Aadhaar Bank Fraud : फक्त आधार नंबर माहिती असेल तर बँक खातं रिकामं होऊ शकतं का? UIDAI ने दिलं उत्तर

आपला आधार नंबर दुसऱ्या कोणाला समजला, तर बँक खात्यातून पैसे चोरीला जातील अशी भीती अनेकांना वाटते. पण UIDAI ने स्पष्ट केलंय की ते ग्राहकांची कोणतीही आर्थिक माहिती किंवा बँक बॅलन्सचा रेकॉर्ड ठेवत नाहीत.

मुंबई : तुमचा आधार नंबर दुसऱ्या कोणाच्या हाती लागला, तर बँक खात्यातील पैसे गायब होऊ शकतात, अशी भीती तुम्हालाही वाटते का? जर हो, तर ही बातमी तुमच्यासाठी खूप महत्त्वाची आहे. आजकाल बँक खातं उघडण्यापासून ते KYC पूर्ण करण्यापर्यंत प्रत्येक कामासाठी आधार कार्ड लागतं. अशात एक प्रश्न साहजिकच पडतो की, आधार कार्ड देणारी संस्था UIDAI तुमचा बँक बॅलन्स आणि आर्थिक माहिती पाहू शकते का?

UIDAI ने लोकांचा हा गैरसमज दूर केला आहे. त्यांनी सांगितलंय की, आधारचा वापर फक्त तुमची ओळख पटवण्यासाठी होतो. त्यामुळे, केवळ तुमचा आधार नंबर वापरून कोणीही तुमच्या बँक खात्यातून पैसे काढू शकत नाही.

UIDAI कडे तुमच्या बँक बॅलन्सची माहिती असते का?

UIDAI च्या म्हणण्यानुसार, जेव्हा तुम्ही नवीन आधार कार्ड काढता किंवा अपडेट करता, तेव्हा दिलेली मोजकीच माहिती त्यांच्याकडे सेव्ह असते. यामध्ये तुमचं नाव, जन्मतारीख, लिंग, फोटो, बोटांचे ठसे आणि डोळ्यांचे स्कॅन (बायोमेट्रिक डेटा) यांचा समावेश असतो. मोबाईल नंबर आणि ईमेल आयडी देणं ऐच्छिक असतं. त्यामुळे, UIDAI कडे तुमचा बँक बॅलन्स, शेअर्स, म्युच्युअल फंड, मालमत्ता, विमा किंवा आरोग्याशी संबंधित कोणतीही माहिती नसते.

बँकेशी आधार लिंक केल्यावर नेमकं काय होतं?

जेव्हा तुम्ही एखाद्या बँकेत किंवा संस्थेत आधारद्वारे तुमची ओळख पडताळता, तेव्हा ती संस्था व्हेरिफिकेशनसाठी UIDAI ला एक रिक्वेस्ट पाठवते. तुमची ओळख खरी आहे की नाही, हे निश्चित करण्यासाठी UIDAI फक्त या रिक्वेस्टला 'हो' किंवा 'नाही' असं उत्तर देतं.

जर एखाद्या संस्थेने ई-केवायसी (e-KYC) केली आणि ती यशस्वी झाली, तर नियमानुसार तुमचं नाव, पत्ता आणि फोटो यासारखी माहिती शेअर केली जाऊ शकते. पण, या प्रक्रियेतून UIDAI ला तुमचा बँक बॅलन्स, डिमॅट अकाउंट, गुंतवणूक किंवा विम्याबद्दल कोणतीही माहिती मिळत नाही.

फक्त आधार नंबर वापरून बँक खातं रिकामं करणं शक्य आहे का?

UIDAI ने स्पष्ट केलंय की, फक्त तुमचा आधार नंबर माहिती असल्याच्या आधारावर कोणीही तुमच्या बँक खात्यात प्रवेश करू शकत नाही किंवा तिथून थेट पैसे काढू शकत नाही. कारण, बँकिंग व्यवहारांसाठी बँकेच्या नियमांनुसार ओटीपी (OTP), पिन किंवा पासवर्ड यांसारख्या इतर सुरक्षा पायऱ्या पार करणं बंधनकारक असतं.