Kitchen Tips: घरात भाजी नाही? नो प्रॉब्लेम! अशी बनवा दह्यापासून चविष्ट भाजी!

Kitchen Tips: घरात कोणतीही भाजी शिल्लक नसेल आणि काहीतरी चविष्ट खाण्याची इच्छा असेल, तर काळजी करू नका. फक्त 10  मिनिटांत तुम्ही दह्यापासून एक अप्रतिम ग्रेव्ही भाजी बनवू शकता. ही भाजी चवीला तर उत्तम लागतेच, पण आरोग्यासाठीही खूप फायदेशीर आहे.

दह्याची भाजी कशी बनवायची?

लागणारे साहित्य:

• दही: 1 कप
• पाणी: 1 कप
• सुक्या लाल मिरच्या: 2
• मोहरी, कढीपत्ता: फोडणीसाठी
• मीठ: चवीनुसार
• खवलेला नारळ: 2 चमचे
• जिरं: 1 चमचा
• हिरव्या मिरच्या: 2

तुमच्याकडे भेंडी किंवा वांग्यासारखी भाजी असेल, तर ती तुम्ही यात घालू शकता. त्यामुळे चव आणखी वाढेल.

कृती:

सर्वात आधी खवलेला नारळ, जिरं आणि हिरव्या मिरच्या ब्लेंडरमध्ये घालून त्याची बारीक पेस्ट बनवा. एका भांड्यात दही घेऊन ते चांगलं फेटून घ्या. त्यात पाणी घालून पुन्हा एकदा मिक्स करा. दही आंबट असेल तर तुम्ही 2 ऐवजी 4 हिरव्या मिरच्या वापरू शकता, त्यामुळे आंबटपणा कमी होईल. आता एका कढईत तेल गरम करून त्यात मोहरी, सुक्या लाल मिरच्या आणि कढीपत्ता घालून फोडणी तयार करा. तुमच्याकडे भाजी असेल तर तिचे लहान तुकडे करून फोडणीत घाला आणि दोन मिनिटं परतून घ्या. (भाजी नसल्यास ही स्टेप वगळा). नंतर त्यात नारळ-मिरचीची पेस्ट घालून थोडा वेळ परता. आता त्यात दही-पाण्याचं मिश्रण ओता आणि मध्यम आचेवर ढवळत राहा. चवीनुसार मीठ घालून दोन मिनिटं उकळी येऊ द्या आणि गॅस बंद करा. वरून बारीक चिरलेली कोथिंबीर घातली की झाली तुमची चविष्ट दह्याची भाजी तयार!

या भाजीचे आरोग्यदायी फायदे

उन्हाळ्यात ही भाजी खाल्ल्याने शरीराला थंडावा मिळतो. यात कॅलरीज खूप कमी असल्यामुळे वजन वाढण्याची चिंता नसते. फोडणीसाठी फक्त एक चमचा तेल वापरलं जातं, त्यामुळे ही भाजी खूप हेल्दी आहे. ही भाजी बनवायला सोपी असून गॅसही कमी लागतो. गरमागरम भात आणि पापडासोबत ही भाजी अप्रतिम लागते.