Ladki Bahin Yojana : लाडक्या बहिणींसाठी दिलासादायक बातमी!, जुलैच्या हप्त्याआधीच ‘डबल’ आनंद

Ladki Bahin Yojana : महाराष्ट्र सरकारच्या 'मुख्यमंत्री माझी लाडकी बहिण योजना' अंतर्गत जून महिन्याचा हप्ता काही महिलांना मिळालेला नाही. मात्र, अशा महिलांना जुलैच्या हप्त्यासोबत जूनचा हप्ता एकत्र मिळण्याची शक्यता आहे. 

मुंबई : महाराष्ट्र सरकारच्या लोकप्रिय 'मुख्यमंत्री माझी लाडकी बहिण योजना' अंतर्गत पात्र महिलांसाठी एक मोठी आणि दिलासादायक बातमी समोर आली आहे. ही योजना जुलै 2024 पासून सुरू करण्यात आली होती आणि आतापर्यंत पात्र लाभार्थींना सलग 12 महिने, म्हणजेच 12 हप्ते मिळाले आहेत. जुलै 2024 ते जून 2025 या कालावधीतील एकूण 12 हप्त्यांची रक्कम पात्र महिलांच्या खात्यात जमा करण्यात आली आहे.

जूनचा हप्ता जमा, काहींना प्रतीक्षा कायम

जुलै 2025 च्या पहिल्या आठवड्यात लाडकी बहिण योजनेचा 12 वा हप्ता म्हणजेच जून महिन्याचा 1500 रुपयांचा हप्ता लाभार्थी महिलांच्या खात्यात ट्रान्सफर करण्यात आला. यासाठी लागणाऱ्या 3600 कोटी रुपयांच्या निधीला जूनच्या अखेरीस वित्त विभागाची मंजुरी मिळाली होती. मात्र, काही महिलांनी अशी तक्रार केली आहे की त्यांच्या खात्यात जूनचा हप्ता अजूनही जमा झालेला नाही.

पात्र महिलांसाठी खुशखबर!

माध्यमांमध्ये प्रसिद्ध झालेल्या बातम्यांनुसार, ज्यांच्या खात्यात जून महिन्याचा हप्ता आलेला नाही, त्यांना जुलैच्या हप्त्यासोबत जूनचा हप्ता एकत्र मिळण्याची शक्यता आहे. म्हणजेच अशा महिलांच्या खात्यात पात्र असल्यास एकूण 3000 रुपये (जूनचे 1500 + जुलैचे 1500 रुपये) ट्रान्सफर होण्याची शक्यता आहे. मात्र, याबाबत अजूनपर्यंत सरकारकडून कोणतीही अधिकृत घोषणा करण्यात आलेली नाही, त्यामुळे सर्वांचे लक्ष या दिशेने लागले आहे.

जुलैचा हप्ता कधी मिळणार?

जिथे जूनचा हप्ता जुलैच्या पहिल्या आठवड्यात देण्यात आला, तिथे आता महिलांना जुलैच्या हप्त्याची प्रतीक्षा लागली आहे. काही अहवालांनुसार, मुख्यमंत्री माझी लाडकी बहिण योजनेचा जुलै महिना हप्ता जुलैच्या तिसऱ्या किंवा चौथ्या आठवड्यापर्यंत पात्र महिलांच्या खात्यात जमा केला जाऊ शकतो.

‘योजना बंद होणार नाही, उलट पैसे वाढणार’

दरम्यान, विरोधकांकडून योजना बंद होईल असे दावे करण्यात येत असताना, भाजपचे आमदार राम कदम म्हणाले की, "विरोधक म्हणत होते ही योजना सुरूच होणार नाही, पण आम्ही ती सुरू करून दाखवली आणि करोडो महिलांना आर्थिक मदत दिली. आता ते म्हणतात की ही योजना दोन महिन्यात बंद होणार आहे. मी त्यांना सांगू इच्छितो की ही योजना आता कधीही बंद होणार नाही, उलट यामधील रक्कमही वाढवली जाईल."

मुख्यमंत्री माझी लाडकी बहिण योजनेअंतर्गत 21 ते 65 वयोगटातील पात्र महिलांच्या खात्यात दरमहा 1500 रुपये जमा केले जात आहेत. आतापर्यंत 12 हप्त्यांमधून एकूण 18,000 रुपये लाडकी बहिणींना मिळाले असून, जुलै महिन्याच्या हप्त्याची महिला लाभार्थी आतुरतेने वाट पाहत आहेत.