Phone Charger : फोन काढला, पण चार्जर तसाच प्लगमध्ये आहे? तरीही वीज खर्च होते का?
चार्जरचा वीजवापर: तुम्ही फोन चार्जिंगवरून काढता, पण चार्जर तसाच स्विचमध्ये चालू ठेवता का? जर हो, तर तुम्हाला माहितीये का की तो चार्जर तरीही थोडीफार वीज वापरत असतो?
मोबाईल पूर्ण चार्ज झाल्यावर आपण फक्त केबल काढतो आणि चार्जर तसाच स्विचमध्ये चालू ठेवतो. अनेक घरांमध्ये हे सर्रास घडतं. विशेषतः बेडरूम, हॉल किंवा किचनमध्ये चार्जर नेहमी प्लगला लावलेलेच असतात.
पण फोन जोडलेला नसतानाही चार्जर वीज ओढतो का? यामुळे महिन्याच्या वीज बिलात मोठा फरक पडतो का? आणि सर्वात महत्त्वाचं म्हणजे, असं करणं सुरक्षित आहे का?
यात काही महत्त्वाच्या गोष्टी लक्षात घेणं गरजेचं आहे.
फोन नसतानाही चार्जर वीज वापरतो का?
होय! चार्जर स्विचमध्ये चालू असेल आणि त्याला मोबाईल जोडलेला नसेल, तरीही तो थोड्या प्रमाणात वीज वापरण्याची शक्यता असते.
तांत्रिक भाषेत याला 'स्टँडबाय पॉवर' (Standby Power) किंवा 'नो-लोड पॉवर कन्झम्पशन' (No-load Power Consumption) म्हणतात.
चार्जरमधील सर्किट्स जेव्हा वीज जोडणीत असतात, तेव्हा ते अगदी कमी प्रमाणात वीज वापरतात. त्यामुळे फोन जोडलेला नसतानाही विजेचा वापर पूर्णपणे शून्य नसतो.
पण, आजकालचे आधुनिक चार्जर विजेचा अपव्यय कमी करण्याच्या उद्देशाने बनवले जातात. त्यामुळे जुन्या आणि नव्या चार्जरचा वीजवापर सारखाच असेल असं नाही.