वनप्लस १३ ची किंमत, रॅम, स्टोरेज माहिती लीक; भारतात लवकरच लाँच

वनप्लसचा नवीनतम फ्लॅगशिप फोन वनप्लस १३ ची किंमत, रॅम, स्टोरेजची माहिती ७ जानेवारी रोजी होणाऱ्या लाँचिंगपूर्वी लीक झाल्याचे वृत्त आहे.

दिल्ली: चिनी स्मार्टफोन ब्रँड वनप्लस त्यांची वनप्लस १३ सिरीज ७ जानेवारी २०२५ रोजी जागतिक स्तरावर लाँच करणार आहे. या सिरीजमध्ये वनप्लस १३ आणि वनप्लस १३R हे दोन हँडसेट असतील. भारतासह इतर देशांमधील लाँचिंगपूर्वी वनप्लस १३ ची किंमत लीक झाल्याचे गॅझेट ३६० ने एका टिपस्टरच्या हवाल्याने वृत्त दिले आहे.

वनप्लस १३ ची भारतातील किंमत ६७,००० ते ७०,००० रुपयांच्या दरम्यान असू शकते, असे ट्विटरवरील टिपस्टर योगेश ब्रार यांनी म्हटले आहे. वनप्लस १३ मध्ये दोन रॅम आणि स्टोरेज व्हेरियंट उपलब्ध असतील, असेही त्यांनी सांगितले. मागील वनप्लस १२ च्या १२ जीबी + २५६ जीबी व्हेरियंटची किंमत ६४,९९९ रुपये आणि १६ जीबी + ५१२ जीबी व्हेरियंटची किंमत ६९,९९९ रुपये होती. यावरून वनप्लस १३ ची किंमत थोडी जास्त असू शकते, असा अंदाज आहे. वनप्लस १३ चा डिझाइन, रंग आणि काही प्रमुख वैशिष्ट्ये आधीच लीक झाली आहेत.

दरम्यान, वनप्लस १३R एकाच रॅम आणि स्टोरेज कॉन्फिगरेशनसह येईल, असेही योगेश ब्रार म्हणाले. मागील वनप्लस १२R हा ८ जीबी + १२८ जीबी आणि १६ जीबी + २५६ जीबी या पर्यायांसह आला होता. वनप्लस १२R च्या या व्हेरियंटची किंमत अनुक्रमे ३९,९९९ आणि ४५,९९९ रुपये होती. नंतर कंपनीने वनप्लस १२R चा ८ जीबी + २५६ जीबी व्हेरियंट ४२,९९९ रुपयांमध्ये भारतात लाँच केला. येणाऱ्या वनप्लस १३R ची किंमत अद्याप समोर आलेली नाही.