Airtel Vs Jio : एअरटेल की जिओ? युट्यूब प्रीमियमसाठी कोणता प्लॅन बेस्ट?
सार
भारती एअरटेल आणि रिलायन्स जिओ या दोन्ही टेलिकॉम कंपन्या २०० रुपयांच्या प्रीपेड डेटा वाउचरसोबत युट्यूब प्रीमियम आणि इतर OTT फायदे देत आहेत. दोन्ही प्लॅन्समध्ये ३०GB डेटा आणि २८ दिवसांची व्हॅलिडिटी मिळते. या बातमीत आपण दोन्ही प्लॅन्सची तुलना पाहणार आहोत.
मुंबई : भारती एअरटेल आणि रिलायन्स जिओ या दोन्ही कंपन्या त्यांच्या प्रीपेड प्लॅन्ससोबत युट्यूब प्रीमियमचं सबस्क्रिप्शन देत आहेत. युट्यूब प्रीमियम म्हणजे काय, तर यात युजर्सना कोणतीही जाहिरात न पाहता (अॅड-फ्री) व्हिडिओ पाहता येतात. याशिवाय, व्हिडिओ ऑफलाईन डाऊनलोड करणं आणि हाय-क्वालिटीमध्ये व्हिडिओ स्ट्रीम करणं, असे भन्नाट फायदेही यात मिळतात.
एअरटेलने नुकताच आपला युट्यूब प्रीमियम प्लॅन लाँच केलाय. दुसरीकडे, अनेक जण आधीपासूनच जिओचा प्लॅन वापरत आहेत. त्यामुळे या दोन्हीपैकी नेमका कोणता प्लॅन बेस्ट आहे, हे आपण इथे पाहणार आहोत.
भारती एअरटेलच्या प्लॅनमध्ये काय मिळतं?
भारती एअरटेलकडे युट्यूब प्रीमियम देणारा २०० रुपयांचा एक प्रीपेड प्लॅन आहे. हा एक डेटा वाउचर आहे, त्यामुळे यात सर्व्हिस व्हॅलिडिटी मिळत नाही. या प्लॅनमध्ये ३०GB FUP (फेअर युसेज पॉलिसी) डेटा मिळतो. या २०० रुपयांच्या प्लॅनमध्ये एअरटेल युजर्सना प्राईम व्हिडिओ, जिओहॉटस्टार, ZEE5 प्रीमियम, सोनी लिव्ह आणि इतर १८ पेक्षा जास्त OTT प्लॅटफॉर्म्सचा अॅक्सेस देतं. सोबतच युट्यूब प्रीमियमचा फायदाही यात जोडला गेलाय. हा काही नवीन प्लॅन नाहीये.
जिओच्या प्लॅनमध्ये काय मिळतं?
रिलायन्स जिओसुद्धा २०० रुपयांचा डेटा वाउचर ऑफर करतं, ज्यामध्ये युट्यूब प्रीमियम आणि इतर OTT फायदे मिळतात. जिओ टीव्ही मोबाईल अॅपच्या माध्यमातून युजर्सना युट्यूब प्रीमियम, प्राईम व्हिडिओ मोबाईल, जिओहॉटस्टार, सोनी लिव्ह, Zee5, SunNXT, लायन्सगेट प्ले, डिस्कव्हरी+, कांचा लंका, ETVWin, चौपाल, फॅनकोड, तरंग प्लस, टाईम्स प्ले आणि होईचोई यांसारख्या प्लॅटफॉर्म्सचा अॅक्सेस मिळतो. याशिवाय, सिनेपोलिसमध्ये १५० रुपयांचा डिस्काउंटही मिळतो. जिओच्या या प्लॅनमध्येही ३०GB डेटा मिळतो. विशेष म्हणजे, या दोन्ही प्लॅन्सची व्हॅलिडिटी २८ दिवसांची आहे.
या दोन्ही प्लॅन्सची तुलना केली, तर जिओचा प्लॅन ग्राहकांना जास्त फायदे देतोय. खरं तर, ज्या युजर्सकडे आधीपासून १GB किंवा १.५GB डेली डेटाचा प्लॅन आहे, त्यांना या वाउचरसोबत अनलिमिटेड 5G चा फायदाही मिळतो.