October 1 Rule Changes : सिलिंडरचे दर वाढले ते विमान प्रवास महागणार, आजपासून कोणते नवीन नियम झाले लागू?

October 1 Rule Changes : प्रत्येक महिन्याच्या पहिल्या तारखेपासून काही नवीन नियम लागू होतात किंवा जुन्या नियमांमध्ये बदल केले जातात. त्याचप्रमाणे १ ऑक्टोबरपासूनही अनेक मोठे बदल होणार आहेत. 

October 1 Rule Changes : महिन्याच्या सुरुवातीबरोबरच अनेक मोठे बदल लागू झाले आहेत. या बदलांचा थेट परिणाम सामान्य लोकांच्या दैनंदिन जीवनावर आणि आर्थिक नियोजनावर होणार आहे. यामध्ये यूपीआय पेमेंट, रेल्वे तिकीट बुकिंग, ऑनलाइन गेमिंग, व्याजदर आणि पेन्शन योजनांशी संबंधित अनेक नियमांचा समावेश आहे.

व्यावसायिक एलपीजी सिलिंडर दरवाढ

१ ऑक्टोबरपासून झालेल्या बदलांमध्ये १९ किलोग्रॅम वजनाच्या व्यावसायिक एलपीजी (LPG) सिलिंडरच्या किमतीत वाढ करण्यात आली आहे. मागील काही महिन्यांत किमती कमी झाल्या असल्या तरी, आता त्यात वाढ झाली आहे, ज्यामुळे हॉटेल्स आणि रेस्टॉरंट्सचे बजेट बिघडण्याची शक्यता आहे.

शहर दरवाढ

• दिल्ली ₹ १५.००
• मुंबई ₹ १६.००
• कोलकाता ₹ १६.००
• चेन्नई ₹ १६.००

या दरवाढीनंतर दिल्लीत सिलिंडरची किंमत ₹ १,५९५.५० आणि मुंबईत ₹ १,५४७.०० झाली आहे. मात्र, दिलासादायक बाब म्हणजे १४ किलोच्या घरगुती वापराच्या एलपीजी सिलिंडरच्या किमतीत कोणताही बदल झालेला नाही.

विमान इंधनात मोठी वाढ, हवाई प्रवास महागणार

ऑक्टोबरच्या सुरुवातीला झालेला दुसरा मोठा बदल म्हणजे विमान टर्बाइन इंधनाच्या (ATF - Aviation Turbine Fuel) दरांमध्ये झालेली वाढ. सप्टेंबर महिन्यात किमती कमी झाल्यानंतर, सणासुदीच्या काळात कंपन्यांनी एटीएफच्या दरात मोठी वाढ केली आहे.

शहर वाढ

• दिल्ली ₹ ३,०५२.५० प्रति किलोलिटर
• मुंबई ₹ २,८८१.५६ प्रति किलोलिटर

या दरवाढीमुळे विमान कंपन्यांचा परिचालन खर्च (Operating Cost) वाढेल. विमान इंधनाच्या वाढलेल्या किमतीचा बोजा कंपन्या विमान तिकिटांच्या किमती वाढवून प्रवाशांवर टाकण्याची दाट शक्यता आहे, ज्यामुळे आगामी काळात हवाई प्रवास करणे अधिक महाग होऊ शकते.

५ लाख रुपयांपर्यंत व्यवहार करता येणार

आता UPI द्वारे एकावेळी ५ लाख रुपयांपर्यंत व्यवहार करता येणार आहे. पूर्वी ही मर्यादा फक्त १ लाख रुपये होती. या बदलामुळे रिअल इस्टेट, ई-कॉमर्स आणि व्यवसायाशी संबंधित मोठे व्यवहार करणे सोपे होईल. याशिवाय, आता UPI ऑटो-पे सुविधा देखील सुरू होईल. म्हणजेच सबस्क्रिप्शन, वीज-पाणी बिल किंवा इतर सेवांचे पेमेंट आपोआप निश्चित तारखेला होईल. प्रत्येक वेळी ऑटो-डेबिट होण्यापूर्वी तुम्हाला एक सूचना मिळेल आणि गरज पडल्यास तुम्ही ते बदलू किंवा रद्द करू शकता.

रेल्वेने तिकीट बुकिंगचे नियम बदलले

आता रेल्वेने तिकीट बुकिंगचे नियम बदलले आहेत. नवीन नियमानुसार, जेव्हाही आरक्षण सुरू होईल, तेव्हा पहिल्या १५ मिनिटांत फक्त तेच लोक ऑनलाइन तिकीट बुक करू शकतील ज्यांचे आधार कार्ड व्हेरिफाईड असेल. हा नवीन नियम १ ऑक्टोबरपासून लागू होईल.

गेम खेळण्यासाठी किमान वय १८ वर्षे असणे आवश्यक

आता सर्व ऑनलाइन गेमिंग प्लॅटफॉर्म्सना MeitY कडून वैध परवाना घ्यावा लागेल. गेमिंग सुरक्षित आणि पारदर्शक बनवणे तसेच फसवणूक रोखणे हा याचा उद्देश आहे. तसेच, आता ऑनलाइन रिअल-मनी गेम खेळण्यासाठी किमान वय १८ वर्षे असणे आवश्यक आहे.

RBI च्या चलनविषयक धोरण समितीची बैठक होणार

१ ऑक्टोबर रोजी भारतीय रिझर्व्ह बँकेच्या चलनविषयक धोरण समितीची बैठक होणार आहे. या बैठकीत रेपो रेट आणि इतर आर्थिक निर्णयांची घोषणा केली जाईल. जर रेपो रेट कमी झाला, तर गृहकर्ज आणि कार कर्जाचे व्याजदर कमी होऊ शकतात, ज्यामुळे तुमचा मासिक EMI कमी होऊ शकतो.

स्पीड पोस्ट सेवेत बदल

टपाल विभागाने १ ऑक्टोबर २०२५ पासून स्पीड पोस्ट सेवेत बदल केले आहेत. आता काही भागांमध्ये पोस्ट पाठवण्याचे शुल्क वाढवण्यात आले आहे, तर काही ठिकाणी ते कमी करण्यात आले आहे. यासोबतच ओटीपीद्वारे सुरक्षित डिलिव्हरी, रिअल-टाइम ट्रॅकिंग, ऑनलाइन बुकिंग आणि पेमेंट, एसएमएस सूचना आणि युझर रजिस्ट्रेशन यांसारख्या नवीन सुविधाही सुरू करण्यात आल्या आहेत. विद्यार्थ्यांना १०% आणि नवीन घाऊक ग्राहकांना ५% सूटही मिळेल.

ऑक्टोबर महिन्यात बँकांना सुट्ट्याच सुट्या

ऑक्टोबरची सुरुवात दुर्गापूजेच्या सुट्टीने होईल आणि त्यानंतर महिनाभर महात्मा गांधी जयंती, दसरा, लक्ष्मी पूजा, महर्षी वाल्मिकी जयंती, करवा चौथ, दिवाळी यांसारखे मोठे सण येतील. त्यामुळे ऑक्टोबरमध्ये बँकांना भरपूर सुट्ट्या असतील. म्हणून, बँकेत जाण्यापूर्वी आरबीआयने जारी केलेली सुट्ट्यांची यादी तपासणे महत्त्वाचे आहे, जेणेकरून तुमचा बँकेत जाऊन वेळ वाया जाणार नाही.