Mahindra SUV : स्कॉर्पिओचे नवे मॉडेल्स येणार, महिंद्राच्या Vision S आणि Vision X ची तयारी; काय असतील बदल

Mahindra New Car : महिंद्रा पुढच्या पाच वर्षांत अनेक नव्या पेट्रोल-डिझेल आणि इलेक्ट्रिक गाड्या आणून भारतीय बाजारात आपली पकड आणखी मजबूत करणार आहे. यासाठी 'NU-IQ' या नव्या प्लॅटफॉर्मवर 'व्हिजन एस' आणि 'व्हिजन एक्स' या दोन नव्या SUV आणल्या जाणार आहेत.

मुंबई : महिंद्रा अँड महिंद्रा भारतीय बाजारात आपली पकड आणखी घट्ट करायच्या तयारीत आहे. पुढच्या पाच वर्षांत कंपनी अनेक नव्या पेट्रोल-डिझेल (ICE - इंटर्नल कम्बशन इंजिन) आणि इलेक्ट्रिक गाड्या लाँच करण्याच्या योजनेत आहे. याचाच भाग म्हणून 'व्हिजन' कॉन्सेप्टवर आधारित नव्या एसयूव्ही मॉडेल्स बाजारात येणार आहेत. इलेक्ट्रिक गाड्यांच्या बाबतीत महिंद्राच्या नव्या XEV आणि BE सीरिजला आधीच चांगला प्रतिसाद मिळाला आहे. रिपोर्ट्सनुसार, जून २०२६ पर्यंत कंपनीचा इलेक्ट्रिक वाहनांमधील बाजारातील वाटा १६.८ टक्क्यांवरून २३.८ टक्क्यांपर्यंत वाढण्याचा अंदाज आहे. इलेक्ट्रिक क्षेत्रात मजबूत होण्यासोबतच, महिंद्रा आता 'व्हिजन' सीरिजमध्ये नव्या एसयूव्ही आणण्याच्या तयारीत आहे.

महिंद्रा व्हिजन एस: २०२६ च्या अखेरीस येणार

'व्हिजन एस' या कॉन्सेप्टवर आधारित गाडी २०२६ च्या अखेरीस बाजारात येण्याची शक्यता आहे. चार मीटरपेक्षा कमी लांबीची ही कॉम्पॅक्ट एसयूव्ही महिंद्राच्या स्कॉर्पिओ एन (Scorpio N) फॅमिलीचा भाग असेल. विशेष म्हणजे, महिंद्राच्या नव्या 'NU-IQ' मॉड्युलर प्लॅटफॉर्मवर तयार होणारी ही पहिली एसयूव्ही असेल. हा नवा प्लॅटफॉर्म पेट्रोल, डिझेल आणि इलेक्ट्रिक अशा विविध पॉवरट्रेन पर्यायांना सपोर्ट करण्यासाठी डिझाइन केला आहे. भविष्यातील प्रवासी वाहनांच्या रणनीतीमध्ये NU-IQ प्लॅटफॉर्म महत्त्वाची भूमिका बजावेल, असं महिंद्राने स्पष्ट केलं आहे.

नव्या टेक्नॉलॉजीसह NU-IQ प्लॅटफॉर्म

महिंद्राच्या या नव्या प्लॅटफॉर्ममध्ये अनेक आधुनिक टेक्नॉलॉजी वापरण्यात आल्या आहेत. यात व्हेरिएबल रेशो स्टीअरिंग रॅक, ॲक्टिव्ह डॅम्पर्ससोबत ५-लिंक रिअर सस्पेन्शन आणि 'NU-UX' नावाचं नवं डोमेन आर्किटेक्चर यांचा समावेश आहे. कंपनीने सांगितलंय की, या प्लॅटफॉर्मवर बनवलेल्या गाड्यांना BNCAP, युरो NCAP आणि ANCAP सारख्या क्रॅश टेस्टमध्ये ५-स्टार सेफ्टी रेटिंग मिळवण्याचं लक्ष्य आहे. या 'व्हिजन' कॉन्सेप्ट गाड्यांचं डिझाइन मुंबईतील महिंद्रा इंडिया डिझाइन स्टुडिओ आणि ब्रिटनमधील महिंद्रा ॲडव्हान्स्ड डिझाइन युरोप यांनी मिळून तयार केलं आहे.

व्हिजन एक्स: XUV 3XO च्या वरचं मॉडेल

'व्हिजन एस' नंतर महिंद्रा 'व्हिजन एक्स' कॉन्सेप्टवर आधारित दुसरी एसयूव्ही लाँच करण्याच्या तयारीत असल्याची चिन्हं आहेत. कंपनीच्या सध्याच्या गाड्यांमध्ये या गाडीला XUV 3XO च्या वरचं स्थान दिलं जाऊ शकतं. या नव्या एसयूव्हीमध्ये जास्त ग्राउंड क्लिअरन्स आणि क्रॉसओव्हर स्टाईल डिझाइन मिळण्याची शक्यता आहे. हे मॉडेल २०२७ पर्यंत बाजारात येण्याची शक्यता आहे.

पेट्रोल ते इलेक्ट्रिक, अनेक पर्याय मिळणार

NU-IQ प्लॅटफॉर्मवर बनणाऱ्या या नव्या एसयूव्हीच्या इंजिनबद्दल महिंद्राने अजून कोणतीही माहिती दिलेली नाही. पण यात पेट्रोल, डिझेल, हायब्रिड आणि इलेक्ट्रिक असे वेगवेगळे पर्याय मिळतील अशी अपेक्षा आहे. या नव्या 'व्हिजन' एसयूव्ही सीरिजमधून इलेक्ट्रिक आणि पारंपरिक अशा दोन्ही बाजारांमध्ये आपलं स्थान आणखी मजबूत करण्याचं महिंद्राचं ध्येय आहे.