Hybrid SUVs: भारतात लवकरच दाखल होणार चार नव्या दमदार गाड्या, पाहा लिस्ट

भारतीय बाजारात हायब्रीड एसयूव्हींची मागणी वाढत आहे. या पार्श्वभूमीवर, 2026 पर्यंत भारतात दाखल होणाऱ्या चार नवीन मॉडेल्सची माहिती आम्ही तुम्हाला देणार आहोत. यामध्ये रेनो डस्टर हायब्रीड, मारुती-टोयोटाच्या 7-सीटर एसयूव्ही आणि होंडा ZR-V यांचा समावेश आहे. जाणून घेऊया त्यांची अपेक्षित वैशिष्ट्ये आणि लाँच डिटेल्स.

Hybrid SUVs: भारतीय बाजारात हायब्रीड गाड्यांची क्रेझ हळूहळू वाढतेय. पण रेनो, मारुती सुझुकी, टोयोटा, ह्युंदाई, किया आणि होंडा यांसारख्या कंपन्यांच्या नवीन गाड्या आल्यानंतर या सेगमेंटमध्ये मोठी वाढ दिसेल. 2026 पर्यंत किमान चार नवीन हायब्रीड एसयूव्ही शोरूममध्ये दाखल होण्याची शक्यता आहे.

रेनो डस्टर हायब्रीड (Renault Duster Hybrid)

रेनो डस्टर हायब्रीड 2026 च्या दुसऱ्या सहामाहीत (बहुतेक ऑक्टोबरपर्यंत) लाँच होईल, हे कंपनीने कन्फर्म केलंय. याच काळात मारुती सुझुकी आणि टोयोटा अनुक्रमे ग्रँड विटारा आणि हायरायडरची थ्री-रो (7-सीटर) व्हर्जन आणण्याच्या तयारीत आहेत. होंडा ZR-V भारतात कधी येणार याबाबत कोणतीही अधिकृत घोषणा झालेली नाही. पण, रिपोर्ट्सनुसार 2026 च्या अखेरीस ही हायब्रीड एसयूव्ही CBU (Completely Built Unit) म्हणून भारतात येऊ शकते. काही रिपोर्ट्समध्ये 2027 च्या सुरुवातीला लाँच होण्याची शक्यताही वर्तवली आहे. चला, या आगामी हायब्रीड एसयूव्हींची प्रमुख वैशिष्ट्ये पाहूया.

रेनो डस्टर हायब्रीडमध्ये 1.8-लिटर, चार-सिलेंडर नॅचरली एस्पिरेटेड पेट्रोल इंजिन, ड्युअल इलेक्ट्रिक मोटर्स आणि 1.4kWh लिथियम-आयन बॅटरी पॅक असेल, हे निश्चित झालंय. ही पॉवरफुल हायब्रीड सिस्टीम 160 PS पॉवर आणि 172 Nm टॉर्क निर्माण करेल. यामुळे ही तिच्या सेगमेंटमधील सर्वात शक्तिशाली हायब्रीड सिस्टीम बनेल. गाडीच्या डिझाइन आणि स्टायलिंगमध्ये फारसा बदल होणार नाही, फक्त हायब्रीड बॅजिंग दिसेल.

मारुती/टोयोटा 7-सीटर एसयूव्ही (Maruti/Toyota 7-Seater SUVs)

मारुती सुझुकीची आगामी प्रीमियम थ्री-रो एसयूव्ही ग्रँड विटारावर आधारित असेल. म्हणजेच, प्लॅटफॉर्म, इंजिन, फीचर्स आणि डिझाइनचे अनेक घटक सारखेच असतील. यामध्ये ग्रँड विटाराप्रमाणेच 1.5-लिटर ॲटकिन्सन सायकल पेट्रोल इंजिन असेल, जे 115.6 PS पॉवर निर्माण करते. या एसयूव्हीमध्ये eCVT ऑटोमॅटिक गिअरबॉक्स आणि FWD (फ्रंट-व्हील ड्राइव्ह) सिस्टीम मिळण्याची अपेक्षा आहे.

टोयोटा देखील मारुतीच्या या 7-सीटर एसयूव्हीचं रिबॅज व्हर्जन बाजारात आणू शकते, जे टोयोटा अर्बन क्रूझर हायरायडरवर आधारित असेल. या गाडीची डिझाइन लँग्वेज वेगळी असेल, पण इंजिन आणि फीचर्स सारखेच राहण्याची शक्यता आहे.

होंडा ZR-V (Honda ZR-V)

भारतात, होंडा ZR-V मध्ये 2.0-लिटर, चार-सिलेंडर हायब्रीड पॉवरट्रेन दिली जाण्याची शक्यता आहे, जी eCVT गिअरबॉक्सशी जोडलेली असेल. ही सिस्टीम एकत्रितपणे 180 bhp पॉवर आणि 240 Nm टॉर्क निर्माण करते. ZR-V ही इम्पोर्टेड गाडी (CBU) असल्याने, तिचे एक्सटीरियर आणि इंटीरियर ग्लोबल व्हर्जनसारखेच असेल. या एसयूव्हीमध्ये ड्युअल-टोन केबिन थीम, फ्री-स्टँडिंग टचस्क्रीन इन्फोटेनमेंट सिस्टीम, फुल डिजिटल इन्स्ट्रुमेंट क्लस्टर, वायरलेस चार्जिंग पॅड, सनरूफ, ड्युअल-झोन क्लायमेट कंट्रोल आणि ADAS सारखे फीचर्स मिळतील.