Car Market: किमतीत मोठा ट्विस्ट! या कंपनीच्या SUVची किंमत तब्बल लाखांनी झाली कमी
सार
Car Market : Mercedes-Benz ने भारतात Maybach GLS या गाडीची किंमत ४२ लाख रुपयांनी कमी केली आहे. भारतात असेंब्ली सुरू झाल्यामुळे, तिची किंमत आता २.७५ कोटी रुपये झाली आहे. मात्र, कारच्या फीचर्स किंवा इंजिनमध्ये कोणताही बदल केलेला नाही.
Car Market : नव्या वर्षाच्या सुरुवातीलाच काही बड्या कार उत्पादक कंपन्यांनकडून आपल्या ग्राहकांना सवलतींची भेट देण्यात येत आहेत. काही कंपन्यांनी एखाद्या मॉडेलचे अपग्रेडेशन केल्यानंतर सध्या उपलब्ध असलेला स्टॉक क्लीअर करण्याच्या उद्देशाने ग्राहकांना सवलत दिली आहे. तर, जीएसटीत झालेल्या कपातीमुळे काही गाड्यांच्या किमती कमी झाल्या आहेत. ऑटोमोबाईल इंडस्ट्री विस्तारत असल्याचे लक्षात घेऊन ग्राहकांना आपल्याकडे आकर्षित करण्यासाठी काही कंपन्यांनी सूट जाहीर केली आहे.
मर्सिडीज-बेंझ इंडियाच्या Maybach GLS ची किंमत आता ४२ लाख रुपयांनी कमी झाली आहे. पूर्वी ३.१७ कोटी रुपयांना विकली जाणारी ही सुपर-लक्झरी SUV आता २.७५ कोटी रुपये एक्स-शोरूम किमतीत उपलब्ध आहे. विशेष म्हणजे, किंमत कमी होऊनही कारची फीचर्स, इंजिन किंवा लक्झरी दर्जामध्ये कोणताही बदल करण्यात आलेला नाही.
किंमत कशी कमी झाली?
भारतात असेंब्ली सुरू झाल्यामुळे आयात शुल्क कमी झाले आहे. लॉजिस्टिक्सचा खर्चही कमी झाल्याने थेट किमतीत ४२ लाख रुपयांची घट झाली आहे. अमेरिकेनंतर, स्थानिक पातळीवर Maybach GLS तयार करणारा भारत हा पहिला देश आहे. स्थानिक उत्पादनाची सुरुवात करताना, मर्सिडीज-बेंझने ४.१० कोटी रुपये किमतीची Maybach GLS सेलिब्रेशन एडिशन देखील लॉन्च केली आहे. २०२१ पासून भारतात Maybach GLS ला असलेल्या जोरदार मागणीचा सन्मान करण्यासाठी हे लिमिटेड एडिशन मॉडेल सादर करण्यात आले आहे.
स्थानिक असेंब्ली असूनही, इंजिन आणि परफॉर्मन्समध्ये कोणताही मोठा बदल झालेला नाही. Maybach GLS 600 मध्ये 4.0-लिटर ट्विन-टर्बो V8 पेट्रोल इंजिन आहे, जे 48-व्होल्ट माईल्ड-हायब्रीड सिस्टमसह येते. हे इंजिन 550 bhp (अतिरिक्त 22 bhp) आणि 250 Nm टॉर्क निर्माण करते. हे 9-स्पीड ऑटोमॅटिक गिअरबॉक्स आणि ऑल-व्हील ड्राइव्हसह जोडलेले आहे.
ही SUV फक्त ४.९ सेकंदात शून्य ते १०० किमी प्रतितास वेग गाठते आणि तिचा कमाल वेग २५० किमी प्रतितास आहे. Maybach GLS चे इंटीरियर हे त्याचे वैशिष्ट्य आहे. यात दोन १२.३-इंचाच्या मोठ्या स्क्रीन, फोर-झोन क्लायमेट कंट्रोल, व्हेंटिलेटेड सीट्स, इलेक्ट्रिक सनब्लाइंड्स, मागील बाजूस विशेष एंटरटेनमेंट स्क्रीन, मसाज फंक्शन, रिक्लाइनिंग सीट्स आणि १३-स्पीकर Burmester सराउंड साउंड सिस्टम यांचा समावेश आहे.
२०२४ च्या फेसलिफ्टनंतर, यात नवीन क्रोम-हेवी फ्रंट ग्रिल, अपडेटेड LED लाइट्स आणि २२-इंच अलॉय व्हील्स (२३-इंच पर्यायी) मिळतात. सस्पेन्शन आणि सुरक्षिततेच्या बाबतीत, यात एयरमॅटिक एअर सस्पेन्शन (स्टँडर्ड), ई-ॲक्टिव्ह बॉडी कंट्रोल (पर्यायी, विशेष मेबॅक मोडसह), लेव्हल-२ ADAS, ३६०-डिग्री कॅमेरा आणि गार्ड ३६० सुरक्षा पॅकेज यांचा समावेश आहे. भारतीय बाजारात Maybach GLS ची स्पर्धा Range Rover आणि Bentley Bentayga च्या हाय-एंड व्हेरिएंटशी आहे.