Cooking Tips: घरात तळण झाल्यानंतर तेल फेकून देता? तर थांबा, असा करा पुनर्वापर...

Cooking Tips:  डीप फ्राय केल्यानंतर उरलेलं तेल पुन्हा स्वयंपाकासाठी वापरणं अनेकांना आवडत नाही. त्यामुळे ते तेल फेकून दिलं जातं. पण, हे तेल फेकून न देता अनेक प्रकारे वापरता येतं. त्याचा योग्य वापर कसा करायचा? चला जाणून घेऊयात 

डीप फ्राय तेल

तेलात डीप फ्राय केलेले पदार्थ आरोग्यासाठी चांगले नसतात. हे सर्वांनाच माहीत आहे. पण रोज नाही तरी अधूनमधून, आठवड्यातून एकदा किंवा सणासुदीच्या दिवशी घरात पुऱ्या, वडे, भजी असे पदार्थ बनवले जातात. हे पदार्थ तळल्यानंतर उरलेलं तेल पुन्हा स्वयंपाकासाठी वापरणं अनेकांना आवडत नाही. तसं करणं आरोग्यासाठीही चांगलं नाही. त्यामुळे ते तेल फेकून दिलं जातं. पण, आता डीप फ्राय केल्यानंतर उरलेलं तेल फेकून देऊ नका. कारण, ते तेल अनेक प्रकारे वापरता येतं. ते कसं ते जाणून घेऊया...

घरात कीटक येणार नाहीत..

पुऱ्या, भजी तळल्यानंतर तेलाच्या तळाशी खर साचतो. म्हणजेच, तळलेल्या पदार्थांचे काही कण तेलाच्या तळाशी जमा होतात. त्यामुळे बरेच लोक हे तेल पुन्हा वापरायला टाळतात. पण, हे तेल तुम्ही घरातून कीटकांना दूर ठेवण्यासाठी वापरू शकता. तेल गाळून दुसऱ्या भांड्यात घ्या. नंतर त्यात लवंगा आणि लिंबाचे तुकडे टाका. त्यात दिव्याची वात टाकून तो दिवा लावा. असं केल्याने घरात डास आणि कीटक येत नाहीत.

लोखंडी वस्तू स्वच्छ करता येतात..

घरातील लोखंडी वस्तू जास्त काळ टिकाव्यात यासाठीही आपण हे तेल वापरू शकतो. तेल गाळून स्प्रे बॉटलमध्ये भरा. नंतर लोखंडी वस्तूंवर स्प्रे करून ब्रशने घासा. त्यानंतर एका जुन्या कापडाने पुसून घ्या, त्या वस्तू पुन्हा नव्यासारख्या दिसतील.

झाडांना किडीपासून दूर ठेवण्याचे मार्ग

झाडांवरील कीड घालवण्यासाठी तुम्ही उरलेलं तेल वापरू शकता. तेल एका प्लास्टिकच्या डब्यात ओतून झाडांजवळ ठेवा. त्याच्या वासाने कीटक झाडांपासून दूर राहतील. यासोबतच, तुम्ही तेलात लवंग आणि कापूर मिसळून ज्या ठिकाणी कीटक आहेत तिथे स्प्रे करू शकता.