Car Market: पेट्रोल-डिझेलच्या वाढत्या दरांमुळे नवीन कार घेणारे अनेकजण आता इलेक्ट्रिक (EV) किंवा सीएनजी (CNG) गाड्यांचा विचार करत आहेत. पण लाँग टर्ममध्ये कोणती गाडी जास्त फायदेशीर ठरेल? आणि कोणाचा मेन्टेनन्स खर्च कमी आहे? चला जाणून घेऊया.
नवीन सीएनजी गाडीच्या तुलनेत इलेक्ट्रिक गाडीची किंमत 2 ते 3 लाख रुपयांनी जास्त असते. पण समजा तुम्ही वर्षाला 15,000 किमी गाडी चालवत असाल, तर 15 वर्षांत तुम्ही 2,25,000 किमी प्रवास कराल. ईव्ही घरात चार्ज केल्यास प्रति किलोमीटर फक्त 1.5 रुपये खर्च येतो, म्हणजे 15 वर्षांत फक्त 3.37 लाख रुपये. तर सीएनजीसाठी प्रति किलोमीटर 4 रुपये लागल्यास 15 वर्षांत तब्बल 9 लाख रुपये खर्च होतात. म्हणजेच, ईव्हीमुळे इंधनावर तुमचे थेट 5.5 लाख रुपये वाचू शकतात.
25
इलेक्ट्रिक गाडीचा फायदा
सीएनजी गाडीत इंजिन, गिअरबॉक्स, क्लच असे अनेक भाग असतात. त्यामुळे इंजिन ऑइल, फिल्टर बदलणे आणि सीएनजी किटची तपासणी यावर नियमित खर्च होतो. याउलट, इलेक्ट्रिक गाडीत पारंपरिक इंजिन नसल्याने बॅटरी आणि मोटर हेच मुख्य भाग असतात. त्यामुळे इंजिन ऑइल बदलायची गरज नसते आणि देखभाल खर्चही खूप कमी असतो.
35
बॅटरीचा खर्च
ईव्ही गाडीचे अनेक फायदे असले तरी, बॅटरीचा खर्च हे एक मोठं आव्हान आहे. अनेक कंपन्या बॅटरीवर 8 वर्षे किंवा 1.6 लाख किलोमीटरची वॉरंटी देतात. पण तुम्ही गाडी 15 वर्षे वापरणार असाल, तर एकदा तरी बॅटरी बदलावी लागू शकते. सध्या बॅटरी बदलण्याचा खर्च सुमारे 2 ते 4 लाख रुपये आहे. त्यामुळे गाडी घेताना या खर्चाचाही विचार करायला हवा.
काही वर्षांनी गाडी विकायची असेल, तर री-सेल व्हॅल्यू महत्त्वाची ठरते. सध्या जुन्या सीएनजी गाड्यांना बाजारात चांगली मागणी आहे आणि चांगली किंमतही मिळते. पण जुन्या इलेक्ट्रिक गाडीची किंमत तिच्या बॅटरीच्या स्थितीवर अवलंबून असते. बॅटरी चांगली असेल तरच चांगली किंमत मिळते, अन्यथा री-सेल व्हॅल्यू कमी होऊ शकते.
55
गरजा, बजेट आणि वापर यावरच अंतिम निर्णय
तुमचा रोजचा प्रवास जास्त असेल आणि तुम्हाला इंधन व देखभाल खर्च वाचवायचा असेल, तर इलेक्ट्रिक गाडी एक चांगला पर्याय आहे. पण सुरुवातीचा खर्च आणि भविष्यातील बॅटरीचा खर्च लक्षात ठेवावा लागेल. दुसरीकडे, कमी बजेटमध्ये गाडी घ्यायची असेल आणि री-सेल व्हॅल्यू महत्त्वाची असेल, तर तुम्ही सीएनजी गाडी निवडू शकता. त्यामुळे तुमच्या गरजा, बजेट आणि वापर यावरच अंतिम निर्णय अवलंबून आहे.
