेटा वापरता येईल. कंपनी हा सर्व डेटा स्वतःच्या इन्फ्रास्ट्रक्चरवर इंडेक्स आणि होस्ट करणार आहे, ज्यामुळे तो वेगाने मिळेल आणि माहितीचा स्रोतही (citations) अधिक स्पष्टपणे दिसेल.

OpenAI ने म्हटलं आहे की, "कोणत्याही आर्थिक विश्लेषणाचा पाया हा डेटा असतो." संशोधन आणि निर्णय घेण्यासाठी विश्वासार्ह आर्थिक माहिती किती महत्त्वाची आहे, हे कंपनीने अधोरेखित केलं. या बिल्ट-इन डेटामुळे फायनान्स प्रोफेशनलना कोणताही आकडा किंवा दावा त्याच्या मूळ स्रोतापर्यंत जाऊन तपासता येईल.

उदाहरणार्थ, एखादा बँकर P&L नॉर्मलायझेशनचं विश्लेषण करत असेल, तर तो ॲडजस्टेड EBITDA (एक प्रकारचा नफा) मागची आकडेवारी आणि नोट्स तपासू शकतो. कोणते खर्च वगळले आहेत हे समजून घेऊ शकतो आणि मग व्हॅल्युएशनमध्ये तो आकडा कसा वापरायचा याचा निर्णय घेऊ शकतो. या प्लॅटफॉर्मवर OpenAI चे सर्वात नवीन आणि अत्याधुनिक मॉडेल्सही उपलब्ध असतील.

कंपनीच्या गरजेनुसार कस्टमाइझ टेम्प्लेट्स

फायनान्स टीम आपलं विश्लेषण अंतिम कामात कसं रूपांतरित करतात यावरही OpenAI ने लक्ष केंद्रित केलं आहे. ॲडमिनिस्ट्रेटर्स एका खास ॲडमिन पेजवरून एक्सेल, वर्ड आणि पॉवरपॉइंट टेम्प्लेट्स पब्लिश करू शकतात. यामुळे, टीम्स त्यांच्या संस्थेच्या फॉरमॅटमध्ये आणि स्टाईल गाईडनुसार व्हॅल्युएशन मॉडेल्स, रिसर्च नोट्स आणि पिचबुक तयार करू शकतील.

एंटरप्राइज दर्जाची सुरक्षा आणि गोपनीयता

सुरक्षेच्या बाबतीत, OpenAI ने स्पष्ट केलं आहे की आर्थिक संस्थांसाठी गोपनीय माहिती (material non-public information) आणि ग्राहकांची प्रायव्हसी जपणं अत्यंत महत्त्वाचं आहे. हे प्रोडक्ट चॅटजीपीटी एंटरप्राइजच्या सुरक्षा नियंत्रणांवर आधारित आहे, ज्यात SAML SSO, SCIM प्रोव्हिजनिंग आणि रोल-बेस्ड ॲक्सेस कंट्रोल यांचा समावेश आहे. OpenAI ने ठामपणे सांगितलं की, "तुमच्या कंपनीचा व्यावसायिक डेटा आमच्या मॉडेल्सना प्रशिक्षित करण्यासाठी वापरला जात नाही."

कंपनीने पुढे सांगितलं की, सर्व डेटा एन्क्रिप्टेड स्वरूपात साठवला जातो आणि ट्रान्सफर केला जातो. ॲडमिनिस्ट्रेटर्स वर्कस्पेस रिटेन्शन (डेटा किती काळ ठेवायचा) ठरवू शकतात. तसेच, कोणत्या पदावरील व्यक्तीला कोणते ॲप्स आणि स्किल्स वापरता येतील हे ठरवता येतं आणि माहितीची देवाणघेवाण रोखण्यासाठी वेगवेगळे वर्कस्पेस तयार करता येतात.

कुणासाठी उपलब्ध?

OpenAI ने सांगितलं आहे की 'चॅटजीपीटी फॉर फायनान्शियल सर्व्हिसेस' हे पात्र वित्तीय संस्थांसाठी उपलब्ध आहे.