iPhone 18 Pro : आयफोन 18 प्रो ची डिमांड घटली? ॲपलने कमी केल्या ऑर्डर्स, शेअर्सही घसरले

ॲपलच्या शेअर्सनी नुकताच रेकॉर्ड ब्रेक उच्चांक गाठला होता. पण आता कंपनीने आयफोन १८ प्रो चे उत्पादन कमी करण्याचा निर्णय घेतल्याची चर्चा आहे.

मुंबई : शुक्रवारी प्री-मार्केट ट्रेडिंगमध्ये ॲपलचे (Apple Inc.) शेअर्स १.६ टक्क्यांनी घसरले. कंपनीने नुकत्याच लाँच केलेल्या आयफोन १८ प्रो (iPhone 18 Pro) आणि आयफोन १८ प्रो मॅक्सच्या (iPhone 18 Pro Max) सुट्या भागांचे उत्पादन कमी करण्यास पुरवठादारांना सांगितल्याची बातमी आली. यामुळे या नव्या फ्लॅगशिप स्मार्टफोन्सच्या मागणीबाबत बाजारात चिंता वाढली आहे.

ॲपलने ऑक्टोबर महिन्यासाठी आपल्या प्रो मॉडेल्सच्या सुट्या भागांच्या (components) ऑर्डर्स १५ ते २० टक्क्यांनी कमी केल्याची माहिती आहे. मेमरी चिपच्या तुटवड्यामुळे आयफोनच्या किमती वाढल्या आहेत. याचा थेट परिणाम ग्राहकांच्या मागणीवर होत असल्याचा दावा 'निक्केई'ने (Nikkei) केला आहे. शुक्रवारी ॲपलच्या (AAPL) शेअर्सबाबत गुंतवणूकदारांमध्ये 'बेअरिश' (निराशाजनक) वातावरण पाहायला मिळालं.

'निक्केई आशिया'च्या (Nikkei Asia) रिपोर्टनुसार, सप्टेंबरच्या सुरुवातीपासूनच ॲपलने शिपमेंटबाबत सावध भूमिका घेतली आहे. कंपनीने ऑक्टोबरसाठीच्या ऑर्डर्स मूळ लक्ष्यापेक्षा १५ ते २० टक्क्यांनी कमी केल्या आहेत.

AAPL Stock: गुंतवणूकदारांना मोठी घसरण होण्याची भीती

या रिपोर्टनंतर स्टॉकट्विट्सच्या (Stocktwits) ट्रेंडिंग लिस्टमध्ये ॲपलचा शेअर दुसऱ्या नंबरवर पोहोचला. शेअरने नुकताच उच्चांक गाठला होता, त्यामुळे आता यात मोठी घसरण होईल अशी भीती ट्रेडर्सना वाटत आहे.

एका ट्रेडरने लिहिलंय, "ॲपलची स्थिती खराब दिसतेय. बरं झालं मी आधीच बाहेर पडलो. आता माझी कोणतीही पोझिशन नाही." तर दुसऱ्या एकाने म्हटलंय, "ॲपलची ग्रोथ आता थांबल्यासारखी वाटतेय. त्यांच्याकडे नवीन इनोव्हेशन दिसत नाहीये. शेअरची किंमत खूप जास्त आहे, पण रिस्कही मोठी आहे. लोक ज्या फायद्याबद्दल बोलतायत, तो मला तरी दिसत नाहीये."

शुक्रवारी सलग दुसऱ्या दिवशी ॲपलच्या शेअर्सबाबत रिटेल गुंतवणूकदारांचा कल 'बेअरिश' राहिला.

आयफोन १८ सिरीजला थंड प्रतिसाद

एका वरिष्ठ अधिकाऱ्याने 'निक्केई'ला सांगितलं की, ऑक्टोबरमध्ये दोन्ही प्रीमियम मॉडेल्सच्या ऑर्डर्स १५ ते २० टक्क्यांनी घटल्या आहेत. येत्या काही महिन्यांत मागणी कशी असेल, हे आत्ताच सांगता येणार नाही.

या कपातीवरून एक गोष्ट स्पष्ट होतेय की, वाढलेल्या किमतींमुळे ॲपलचे नवीन आयफोन्स ग्राहकांना आकर्षित करण्यात कमी पडत आहेत. यामुळे प्रीमियम हार्डवेअरच्या जोरावर ग्रोथ टिकवून ठेवण्याच्या कंपनीच्या प्रयत्नांमध्ये अडथळे येत आहेत.

किंमत वाढल्याचा मागणीवर परिणाम

ॲपलने ९ सप्टेंबरला आयफोन १८ प्रो आणि प्रो मॅक्स लाँच केले. यांची सुरुवातीची किंमत अनुक्रमे १,१९९ डॉलर्स आणि १,२९९ डॉलर्स आहे. जुन्या मॉडेल्सच्या तुलनेत हे फोन १०० डॉलर्सने महाग आहेत. १८ सप्टेंबरपासून या दोन्ही मॉडेल्सची विक्री सुरू झाली.

सध्या बाजारात मेमरी चिपचा मोठा तुटवडा आहे. त्यामुळे सुट्या भागांचा खर्च वाढला असून गॅजेट बनवणाऱ्या कंपन्यांना नाईलाजाने किमती वाढवाव्या लागत आहेत. आयफोनच्या वाढलेल्या किमतींमागे हेच मुख्य कारण आहे.

विशेष म्हणजे, ॲपलने आपला पहिला फोल्डेबल फोन बाजारात आणण्यासाठी यंदा आयफोनच्या लाँचिंगमध्ये थोडे बदल केले आहेत. कंपनीने तीन प्रीमियम मॉडेल्सला प्राधान्य दिलंय. तर स्टँडर्ड आयफोन १८ आणि नेक्स्ट जनरेशन आयफोन एअरचं लाँचिंग स्प्रिंग सीझनपर्यंत (वसंत ऋतू) पुढे ढकललं आहे.

ॲपलच्या शेअर्सचा रेकॉर्ड उच्चांक

ॲपलच्या शेअर्सनी नुकताच सर्वकालीन उच्चांक गाठला होता, त्यानंतर ही घसरण पाहायला मिळाली. गुरुवारी शेअर ३४०.४२ डॉलर्सवर बंद झाला. २५ सप्टेंबरला शेअरने ३४१.०७ डॉलर्सचा रेकॉर्ड क्लोजिंग दिला होता, ज्याच्या अगदी जवळ हा आकडा आहे. या वर्षात आतापर्यंत ॲपलचा शेअर २५.६ टक्क्यांनी वधारला आहे.

दुसरीकडे, रॉयटर्सने (Reuters) गुरुवारी पाहिलेल्या एका मेमोनुसार, ॲपलने स्टीव्ह स्मिथ (Steve Smith) यांची विलीनीकरण आणि अधिग्रहण (M&A) विभागाचे प्रमुख म्हणून नियुक्ती केली आहे. तर एड्रियन पेरिका (Adrian Perica) यांना सर्व्हिसेस डिव्हिजनमध्ये हलवण्यात आलं आहे.

पेरिका हे ॲपलच्या M&A आणि कॉर्पोरेट डेव्हलपमेंट विभागात १७ वर्षांहून अधिक काळ कार्यरत आहेत. २०२३ मध्ये त्यांनी आयक्लाउड (iCloud), फिटनेस प्लस (Fitness+) आणि न्यूज (News) यांसारख्या इतर व्यवसायांचीही जबाबदारी स्वीकारली होती.