Hyundai Exter : मध्यमवर्गीयांची कार नव्या रूपात लाँच, जाणून घ्या किंमत आणि फीचर्समधील बदल

Hyundai Exter 2026 Facelift Launched : Hyundai ने आपली Exter फेसलिफ्ट भारतात लाँच केली आहे. याची किंमत ५.८० लाखांपासून सुरू होते. गाडीला नवीन ड्युअल-टोन इंटीरियर, अपडेटेड डिझाइन आणि वायरलेस कनेक्टिव्हिटीसारखे नवीन फीचर्स मिळाले आहेत. 

Hyundai Exter 2026 Facelift Launched : नवी Hyundai Exter 2026 फेसलिफ्ट आता भारतात विक्रीसाठी उपलब्ध झाली आहे. या कॉम्पॅक्ट क्रॉसओव्हरमध्ये काही डिझाइन बदल आणि नवीन फीचर्स जोडण्यात आले आहेत. गाडीची एक्स-शोरूम किंमत ५.८० लाख ते ९.४२ लाख रुपयांपर्यंत आहे. इंजिनमध्ये कोणताही बदल केलेला नाही. नवीन जनरेशनच्या Venue आणि Verna फेसलिफ्टप्रमाणेच, Exter च्या व्हेरिएंटच्या नावांमध्येही बदल करण्यात आला आहे.

काय बदललं आहे?

सर्वात मोठा बदल गाडीच्या आतमध्ये, म्हणजेच इंटीरियरमध्ये झाला आहे. जुन्या ऑल-ब्लॅक थीमऐवजी आता नवीन ड्युअल-टोन नेव्ही ब्लू आणि ग्रे रंगाची कॅबिन थीम देण्यात आली आहे. यामुळे गाडी आतून अधिक प्रीमियम वाटते. नवीन फ्लॅट-बॉटम स्टीअरिंग व्हील, डॅशबोर्डवर फॉक्स कार्बन-फायबरसारखं फिनिशिंग आणि नवीन सेमी-फॅब्रिक सीट कव्हर्स देण्यात आले आहेत.

फीचर्सबद्दल बोलायचं झाल्यास, नवीन Exter मध्ये आता मागच्या प्रवाशांसाठी अॅडजस्टेबल हेडरेस्ट आणि ड्रायव्हरसाठी उंचीनुसार अॅडजस्ट करता येणारी सीट स्टँडर्ड म्हणून मिळते. याशिवाय, मागच्या प्रवाशांसाठी टाइप-सी यूएसबी पोर्ट, ड्रायव्हरसाठी एक वेगळा आर्मरेस्ट, आणि पोर्टेबल अडॅप्टरद्वारे वायरलेस अँड्रॉइड ऑटो आणि ॲपल कारप्लेची सुविधा देण्यात आली आहे. गाडीत नवीन मेटल पेडल्सही मिळतात.

गाडीच्या बाहेरील लूकमध्येही बदल केले आहेत. समोरच्या बाजूला नवीन डिझाइनची ग्रिल, खालच्या बाजूला सिल्व्हर फिनिशिंग आणि ब्लॅक फिनिशमध्ये बदललेला बंपर दिसतो. 'Exter' बॅजिंगची जागाही थोडी बदलली आहे. व्हील आर्च पूर्वीपेक्षा जास्त स्पोर्टी दिसतात आणि नवीन डिझाइनचे अलॉय व्हील्स देण्यात आले आहेत. नवीन सी-पिलर गार्निश, ब्लॅक फिनिश रिअर बंपर आणि नवीन स्प्लिट स्पॉइलर हे इतर काही डिझाइन बदल आहेत.

इंजिनमध्ये बदल नाही

नवीन Hyundai Exter मध्ये पूर्वीप्रमाणेच 1.2-लिटर, 4-सिलेंडर पेट्रोल इंजिन देण्यात आलं आहे. हे इंजिन 5-स्पीड मॅन्युअल आणि 5-स्पीड AMT गिअरबॉक्स पर्यायांसह उपलब्ध आहे. हे इंजिन 83 bhp पॉवर आणि 114 Nm टॉर्क निर्माण करतं. CNG व्हेरिएंटमध्ये ड्युअल-सिलेंडर CNG किट आहे, जे 69 bhp पॉवर आणि 95 Nm टॉर्क देतं.