Milk Fat: दुधाच्या पिशवीचा रंग वेगळा का असतो? प्रत्येक रंगाचा अर्थ काय असतो?

Milk Fat: बाजारात वेगवेगळ्या रंगांच्या दुधाच्या पिशव्या मिळतात. पण या सगळ्या पिशव्या एकाच रंगाच्या का नसतात? या रंगांमागे काय रहस्य आहे? कोणत्या रंगाच्या पिशवीतलं दूध कोणी प्यावं आणि आरोग्यासाठी कोणतं दूध चांगलं आहे? चला जाणून घेऊया.

दुधाच्या पिशव्या

आपण बाजारात जातो तेव्हा निळ्या, हिरव्या, केशरी रंगांच्या दुधाच्या पिशव्या दिसतात. तुम्हाला कधी प्रश्न पडलाय का, की या पिशव्यांचे रंग वेगवेगळे का असतात? अनेकजण समजतात की प्रत्येक कंपनी आपापल्या रंगाची पिशवी विकते. पण तसं नाहीये. या रंगांमागे एक मोठी गोष्ट दडलेली आहे. पिशवीच्या रंगावरूनच त्यात कोणत्या प्रकारचं दूध आहे आणि त्यात फॅटचं (स्निग्धांश) प्रमाण किती आहे, हे ग्राहकांना सहज समजतं. त्यामुळे योग्य दूध निवडायला मदत होते.

कोणत्या रंगाच्या पिशवीत कोणते दूध?

निळ्या रंगाच्या पिशवीत 'टोन्ड मिल्क' असतं, ज्यात 3% पेक्षा कमी फॅट असतं. केशरी किंवा गुलाबी (Magenta) रंगाच्या पिशवीत 'फुल क्रीम दूध' असतं, ज्यात साय भरपूर असते आणि फॅटचं प्रमाण कमीतकमी 6% असतं. हिरव्या पिशवीत ताजं दूध (Fresh Milk) असतं, ज्यात 4.5% फॅट आणि 8.5% SNF (Solids-Not-Fat) असतं. काही कंपन्या कमी फॅट असलेलं दूध पिवळ्या पिशवीतही विकतात. ग्राहकांना पिशवीवरील बारीक अक्षरं वाचण्याऐवजी फक्त रंग बघून हवं ते दूध निवडता यावं, यासाठी ही सोय असते. फक्त भारतातच नाही, तर ब्रिटन आणि युरोपमध्ये फुल क्रीम दूध निळ्या आणि कमी फॅटचं दूध हिरव्या पिशवीत मिळतं. तर इंटरनॅशनल डेअरी फूड्स असोसिएशननुसार, अमेरिकेत फुल क्रीम दूध लाल आणि कमी फॅटचं दूध निळ्या रंगाच्या पिशवीत मिळतं.

कोणत्या प्रकारचे दूध कोणी प्यावे?

आपल्या देशात लोक कोणत्या ना कोणत्या स्वरूपात दूध पितातच. तुम्हाला पातळ दूध हवं असेल, तर 'स्किम्ड' किंवा 'टोन्ड मिल्क' घ्या. जर घट्ट दूध हवं असेल, तर 'फुल क्रीम मिल्क' निवडा. हेल्थलाइन (Healthline) नुसार, फुल क्रीम दूध लहान मुलं आणि खेळाडूंसाठी चांगलं असतं, कारण त्यात व्हिटॅमिन डी आणि ओमेगा-3 फॅटी ऍसिड जास्त असतं. ज्यांना वजन कमी करायचं आहे किंवा ज्यांना हृदयाशी संबंधित समस्या आहेत, त्यांच्यासाठी स्किम्ड किंवा टोन्ड मिल्क पिणं फायद्याचं ठरतं.