Dhamaal 4: अजय-अक्षयमध्ये झाली डील, 'धमाल 4'ची रिलीज डेट बदलली!

Dhamaal अजय देवगणच्या 'धमाल 4' या कॉमेडी फिल्मची चाहते आतुरतेने वाट पाहत आहेत. पण त्यांच्यासाठी एक वाईट बातमी आहे. हा चित्रपट आता ठरलेल्या तारखेला रिलीज होणार नाही. रिपोर्ट्सनुसार, हा चित्रपट पुढे ढकलण्यात आला असून त्याची नवीन रिलीज डेटही समोर आली आहे.

बॉलिवूडच्या 2026 च्या रिलीज कॅलेंडरमध्ये एक मोठा बदल झाला आहे. अजय देवगणचा कॉमेडी चित्रपट 'धमाल 4' ची रिलीज डेट पुढे ढकलण्यात आली आहे. अक्षय कुमारच्या 'वेलकम टू द जंगल' या मल्टीस्टारर कॉमेडी चित्रपटासोबत होणारी टक्कर टाळण्यासाठी हा निर्णय घेण्यात आला आहे.

ट्रेड रिपोर्ट्सनुसार, अजय देवगण आणि अक्षय कुमार यांच्यात झालेल्या चर्चेनंतर हा निर्णय झाला. दोन्ही मोठ्या कॉमेडी चित्रपटांनी एकमेकांच्या व्यवसायाचं नुकसान करू नये, असं दोन्ही कलाकारांना वाटत होतं. आता दोन्ही चित्रपटांना थिएटरमध्ये वेगवेगळी स्पेस मिळेल, ज्यामुळे बॉक्स ऑफिस कलेक्शनला फायदा होण्याची शक्यता आहे.

'धमाल 4' ची नवीन रिलीज डेट

आधी 'धमाल 4' हा चित्रपट 3 जुलै 2026 रोजी रिलीज होणार होता. पण आता हा चित्रपट 17 जुलै 2026 रोजी सिनेमागृहात दाखल होईल. 'बॉलिवूड हंगामा'च्या रिपोर्टनुसार, 'वेलकम टू द जंगल'च्या कमाईवर परिणाम होऊ नये म्हणून हा निर्णय घेण्यात आला. रिपोर्टमध्ये सूत्रांच्या हवाल्याने म्हटलं आहे की, अजय देवगण आणि अक्षय कुमार यांनी आपापसात बोलून हा तोडगा काढला आहे. एकाच आठवड्यात दोन मोठे मल्टीस्टारर कॉमेडी चित्रपट रिलीज झाले, तर त्याचा परिणाम दोन्ही चित्रपटांच्या बॉक्स ऑफिस कलेक्शनवर होईल, असं दोघांचंही मत होतं. त्यामुळे, त्यांनी सामंजस्याने रिलीज डेट बदलण्याचा निर्णय घेतला.

'वेलकम टू द जंगल'मध्ये मोठी स्टारकास्ट

'वेलकम टू द जंगल' या चित्रपटाचं दिग्दर्शन अहमद खान करत आहेत. 26 जून 2026 रोजी रिलीज होणाऱ्या या चित्रपटात अक्षय कुमारसोबत सुनील शेट्टी, जॅकी श्रॉफ, रवीना टंडन, दिशा पाटनी, जॅकलीन फर्नांडिस, अर्शद वारसी, परेश रावल, जॉनी लिव्हर, लारा दत्ता, श्रेयस तळपदे आणि तुषार कपूर असे अनेक कलाकार दिसणार आहेत.

'धमाल 4' मध्ये जुने चेहरे परतणार

इंद्र कुमार यांच्या दिग्दर्शनाखाली बनलेल्या 'धमाल 4' मध्ये अजय देवगणसोबत रितेश देशमुख, अर्शद वारसी, संजय मिश्रा आणि जावेद जाफरी हे कलाकार दिसणार आहेत. या चित्रपटात संजीदा शेख, ईशा गुप्ता, अंजली आनंद, उपेंद्र लिमये आणि रवी किशन यांच्याही भूमिका आहेत.