Dhurandhar 2 Collection: 'धुरंधर २'चा बॉक्स ऑफिसवर धुमाकूळ, २४ तासांत १०० कोटींचा गल्ला पार!

Collection रणवीर सिंहच्या 'धुरंधर २' ने रिलीज होताच बॉक्स ऑफिसवर धुमाकूळ घातला आहे. सिनेमाने २४ तासांच्या आत १०० कोटींपेक्षा जास्त कमाई केली आहे. पेड प्रिव्ह्यूमधून ४४ कोटी आणि ओपनिंग डेला ६५-७० कोटी कमावून हा सिनेमा २०२६ मधला सर्वात मोठा ओपनर ठरला आहे.

Dhurandhar 2 First Day Collection: रणवीर सिंहचा 'धुरंधर: द रिव्हेंज' हा सिनेमा बॉक्स ऑफिसवर अक्षरशः धुमाकूळ घालतोय. सिनेमाने पहिल्याच दिवशी १०० कोटींपेक्षा जास्त कमाई करून सगळे रेकॉर्ड मोडले आहेत. या सिनेमात रणवीर सिंह पुन्हा एकदा जसकीरत सिंग रंगी उर्फ हमजा अली मझारीच्या भूमिकेत दिसतोय. त्याच्यासोबतच आर. माधवन, अर्जुन रामपाल आणि संजय दत्त यांसारखे मोठे कलाकारही या स्पाय थ्रिलरमध्ये महत्त्वाच्या भूमिकेत आहेत.

'धुरंधर २'ने पहिल्याच दिवशी ओलांडला १०० कोटींचा टप्पा

'धुरंधर २' बुधवारी पेड प्रिव्ह्यूने सुरू झाला आणि गुरुवारी, १९ मार्चला तो मोठ्या स्तरावर रिलीज झाला. मीडिया रिपोर्ट्सनुसार, सिनेमाने ओपनिंग डेला जवळपास ६५ ते ७० कोटी रुपयांची कमाई केली आहे. तर बुधवारी झालेल्या पेड प्रिव्ह्यूमधून सिनेमाने तब्बल ४४ कोटी रुपये कमावले होते. म्हणजेच, रिलीजच्या २४ तासांच्या आतच या सिनेमाने १०० कोटींचा टप्पा ओलांडला आहे.

ॲडव्हान्स बुकिंगमध्येही नवा विक्रम

या सिनेमाची ॲडव्हान्स बुकिंग याच आठवड्यात सुरू झाली, पण पेड प्रिव्ह्यूची प्री-सेल तर ट्रेलर रिलीजसोबतच म्हणजे जवळपास २ आठवड्यांपूर्वीच सुरू झाली होती. विशेष म्हणजे, फक्त ॲडव्हान्स बुकिंगमधूनच या सिनेमाने जगभरात बॉलिवूडच्या सर्वात मोठ्या ओपनिंगचा रेकॉर्ड केला आहे. ॲडव्हान्स बुकिंगमधून सिनेमाने सुमारे ४० कोटी रुपयांचा गल्ला जमवला. पहिल्या दिवसासाठी या सिनेमाची तब्बल ९.५० लाखांपेक्षा जास्त तिकीटं विकली गेली.

बॉलिवूडचा सर्वात मोठा प्रीमियर असलेला सिनेमा

जवळपास १०,००० शोजसह 'धुरंधर २' बॉलिवूडच्या इतिहासातील सर्वात मोठ्या प्रीमियरपैकी एक ठरला आहे. रिलीज होण्याआधीच सिनेमाने अनेक बॉक्स ऑफिस रेकॉर्ड मोडले आहेत. या सिनेमाच्या पहिल्या भागाने ५ डिसेंबर २०२५ रोजी रिलीज होऊन जगभरातून सुमारे १३०० कोटी रुपयांची कमाई केली होती. याच यशामुळे गेल्या तीन महिन्यांपासून याच्या सीक्वेलबद्दल प्रेक्षकांमध्ये प्रचंड उत्सुकता होती.

२०२६ मधला सर्वात मोठा ओपनर

'धुरंधर २' च्या ओपनिंग डे कलेक्शनबद्दल बोलायचं झालं, तर रात्री उशिरापर्यंत हा आकडा ६५ ते ७० कोटी रुपयांच्या घरात जाण्याची शक्यता आहे. २०२६ मध्ये पहिल्याच दिवशी बॉक्स ऑफिसवर एवढी मोठी कमाई करणारा हा पहिलाच सिनेमा आहे. याआधी सनी देओलच्या 'बॉर्डर २' ने ओपनिंग डेला जवळपास ३० कोटी रुपये कमावले होते.

स्टारकास्ट आणि निर्मिती

या सिनेमाची निर्मिती जियो स्टुडिओज आणि B62 स्टुडिओज यांनी केली आहे. याशिवाय राकेश बेदी, दानिश पंडोर आणि सारा अर्जुन हे कलाकारही महत्त्वाच्या भूमिकेत आहेत. सिनेमात यामी गौतमचा एक कॅमिओसुद्धा पाहायला मिळणार आहे. या सिनेमाचं दिग्दर्शन यामी गौतमचे पती आदित्य धर यांनी केलं आहे.