Super Fast Internet : 5G ला विसरा! भारतात येतंय वाय-फाय 7, स्पीड पाहून व्हाल थक्क, आनंदाची बातमी
सार
Super Fast Internet : सरकारच्या या नवीन घोषणेनुसार, 5925-6425 मेगाहर्ट्झ बँडमध्ये काम करणाऱ्या कमी क्षमतेच्या इनडोअर (Indoor) आणि अत्यंत कमी क्षमतेच्या आउटडोअर (Outdoor) वायरलेस उपकरणांसाठी आता स्वतंत्र परवान्याची गरज भासणार नाही.
भारतीय इंटरनेट जगात एक मोठा बदल होणार आहे. केंद्रीय दूरसंचार विभागाने (DoT) 6 गिगाहर्ट्झ (GHz) स्पेक्ट्रममधील 500 मेगाहर्ट्झ विना-परवाना वापरासाठी खुले केले आहे. या घोषणेमुळे, भारतात वाय-फाय 6E (Wi-Fi 6E) आणि अत्याधुनिक वाय-फाय 7 (Wi-Fi 7) सेवा सुरू करण्याचा मार्ग मोकळा झाला आहे. यामुळे घरे आणि कार्यालयांमधील इंटरनेटचा वेग कल्पनातीत वाढण्याची अपेक्षा आहे.
विना-परवाना वापर -
सरकारच्या या नवीन घोषणेनुसार, 5925-6425 मेगाहर्ट्झ बँडमध्ये काम करणाऱ्या कमी क्षमतेच्या इनडोअर (Indoor) आणि अत्यंत कमी क्षमतेच्या आउटडोअर (Outdoor) वायरलेस उपकरणांसाठी आता स्वतंत्र परवान्याची गरज भासणार नाही. म्हणजेच, तुमचे राउटर आणि स्मार्ट डिव्हाइसेस आता कोणत्याही अडथळ्याशिवाय अतिशय वेगाने काम करू शकतील. यामुळे वापरकर्त्यांना अखंड आणि सुरक्षित इंटरनेट अनुभव मिळेल.
मोबाइल सेवेसाठी स्वतंत्र -
वाय-फाय सेवांसाठी 6 GHz स्पेक्ट्रमचा खालचा भाग (Lower Band) खुला करताना, सरकारने त्याचा वरचा भाग म्हणजेच 6425-7125 मेगाहर्ट्झ बँड मोबाइल सेवांसाठी राखीव ठेवला आहे. राष्ट्रीय वारंवारता वाटप योजनेनुसार (NFAP), हा उच्च बँड भविष्यातील प्रगत मोबाइल सेवांसाठी वापरला जाईल. यामुळे वाय-फाय आणि मोबाइल नेटवर्क एकमेकांमध्ये अडथळा न आणता काम करू शकतील.
कंपन्यांची वेगवेगळी मते -
ॲपल, ॲमेझॉन, मेटा आणि गूगलसारख्या जागतिक तंत्रज्ञान कंपन्यांनी संपूर्ण 1200 मेगाहर्ट्झ स्पेक्ट्रम वाय-फाय वापरासाठी खुला करण्याची मागणी केली होती. पण, रिलायन्स जिओसारख्या देशांतर्गत कंपन्यांनी या स्पेक्ट्रमचा लिलाव करावा, असा आग्रह धरला होता. दोन्ही बाजूंचा विचार करून सरकारने तूर्तास 500 मेगाहर्ट्झ वाय-फाय वापरासाठी देऊन एक संतुलित निर्णय घेतला आहे.
भविष्याचा पाया -
या निर्णयावर भाष्य करताना, ITU-APT फाउंडेशन ऑफ इंडियाचे अध्यक्ष भरत भाटिया म्हणाले, "हे भारताच्या 5G आणि भविष्यातील 6G प्रयत्नांना पाठिंबा देईल." त्याचप्रमाणे, ब्रॉडबँड उपकरणे बनवणाऱ्या GX ग्रुपचे सीईओ परितोष प्रजापती यांनी सांगितले की, "हे सुरक्षित आणि पुढच्या पिढीच्या नेटवर्किंग सोल्यूशन्ससाठी भारताचे स्थान मजबूत करेल." आता येत्या काळात बफरिंगशिवाय स्ट्रीमिंग आणि हाय-स्पीड गेमिंगचा अनुभव निश्चित होणार आहे.