Hair Oil Hacks: एक्सपायर झालेलं तेल फेकून देताय? थांबा! घरातल्या 'या' कामांसाठी भारी उपयोगी आहे

घरात पडलेलं एक्सपायर झालेलं केसांचं तेल फेकून देण्याआधी त्याचे हे स्मार्ट उपयोग जाणून घ्या. दरवाजांची कुरकुर कमी करणे, लेदरच्या वस्तू चमकवणे, स्टीलची साफसफाई, लाकडी फर्निचर आणि गंजलेल्या हत्यारांची काळजी घेण्यासाठी याचा वापर करता येतो.

आपल्या घरात अनेकदा केसांचं तेल एक्सपायर होतं आणि आपण ते निरुपयोगी समजून सरळ कचऱ्यात फेकून देतो. एक्सपायर झालेलं तेल केसांना लावणं योग्य नसलं तरी, त्याचा वापर अनेक घरगुती कामांसाठी केला जाऊ शकतो. यामुळे वस्तू वाया तर जाणार नाहीतच, पण घरातली छोटी-मोठी कामंही सहज होतील. दरवाजांच्या आवाजापासून ते लेदरच्या वस्तूंची चमक वाढवण्यापर्यंत, एक्सपायर झालेलं तेल खूप कामी येऊ शकतं. चला, जाणून घेऊया याचे ५ सोपे आणि उपयोगी रियूज आयडिया.

दरवाजे आणि खिडक्यांची कुरकुर थांबवा

तुमच्या घरातले दरवाजे, खिडक्या किंवा कपाट उघडताना करकर असा आवाज करत असतील, तर एक्सपायर झालेलं तेल तुमच्या कामी येऊ शकतं. कापसाच्या बोळ्यावर किंवा फडक्यावर थोडं तेल घ्या आणि दरवाजाच्या बिजागऱ्यांवर किंवा जॉइंट्सवर लावा. यामुळे घर्षण कमी होऊन तो आवाज कमी होऊ शकतो. हीच पद्धत तुम्ही जुन्या फर्निचरसाठीही वापरू शकता.

लेदरच्या बॅग आणि बेल्टला नवी चमक द्या

एक्सपायर झालेल्या तेलाचा वापर लेदरची बॅग, बेल्ट, पाकीट किंवा शूज चमकवण्यासाठीही करता येतो. मऊ फडक्यावर तेलाचे काही थेंब घेऊन हलक्या हातांनी पॉलिश करा. यामुळे लेदरचा पृष्ठभाग ओलसर राहतो आणि वस्तू अधिक स्वच्छ व चमकदार दिसू शकतात. पण लक्षात ठेवा, वापरण्यापूर्वी आधी एखाद्या लहान भागावर नक्की टेस्ट करून घ्या.

स्टील आणि क्रोम फिनिशच्या वस्तूंची सफाई करा

स्वयंपाकघरातील स्टीलचे नळ, हँडल किंवा क्रोम फिनिशच्या वस्तूंवर अनेकदा पाण्याचे डाग आणि हलके ओरखडे दिसू लागतात. अशावेळी, एक्सपायर झालेल्या तेलाचे काही थेंब मायक्रोफायबर कापडावर घेऊन साफसफाई करता येते. यामुळे पृष्ठभागावर चमक येऊ शकते आणि डाग कमी दिसू शकतात.

लाकडी फर्निचरला द्या नवा लुक

लाकडी टेबल, स्टूल, ड्रॉवर किंवा शोभेच्या वस्तू काही काळानंतर कोरड्या आणि निस्तेज दिसू लागतात. अशावेळी, एक्सपायर झालेल्या तेलाचे अगदी कमी थेंब फडक्यावर घेऊन पृष्ठभाग पुसून काढता येतो. यामुळे लाकडाची फिनिशिंग थोडी चांगली दिसू शकते. मात्र, जास्त तेल लावल्यास त्यावर धूळ चिकटू शकते, त्यामुळे मर्यादित प्रमाणातच वापरा.

गंज लागलेल्या हत्यारं आणि धातूच्या वस्तूंवर वापरा

घरात ठेवलेली कात्री, स्क्रू ड्रायव्हर, पक्कड किंवा बागकामाची छोटी हत्यारं यांना गंज लागायला सुरुवात झाली असेल, तर त्यावर एक्सपायर झालेल्या तेलाचा एक हलका थर लावता येतो. यामुळे ओलाव्याचा परिणाम काही प्रमाणात कमी होण्यास मदत होते आणि हत्यारांची हालचालही अधिक स्मूद होऊ शकते.