Weekly Drinking : आठवड्यातून एकदा दारू प्यायल्याने काही होत नाही? तज्ज्ञ काय म्हणतात, जाणून घ्या

Health Risks of Drinking Alcohol Just Once a Week : दारू आरोग्यासाठी वाईट आहे हे सगळ्यांनाच माहीत आहे. पण अनेकजण 'आठवड्यातून एकदा प्यायल्याने काय होतं?' असं म्हणत स्वतःची समजूत घालतात. पण खरंच यात काही तथ्य आहे का? चला जाणून घेऊया.

तज्ज्ञ काय म्हणतात?

डॉक्टरांच्या मते, निरोगी व्यक्तीने आठवड्यातून एकदा कमी प्रमाणात (उदा. 60 मिली) दारू प्यायल्यास मोठा धोका नसतो. पण याचा अर्थ धोका शून्य आहे, असं नाही. एकाच वेळी जास्त प्यायल्यास शरीराला नुकसान होतंच. दोन बीअरसोबत स्नॅक्स खाल्ल्यास शरीरात १००० ते १२०० कॅलरीज जातात, ज्यामुळे वजन वाढू शकतं.

एकाच वेळी जास्त प्यायल्यास धोका

कमी वेळेत जास्त दारू पिण्याला 'बिंज ड्रिंकिंग' म्हणतात. हे खूप धोकादायक आहे. यामुळे लिव्हरवर अचानक ताण येतो, हृदयाच्या समस्या उद्भवू शकतात आणि गंभीर परिस्थितीत जीवही जाऊ शकतो. आठवड्यातून एकदाच प्यायलात, पण एकाच वेळी जास्त प्यायल्यास शरीराचं संतुलन बिघडतं.

लिव्हर आणि किडनीवर परिणाम

दारू शरीरात गेल्यावर लिव्हर (यकृत) तिला विघटित करण्याचं काम करतं. तुम्ही वारंवार किंवा आठवड्यातून एकदा प्यायल्यासही लिव्हरवर ताण येतो. यामुळे भविष्यात 'फॅटी लिव्हर'सारख्या समस्या येऊ शकतात. दारूमुळे शरीरातील पाणी कमी होतं (डिहायड्रेशन), ज्यामुळे किडनीच्या कार्यावरही परिणाम होतो.

हृदय आणि झोपेवर परिणाम

दारू प्यायल्याने रक्तदाब (ब्लड प्रेशर) वाढू शकतो आणि हृदयाचे ठोके अनियमित होऊ शकतात. दारूसोबत धूम्रपान केल्यास हृदयाच्या आजारांचा धोका आणखी वाढतो. दारू प्यायल्यावर पटकन झोप लागल्यासारखं वाटलं, तरी ती शांत आणि गाढ नसते. त्यामुळे दुसऱ्या दिवशी थकवा आणि चिडचिड जाणवते.

कोणाला जास्त धोका आहे?

दारू प्रत्येकासाठीच धोकादायक असली तरी, काही लोकांनी तिला पूर्णपणे टाळायला हवं. यामध्ये गर्भवती महिला, लिव्हर किंवा हृदयाचे आजार असलेले रुग्ण, मानसिक आरोग्याच्या समस्या असलेले लोक, इतर औषधं घेणारे आणि पचनाच्या किंवा ॲसिडिटीच्या समस्या असलेले लोक यांचा समावेश आहे. यांच्यासाठी दारू अधिकच धोकादायक ठरू शकते.