Multi Planter: जागा कमी, झाडं जास्त! घरात लावा हे 7 स्टायलिश स्टँड्स, बघा कमाल

garden tips  तुमच्या घरात झाडं लावायला जागा कमी आहे का? मग मल्टी-प्लांटर डिझाइन तुमच्यासाठीच आहेत. हे स्टँड्स केवळ जागाच वाचवत नाहीत, तर तुमच्या घराला एक स्टायलिश आणि ग्रीन लुकही देतात. थोड्याशा प्लॅनिंगने तुम्ही घरातल्या लहानशा कोपऱ्यालाही एका सुंदर मिनी गार्डनमध्ये बदलू शकता.

घरात हिरवळ असली की कसं प्रसन्न वाटतं, नाही का? पण अनेकांना झाडं लावण्याचा शौक असूनही, जागा कमी असल्यामुळे तो पूर्ण करता येत नाही. विशेषतः फ्लॅट, लहान बाल्कनी किंवा कॉम्पॅक्ट घरांमध्ये झाडं कुठे ठेवावी, हा मोठा प्रश्न असतो. अशावेळी मल्टी-प्लांटर डिझाइन एक स्मार्ट आणि स्टायलिश उपाय ठरू शकतो. या प्लांटर्समुळे कमी जागेत जास्त झाडं लावता येतात आणि घराला एक मॉडर्न व सुंदर लुकही मिळतो. जर तुम्हालाही कमी जागेत एक मिनी गार्डन तयार करायचं असेल, तर हे 7 मल्टी-प्लांटर डिझाइन तुमच्या नक्की कामी येतील.

टियर स्टँड प्लांटर (Tier Stand Planter)

तुमच्या बाल्कनीत किंवा घरातल्या एखाद्या कोपऱ्यात थोडी जागा असेल, तर टियर स्टँड प्लांटर हा एक उत्तम पर्याय आहे. यामध्ये २, ३ किंवा ५ लेव्हल्सचे स्टँड मिळतात, ज्यावर तुम्ही अनेक कुंड्या एकत्र ठेवू शकता. यामुळे कमी जागेत जास्त झाडं लावणं सोपं होतं आणि ती दिसायलाही नीटनेटकी वाटतात. हे डिझाइन विशेषतः लहान फुलझाडं आणि हर्ब्ससाठी खूप चांगलं आहे.

व्हर्टिकल वॉल प्लांटर (Vertical Wall Planter)

कमी जागा असलेल्या घरांसाठी व्हर्टिकल प्लांटर ही सर्वात भारी आयडिया मानली जाते. यामध्ये भिंतीवर अनेक छोटे पॉकेट्स किंवा स्टँड लावलेले असतात, जिथे वेगवेगळी झाडं लावता येतात. यामुळे जमिनीवरची जागा वाचते आणि रिकामी भिंतही सुंदर दिसायला लागते. मनी प्लांट, फर्न आणि लहान इनडोअर झाडांसाठी हे डिझाइन परफेक्ट आहे.

लॅडर प्लांटर डिझाइन (Ladder Planter Design)

एखादी जुनी लाकडी किंवा लोखंडी शिडी असेल, तर तिचाही तुम्ही मल्टी-प्लांटर म्हणून मस्त वापर करू शकता. शिडीच्या प्रत्येक पायरीवर लहान कुंड्या ठेवून तुम्ही एक सुंदर लॅडर प्लांटर तयार करू शकता. हे डिझाइन बाल्कनी, टेरेस किंवा लिव्हिंग रूमच्या कोपऱ्यात खूप स्टायलिश दिसतं आणि कमी जागेत अनेक झाडं ठेवण्याची सोय होते.

हँगिंग मल्टी-प्लांटर (Hanging Multi Planter)

जर तुमच्या घरात जमिनीवर जागा कमी असेल, तर हँगिंग प्लांटर डिझाइन ट्राय करा. यामध्ये वेगवेगळ्या उंचीवर अनेक लहान कुंड्या लटकवल्या जातात. बाल्कनी आणि खिडकीजवळच्या जागेसाठी हा एक शानदार पर्याय आहे. यामुळे घराला एखाद्या कॅफेसारखा मॉडर्न आणि लक्झरी लुकही मिळतो.

स्टॅक्ड प्लांटर डिझाइन (Stacked Planter Design)

स्टॅक्ड प्लांटर म्हणजे एकावर एक ठेवलेल्या कुंड्या. हा प्रकार सध्या खूप ट्रेंडमध्ये आहे. यात एकाच जागी अनेक झाडं लावता येतात आणि ते दिसायलाही खूप युनिक वाटतात. स्ट्रॉबेरी, तुळस, पुदिना किंवा लहान शोभेच्या झाडांसाठी हे डिझाइन उत्तम आहे.

रेलिंग प्लांटर डिझाइन (Railing Planter Design)

तुमच्या घरात छोटी बाल्कनी असेल, तर तिच्या रेलिंगचा वापर करा. रेलिंग प्लांटर बाल्कनीच्या ग्रीलवर सहजपणे फिट होतात आणि जागाही अडवत नाहीत. यामध्ये लहान फुलझाडं किंवा हर्ब्स लावल्यास बाल्कनी एकदम फ्रेश आणि सुंदर दिसू लागते.

मॉड्यूलर मल्टी-प्लांटर (Modular Multi Planter)

ज्यांना थोडा मॉडर्न आणि एस्थेटिक लुक हवा आहे, ते मॉड्यूलर प्लांटर डिझाइन ट्राय करू शकतात. यामध्ये अनेक छोटे कंटेनर एकत्र जोडलेले असतात, जे तुम्ही तुमच्या गरजेनुसार आणि जागेनुसार कमी-जास्त करू शकता. हे डिझाइन इनडोअर जागेत खूपच सुंदर दिसतं.