Car Price Hike : मारुती सुझुकीच्या कार महागणार, सप्टेंबरपासून 20,000 रुपयांपर्यंतची वाढ

मारुती सुझुकी इंडिया सप्टेंबरपासून आपल्या काही मॉडेल्सच्या किमती 20,000 रुपयांपर्यंत वाढवणार आहे. मे महिन्यापासूनची ही तिसरी दरवाढ आहे. गाडी बनवण्यासाठी लागणाऱ्या कच्च्या मालाच्या वाढत्या किमती आणि महागाईमुळे ही वाढ करावी लागत असल्याचं कंपनीने म्हटलं आहे.

मुंबई : मारुती सुझुकी इंडिया सप्टेंबर महिन्यापासून आपल्या काही निवडक मॉडेल्सच्या किमती 20,000 रुपयांपर्यंत वाढवणार आहे. कंपनीने एक्सचेंज फायलिंगमध्ये ही माहिती दिली असून, मे महिन्यापासूनची ही तिसरी दरवाढ असेल. गाडी बनवण्यासाठी लागणाऱ्या कच्च्या मालाच्या किमती सतत वाढत असल्याने आणि महागाईमुळे कंपनीवर दबाव वाढला आहे, त्यामुळे ही दरवाढ करावी लागत असल्याचं कंपनीने स्पष्ट केलं आहे.

किंमत वाढीचं कारण काय?

कंपनीने आपल्या निवेदनात म्हटलं आहे की, "...कच्च्या मालाच्या किमतीत सतत वाढ होत असल्यामुळे, कंपनीने निवडक मॉडेल्सच्या किमती 20,000 रुपयांपर्यंत वाढवण्याचा निर्णय घेतला आहे. ही दरवाढ सप्टेंबर 2026 पासून लागू होईल."

कंपनीने पुढे सांगितलं की, वाढत्या खर्चाचा भार कमी करण्यासाठी आम्ही सतत प्रयत्न करत आहोत. "मात्र, महागाईचा बोजा आणि प्रतिकूल खर्च वातावरणामुळे, वाढलेल्या खर्चाचा काही भाग ग्राहकांवर टाकण्याशिवाय आमच्याकडे पर्याय नाही. तरीही, ग्राहकांवर याचा कमीत कमी परिणाम होईल याची आम्ही खात्री करत आहोत," असं कंपनीने नमूद केलं. कोणत्या मॉडेल्सच्या किमती वाढणार आहेत, हे मात्र कंपनीने अद्याप सांगितलेलं नाही.

विक्रीत मात्र दमदार कामगिरी

याआधी, मारुती सुझुकी इंडियाने 2026-27 या आर्थिक वर्षाच्या पहिल्या पाच महिन्यांत 10 लाखांपेक्षा जास्त गाड्यांच्या विक्रीचा टप्पा ओलांडला होता. दुसरीकडे, ह्युंदाई मोटर इंडियाने ऑगस्टमध्ये आतापर्यंतची सर्वाधिक देशांतर्गत विक्री नोंदवली, तर टाटा मोटर्सच्या व्यावसायिक वाहनांच्या विक्रीत गेल्या वर्षीच्या तुलनेत 49 टक्क्यांनी वाढ झाली.

मारुती सुझुकीने ऑगस्ट 2026 मध्ये एकूण 2,19,220 गाड्या विकल्या. यामध्ये देशांतर्गत बाजारात 1,80,078 युनिट्स, इतर कंपन्यांना (OEMs) 5,298 युनिट्स आणि 33,844 युनिट्सची निर्यात यांचा समावेश आहे.

एप्रिल ते ऑगस्ट या कालावधीत कंपनीची एकूण विक्री 11,43,365 युनिट्स झाली, जी मागील वर्षी याच कालावधीत 8,89,070 युनिट्स होती.

ऑगस्टमध्ये देशांतर्गत प्रवासी वाहनांची विक्री 1,76,971 युनिट्सवर पोहोचली, जी मागील वर्षी 1,31,278 युनिट्स होती. युटिलिटी व्हेइकल्सची (UV) विक्री 54,043 युनिट्सवरून 79,045 युनिट्सवर गेली, तर कॉम्पॅक्ट आणि मिड-साईज प्रवासी कारची विक्री 59,597 युनिट्सवरून 77,166 युनिट्सवर पोहोचली.

शेअर बाजारातील कामगिरी

ही बातमी देत असताना, मारुतीचा शेअर 103 अंकांनी म्हणजेच 0.81 टक्क्यांनी वाढून 12,803 रुपयांवर व्यवहार करत होता. आधीच्या दिवशी तो 12,700 रुपयांवर बंद झाला होता. BSE वर उपलब्ध असलेल्या माहितीनुसार, 7 सप्टेंबरपर्यंत कंपनीचे बाजार भांडवल (मार्केट कॅप) 4,02,535.90 कोटी रुपये आहे. (ANI)