E20 Fuel : जुन्या गाड्यांमध्ये E20 पेट्रोल वापरावं का ? तज्ज्ञांचं उत्तर

ऑटो इंडस्ट्रीतील तज्ज्ञांनी स्पष्ट केलंय की E20 पेट्रोल जुन्या गाड्यांसाठी पूर्णपणे सुरक्षित आहे. दीड कोटींहून अधिक नॉन-सर्टिफाइड गाड्यांमध्ये हे इंधन वापरूनही नुकसानीची एकही तक्रार आलेली नाही. या इंधनामुळे मायलेज थोडं कमी होऊ शकतं, पण गाडीचा परफॉर्मन्स सुधारतो आणि प्रदूषणही कमी होतं, असंही त्यांनी सांगितलं.

मुंबई : E20 पेट्रोलवरून सध्या बरीच चर्चा सुरू आहे. या पार्श्वभूमीवर, ऑटोमोबाइल आणि ऊर्जा क्षेत्रातील तज्ज्ञांनी स्पष्ट केलंय की, हे इंधन अनेक वर्षांच्या वैज्ञानिक संशोधनानंतर आणि कठोर चाचण्यांनंतरच बाजारात आणलं आहे. जागतिक ऊर्जा संकटाच्या काळात पंतप्रधान नरेंद्र मोदी यांनी जबाबदार इंधन वापराचं आवाहन केलं होतं, त्यानंतर या इथेनॉल-मिश्रित इंधनाचं धोरण लागू करण्यात आलं.

मारुती सुझुकी, टोयोटा, हीरो मोटोकॉर्प, टीव्हीएस मोटर, ह्युंदाई आणि बजाज ऑटो या कंपन्यांच्या प्रमुखांनी सांगितलं की E20 इंधनाचा वापर टप्प्याटप्प्याने, डेटाच्या आधारावर आणि जागतिक मानकांनुसारच सुरू करण्यात आला आहे.

जुन्या गाड्यांना कोणताही धोका नाही, इंडस्ट्रीचा डेटा काय सांगतो?

सगळ्यात मोठी चिंता ही होती की E20 पेट्रोलमुळे जुन्या, नॉन-E20-सर्टिफाइड गाड्यांचं नुकसान होतं का? यावर मारुती सुझुकीने खुलासा केला आहे. त्यांच्या माहितीनुसार, आर्थिक वर्ष 2025-26 मध्ये सर्व्हिसिंगसाठी आलेल्या 2.84 कोटी गाड्यांपैकी दीड कोटींहून अधिक गाड्या जुन्या होत्या. 

पण E20 पेट्रोलमुळे गाडीचा कोणताही पार्ट गंजल्याची किंवा खराब झाल्याची एकही तक्रार आलेली नाही. हीरो मोटोकॉर्पनेसुद्धा त्यांच्या सर्व्हिस डेटामधून हीच माहिती समोर आल्याचं सांगितलंय. त्यामुळे E20 इंधन सध्याच्या गाड्यांसाठी सुरक्षित असल्याची खात्री त्यांनी दिली आहे.

मायलेजवर किरकोळ परिणाम, पण परफॉर्मन्स उत्तम

तज्ज्ञांनी हे मान्य केलंय की E10 च्या तुलनेत E20 इंधनाची कॅलरीफिक व्हॅल्यू (ऊर्जा मूल्य) थोडी कमी आहे. त्यामुळे मायलेजमध्ये साधारणपणे 3 ते 3.5 टक्क्यांची घट होऊ शकते. उदाहरणार्थ, 20 किमी प्रति लिटर मायलेज देणाऱ्या गाडीचं मायलेज फक्त 0.6 किमी प्रति लिटरने कमी होऊ शकतं. पण याच्या बदल्यात गाडीचा परफॉर्मन्स सुधारतो. गाडीचं ॲक्सिलरेशन (पिक-अप) चांगलं होतं, अँटी-नॉकिंग परफॉर्मन्स सुधारतो आणि प्रदूषणही लक्षणीयरीत्या कमी होतं. गाडी चालवण्याची सवय, टायरमधील हवा आणि गाडीची देखभाल यांसारख्या गोष्टींचा मायलेजवर इंधनापेक्षा जास्त परिणाम होतो, असंही तज्ज्ञांनी नमूद केलं.

जागतिक मानकं, सुरक्षेची हमी आणि ग्राहकांसाठी सल्ला

इंडस्ट्रीतील तज्ज्ञांनी जोर देऊन सांगितलं की E20 इंधन BIS मानकांचं आणि BS-VI उत्सर्जन नियमांचं पालन करतं. याची चाचणी UNECE च्या आंतरराष्ट्रीय मानकांनुसार केली गेली आहे. त्यांनी ग्राहकांना एक इशाराही दिला आहे. 

जुन्या गाड्यांना E20-कंपॅटिबल बनवण्याचा दावा करणाऱ्या अनधिकृत रेट्रोफिटमेंट किट्सपासून लांब राहा, कारण असं कोणतंही अधिकृत सोल्युशन बाजारात उपलब्ध नाही. चर्चेच्या शेवटी, सर्वांनी एकमताने सांगितलं की E20 हे एक सुरक्षित, कार्यक्षम आणि पर्यावरणपूरक इंधन आहे, जे आता भारतभर सहज उपलब्ध आहे.