Gardening Tips: दूध फाटलंय? मग त्याचे पाणी फेकून देऊ नका, झाडांसाठी असा करा वापर

Gardening Tips : दूध फाटले असल्यास ते फेकून देऊ नका. फाटलेल्या दुधाच्या पाण्यात कॅल्शियम आणि लॅक्टिक ॲसिड भरपूर प्रमाणात असते, जे झाडांची वाढीस पोषक असते तसेच मातीलाही पोषण देण्यास मदत करते. चला पाहूया याचा वापर कसा करायचा?

Gardening Tips : शहर असो वा ग्रामीण परिसर घराभोवती झाडे असावीत, असे प्रत्येकाला वाटते. शहरी भागात बाल्कनी किंवा टेरेसवर झाडे लावून ही हौस भागवली जाते. पण त्याचबरोबर या झाडांची तेवढी निगाही राखावी लागते. अनेकदा रासायनिक खतांचा वापर करण्याऐवजी घरगुती पदार्थांचाच वापर खत म्हणून केला जातो. चहा करून झाल्यानंतर त्याची पावडर फेकून न देता, ती वाळवून झाडांच्या मातीत मिसळली जाते. त्यामुळे झाडांची वाढ चांगली होते. दुधाच्या बाबतीत तसा वापर केला जातो. 

अनेकदा दूध फाटतं, ज्यातून तुम्ही पनीर तर बनवता, पण त्यानंतर खाली जमा होणारं पाणी फेकून देता का? तर हे पाणी फेकून देण्याऐवजी तुम्ही त्याचा वापर झाडांसाठी करू शकता. यामध्ये कॅल्शियम, प्रोटीन आणि लॅक्टिक ॲसिड असतं, जे झाडांच्या मातीला पोषण देतं, बुरशीजन्य समस्यांपासून वाचवतं आणि झाडांच्या वाढीसाठी खूप फायदेशीर ठरतं. चला, आज जाणून घेऊया की कोणत्या झाडांमध्ये आणि कशाप्रकारे तुम्ही फाटलेल्या दुधाच्या पाण्याचा वापर करू शकता.

फुलझाडांसाठी फाटलेल्या दुधाच्या पाण्याचा वापर करा

तुम्ही गुलाब, जास्वंद, झेंडू किंवा जाई यांसारख्या फुलझाडांमध्ये फाटलेल्या दुधाच्या पाण्याचा वापर करू शकता. हे पाणी साध्या पाण्यात मिसळून स्प्रे बाटलीत भरा आणि झाडांच्या मुळांवर फवारा. असे केल्याने मातीचा कस सुधारतो, फुले जास्त येतात आणि पानेही हिरवीगार राहतात.

भाजीपाल्याच्या झाडांसाठी फाटलेल्या दुधाच्या पाण्याचा वापर

जर तुम्ही घरी किचन गार्डन तयार केले असेल आणि त्यात टोमॅटो, मिरची, पालक, कोथिंबीर यांसारखी झाडे लावली असतील, तर त्यांना मजबूत करण्यासाठी तुम्ही फाटलेल्या दुधाचे पाणी थेट वापरू शकता. यामुळे झाडे मजबूत होतात आणि पानांची वाढ वेगाने होते.

इनडोअर प्लांट्ससाठी फाटलेल्या दुधाच्या पाण्याचा वापर

इनडोअर प्लांट्सना जास्त देखभालीची गरज असते, कारण त्यांना कमी सूर्यप्रकाश मिळतो. अशावेळी फाटलेल्या दुधाचे पाणी आणि साधे पाणी समप्रमाणात मिसळा. हे मिश्रण स्नेक प्लांट, पीस लिली, एरिका पाम यांसारख्या झाडांमध्ये घाला. असे केल्याने त्यांची पाने चमकदार राहतात आणि मातीला पोषण मिळते.

फाटलेल्या दुधाच्या पाण्याचा वापर कसा करावा?

फाटलेल्या दुधाचे पाणी थेट झाडांमध्ये घालू नका. त्यात एक भाग फाटलेल्या दुधाचे पाणी आणि दोन ते तीन भाग साधे पाणी मिसळा. १५ दिवसांतून किंवा महिन्यातून एकदा हे पाणी झाडांना घाला. जास्त प्रमाणात फाटलेल्या दुधाचे पाणी घातल्यास दुर्गंधी येऊ शकते आणि किडे लागू शकतात.