दसरा आणि दिवाळीच्या खरेदीसाठी बाजारात जाणाऱ्या ग्राहकांसाठी एक धक्कादायक बातमी आहे. १ ऑक्टोबरपासून एसी, स्मार्ट टीव्ही, वॉशिंग मशीन आणि फ्रिजच्या किमती ५ ते ८ टक्क्यांनी वाढवण्याचा निर्णय कंपन्यांनी घेतला आहे. पण या दरवाढीमागचं नेमकं कारण काय आहे?
दसरा आणि दिवाळी सण जवळ आले की आपण सगळेच घरात नवीन इलेक्ट्रॉनिक वस्तू आणि गृहपयोगी उपकरणे आणण्याची तयारी करतो. कंपन्यांच्या डिस्काउंट आणि बंपर ऑफर्सची आपण आतुरतेने वाट पाहत असतो. पण यावेळी ग्राहकांना मोठा धक्का बसणार आहे. १ ऑक्टोबरपासून एसी, एलईडी टीव्ही, वॉशिंग मशीन आणि फ्रिजच्या किमती ५ ते ८ टक्क्यांनी वाढवणार असल्याचे प्रमुख उत्पादक कंपन्यांनी स्पष्ट केले आहे.
26
सलग तिसऱ्यांदा दरवाढ.. कारणे काय?
कन्झ्युमर इलेक्ट्रॉनिक्स क्षेत्रात २०२६ या वर्षातील ही सलग तिसरी दरवाढ आहे. गेल्या काही महिन्यांपासून उत्पादन खर्च वाढत असला तरी कंपन्या स्वतः तो भार उचलत होत्या. पण आता नफ्याचे प्रमाण कमी होत असल्याने नाईलाजाने हा भार ग्राहकांवर टाकला जात आहे. मार्केटमधील सूत्रांनुसार, आंतरराष्ट्रीय बाजारात तांबे, स्टील, ॲल्युमिनियम आणि क्रूड ऑइलवर आधारित प्लास्टिकच्या किमती गगनाला भिडल्या आहेत. याशिवाय पश्चिम आशियातील राजकीय संकट, वाढता वाहतूक खर्च आणि रुपयाच्या मूल्यातील चढउतार यामुळे कंपन्यांचा खर्च वाढला आहे.
36
कोणत्या वस्तूवर किती दरवाढ?
एसी बनवण्यासाठी तांबे अत्यंत महत्त्वाचे असते. पूर्वी तांब्याची किंमत ८,००० ते ९,००० डॉलर प्रति मेट्रिक टन होती, ती आता थेट १४,५०० डॉलरवर पोहोचली आहे. त्यामुळे एसीच्या किमती ५ ते ८ टक्क्यांनी वाढतील. तर वॉशिंग मशीन, फ्रिज आणि एलईडी टीव्हीच्या किमती २ ते ४ टक्क्यांनी वाढतील. ब्लू स्टार, गोदरेज, हायर, डायकिन, सुपर प्लास्ट्रोनिक्स आणि व्होल्टास यांसारख्या मोठ्या ब्रँड्सनी दरवाढीला दुजोरा दिला आहे. एलजी, बॉश आणि पॅनासोनिक या कंपन्याही एसीच्या किमती ५ टक्क्यांपर्यंत वाढवण्याच्या विचारात आहेत.
या दरवाढीच्या संकटात ग्राहकांसाठी एक दिलासादायक बातमीही आहे. कंपन्यांनी नवीन किमती जाहीर केल्या असल्या तरी, डीलर्स आणि वितरकांकडे ऑगस्ट आणि सप्टेंबर महिन्यात खरेदी केलेला जुना स्टॉक मोठ्या प्रमाणावर उपलब्ध आहे.
साधारण महिना ते दीड महिना पुरेल एवढा जुना स्टॉक असल्याने, दिवाळी संपेपर्यंत ग्राहकांना जुन्याच किमतीत वस्तू खरेदी करण्याची संधी आहे. दिवाळी संपल्यानंतरच बाजारात नवीन किमती पूर्णपणे लागू होतील, असे मार्केटमधील सूत्रांनी सांगितले.
56
२०३० पर्यंत ३.२५ लाख कोटींची बाजारपेठ
एकीकडे किमती वाढत असल्या तरी, भारतीय कन्झ्युमर ड्युरेबल्स मार्केटचे भविष्य खूप आशादायी असल्याचे बोस्टन कन्सल्टिंग ग्रुप (BCG) आणि सीआयआय (CII) च्या अहवालात म्हटले आहे. २०३० पर्यंत ही बाजारपेठ ३ ते ३.२५ लाख कोटी रुपयांपर्यंत पोहोचेल असा अंदाज आहे. येत्या पाच वर्षांत भारत जगातील सर्वात वेगाने वाढणाऱ्या इलेक्ट्रॉनिक्स बाजारपेठांपैकी एक बनेल.
थोडक्यात सांगायचे तर, जर तुम्ही एसी, टीव्ही किंवा वॉशिंग मशीन घेण्याचा विचार करत असाल, तर डीलर्सकडे जुना स्टॉक असतानाच खरेदी करणे फायद्याचे ठरेल.
66
वाहनांच्या किमतीही वाढणार
केवळ गृहपयोगी वस्तूच नाही, तर ऑटोमोबाईल क्षेत्रातही दरवाढीची झळ बसत आहे. धातूंच्या किमती वाढल्यामुळे महिंद्रा अँड महिंद्रा कंपनी आपल्या स्पोर्ट्स युटिलिटी वाहनांच्या (SUV) किमती वाढवण्याच्या विचारात आहे. तसेच, टाटा मोटर्सही टप्प्याटप्प्याने गाड्यांच्या किमती वाढवणार असल्याचे टीएमपीव्हीने (TMPV) सांगितले आहे. कच्च्या तेलाच्या वाढत्या किमतींमुळे मारुती सुझुकीच्या गाड्याही महागणार आहेत. येत्या दोन आठवड्यांत यावर अधिक स्पष्टता येईल.
