iPhone 18 Pro : आयफोन 18 प्रोचं उत्पादन ॲपलने 20 टक्क्यांनी घटवलं, भाववाढ भोवली?

वाढत्या किमतींमुळे ॲपलच्या नव्या आयफोन १८ प्रो आणि प्रो मॅक्स मॉडेल्सची मागणी बाजारात घटली आहे. यामुळे कंपनीने या मॉडेल्सचं उत्पादन १५ ते २० टक्क्यांनी कमी करण्याचा निर्णय घेतलाय. मेमरी चिप्सची महागाई आणि बेस मॉडेल्स लांबणीवर पडल्याने ॲपलसमोरील आव्हानं वाढली आहेत.

नवी दिल्ली : ॲपलच्या नव्या आयफोन मॉडेल्सना बाजारात अपेक्षेप्रमाणे प्रतिसाद मिळत नसल्याचं चित्र आहे. वाढलेल्या किमतींमुळे ग्राहक पाठ फिरवत आहेत. त्यामुळे आयफोन १८ प्रो (iPhone 18 Pro) आणि आयफोन १८ प्रो मॅक्स (iPhone 18 Pro Max) या मॉडेल्सचं उत्पादन कमी करण्याच्या सूचना कंपनीने पुरवठादारांना दिल्या आहेत. 'निक्केई आशिया'च्या (Nikkei Asia) रिपोर्टनुसार, ऑक्टोबरमध्ये या मॉडेल्ससाठी दिलेल्या सुट्या भागांच्या ऑर्डरमध्ये १५ ते २० टक्क्यांची कपात करण्यात आली आहे, असा दावा 'इंडिया टुडे टेक'ने केलाय.

भाववाढीचा ग्राहकांना फटका

यावर्षी नव्या आयफोन मॉडेल्सच्या किमतीत १०० डॉलर्सची वाढ करण्यात आली, हेच मागणी घटण्यामागचं मुख्य कारण असल्याचं रिपोर्टमध्ये म्हटलंय. यामुळे आयफोन १८ प्रो ची सुरुवातीची किंमत १,१९९ डॉलर्स, तर आयफोन १८ प्रो मॅक्सची किंमत १,२९९ डॉलर्सवर पोहोचली आहे. भारतीय चलनात विचार केल्यास, ही भाववाढ जवळपास ३०,००० रुपयांच्या घरात असल्याचं रिपोर्ट सांगतो.

एका स्मार्टफोनसाठी एवढी मोठी रक्कम मोजणं जास्त वाटत असल्याचं काही ग्राहकांचं म्हणणं आहे, असं निक्केई आशियाने स्पष्ट केलंय. बाजारातील मागणी घटल्याचा आणखी एक पुरावा म्हणजे, ३० पेक्षा जास्त देशांमध्ये आयफोनसाठीचा 'वेटिंग पिरियड' (प्रतीक्षा वेळ) कमी होत असल्याचं 'युबीएस' (UBS) या आर्थिक सेवा देणाऱ्या संस्थेने निदर्शनास आणून दिलंय.

मेमरी चिप्सची महागाई आणि नवं संकट

जागतिक पातळीवर मेमरी चिप्सच्या किमती वाढत असल्याने स्मार्टफोन निर्मिती क्षेत्राला मोठा फटका बसतोय. एआय (AI) आधारित डेटा सेंटर्ससाठी बड्या टेक कंपन्या मोठ्या प्रमाणावर चिप्स खरेदी करत आहेत. त्यामुळे इतर उपकरणांसाठी चिप्सचा तुटवडा निर्माण होऊन निर्मिती खर्च वाढतोय. याच कारणामुळे ॲपलने जूनमध्ये आयपॅड आणि मॅकबुक मॉडेल्सच्या किमतीही वाढवल्या होत्या. सुट्या भागांची ही महागाई अशीच राहिल्यास येत्या काळात उपकरणांच्या किमती आणखी वाढू शकतात.

आयफोन १८ चे बेस मॉडेल्स लांबणीवर

ॲपलने यावेळी फक्त तीन प्रीमियम आयफोन मॉडेल्स बाजारात आणले आहेत. रेग्युलर आयफोन १८ आणि नवा आयफोन एअर (iPhone Air) हे मॉडेल्स २०२७ पर्यंत लांबणीवर टाकण्यात आले आहेत. सणासुदीच्या काळात सहसा कमी किमतीचे मॉडेल्स जास्त ग्राहकांना आकर्षित करतात आणि विक्री वाढवतात. पण हे मॉडेल्स उशिरा येणार असल्याने ॲपलच्या एकूण विक्रीवर याचा फटका बसू शकतो.

ॲपलसमोर खरंच मोठं संकट आहे का?

सध्याच्या परिस्थितीला ॲपलसाठी खूप मोठं संकट म्हणता येणार नाही, असा अंदाज रिपोर्टमध्ये वर्तवण्यात आलाय. गेल्या वर्षाच्या तुलनेत प्रत्येक मॉडेलची किंमत किमान १० टक्क्यांनी वाढली आहे. त्यामुळे फोनची विक्री कमी झाली तरी कंपनीचा महसूल स्थिर राहू शकतो. शिवाय, बाजारातील मागणीनुसार उत्पादनात वेगाने बदल करण्याची क्षमता ॲपलकडे आहे.

दुसरीकडे, जागतिक स्मार्टफोन बाजाराची स्थिती अधिक आव्हानात्मक बनत चालली आहे. 'आयडीसी'च्या (IDC) अंदाजानुसार, २०२६ मध्ये जागतिक स्मार्टफोन शिपमेंटमध्ये १६.७ टक्क्यांची विक्रमी घसरण पाहायला मिळेल. याच काळात फोनची सरासरी विक्री किंमत २७.६ टक्क्यांनी वाढण्याची शक्यता आहे. शाओमी (Xiaomi), ओप्पो (Oppo) आणि व्हिवो (Vivo) यांसारख्या बजेट फोन्सवर भर देणाऱ्या ब्रँड्सना याचा सर्वाधिक फटका बसेल. मात्र, यामुळे ॲपल आणि सॅमसंगचा (Samsung) बाजारातील वाटा वाढू शकतो, असा 'काउंटरपॉईंट रिसर्च'चा (Counterpoint Research) अंदाज आहे.

फोल्डेबल आयफोनसमोरही आव्हान?

ॲपलची पुढची मोठी परीक्षा लवकरच होणार आहे. रिपोर्टनुसार, फोल्ड होणारा 'आयफोन ड्युओ' (iPhone Duo) २३ ऑक्टोबरला विक्रीसाठी उपलब्ध होईल. याची किंमत १,९९९ डॉलर्स इतकी ठेवण्यात आली आहे. एवढी मोठी किंमत असलेल्या या फोल्डेबल फोनलाही मागणीच्या अशाच संकटाचा सामना करावा लागेल, अशी भीती पुरवठादारांना वाटत असल्याचं रिपोर्टमध्ये नमूद केलंय. वाढती महागाई आणि ग्राहकांची खरेदी क्षमता स्मार्टफोन बाजारावर किती परिणाम करते, हे या नव्या मॉडेलच्या विक्रीवरून स्पष्ट होईल.