Air India Viral Video : विमानात मद्यधुंद प्रवाशाने सहप्रवाशांवर केली लघवी; पाहा व्हिडिओ

दिल्लीहून बँकॉकला जाणाऱ्या एअर इंडियाच्या विमानाच्या बिझनेस क्लासमध्ये एका मद्यधुंद प्रवाशाने सहप्रवाशांवर लघवी केल्याचा आरोप आहे. शिवम राघवने ही घटना उघडकीस आणली असून, या घटनेवर एअर इंडियाने केलेल्या कारवाईवर त्याने प्रश्नचिन्ह उपस्थित केले आहे. 

गेल्या काही दिवसात विमानातील वादाच्या वेगवेगळ्या घटना तुम्ही वाचल्या असतील. मात्र, यातच आता आणखी एक अत्यंत धक्कादायक घटना समोर आली आहे. या घटनेची सर्वत्र चर्चा आहे. नेमकं काय आहे हे प्रकरण जाणून घेऊयात. 

दिल्लीहून बँकॉकला जाणाऱ्या एअर इंडियाच्या विमानात बिझनेस क्लास केबिनमध्ये एका प्रवाशाने सहप्रवाशांवर लघवी केल्याच्या आरोपानंतर विमानात तणाव निर्माण झाला. एका मद्यधुंद मध्यमवयीन व्यक्तीने विमानात हे कृत्य केल्याचे रिपोर्ट्समध्ये म्हटले आहे. २३ वर्षीय कंटेंट क्रिएटर शिवम राघवने आपल्या इंस्टाग्राम पोस्टद्वारे या घटनेची माहिती दिली. ही घटना बिझनेस क्लास केबिनमध्ये घडल्याचे रिपोर्ट्समध्ये म्हटले आहे.

सर्वात वाईट अनुभव -

'माझ्या आयुष्यातील सर्वात वाईट विमान प्रवासाच्या अनुभवांपैकी एक' असे कॅप्शन देत शिवमने आपला व्हिडिओ शेअर केला आहे. शिवमने म्हटले की, तो नियमितपणे दिल्ली-बँकॉक मार्गावर प्रवास करतो आणि त्याला आवडणाऱ्या थाई एअरवेजच्या तुलनेत एअर इंडियाच्या बिझनेस क्लासमधून प्रवास करण्याचा निर्णय घेतला. परदेशात एकटा राहणारा २३ वर्षीय सोलो ट्रॅव्हलर असल्याचे सांगत शिवमने हा आपल्या आयुष्यातील सर्वात वाईट विमान प्रवासाचा अनुभव असल्याचे म्हटले आहे. तसेच, ही घटना ज्या पद्धतीने हाताळली गेली त्यामुळे तो खूप अस्वस्थ झाला आहे, असेही त्याने सांगितले.

बिझनेस क्लासमध्ये लघवी -

शिवमने आरोप केला आहे की, मद्यधुंद प्रवाशाने बिझनेस क्लास केबिनमध्ये कपडे काढून इतर प्रवाशांवर लघवी केली. दरम्यान, लँडिंगनंतर तो व्यक्ती काहीही न झाल्यासारखा आरामात निघून गेला, हे पाहून मला धक्का बसला, असे तो म्हणाला. एका एकेरी प्रवासासाठी प्रवासी सुमारे $1,000 (₹80,000) खर्च करतात, त्यानंतर अशा घटना अशाप्रकारे हाताळल्या जातात का? असा प्रश्न त्याने आपल्या व्हिडिओमध्ये विचारला आहे.

त्यावेळी बिझनेस क्लास केबिनमध्ये महिला प्रवासी नव्हत्या. जर एखाद्या महिलेला एकट्याने प्रवास करताना असा अनुभव आला, तर तिला पुन्हा सुरक्षित कसे वाटेल? असा सवालही त्याने केला आहे. ही घटना हाताळण्याची पद्धत योग्य आहे का? असे विचारत त्याने एअर इंडियाच्या अधिकृत अकाउंटला व्हिडिओ टॅग केला आहे. व्हिडिओमध्ये एक प्रवासी केबिन क्रूला या घटनेबद्दल विचारताना आणि शिवम घटनेचे वर्णन करताना दिसत आहे. त्याने विमानाच्या संपूर्ण फरशीवर लघवी केली, असा आरोप शिवम करतो.

कारवाईची मागणी -

हा व्हिडिओ दहा लाखांहून अधिक लोकांनी पाहिला आहे. अनेकांनी यावर तीव्र प्रतिक्रिया दिल्या आहेत. कडक कारवाईची मागणी अनेकांनी केली आहे. एका युझरने म्हटले की, विशेषतः भारतीयांसाठी विमानात दारूवर बंदी घालावी. तर दुसऱ्याने लिहिले की, जास्त पैसे असणारे बिझनेस क्लासमध्ये प्रवास करतात, पण याचा अर्थ त्यांच्यात नागरिकत्वाची जाणीव आहे असे नाही. दरम्यान, हा व्हिडिओ इतका व्हायरल होऊनही एअर इंडियाने अद्याप या घटनेवर कोणतेही अधिकृत निवेदन जारी केलेले नाही, असेही रिपोर्टमध्ये म्हटले आहे.