Electric Car : ₹5 लाखांपेक्षा कमी बजेटमध्ये, नव्या EV, हे आहेत 4 बेस्ट ऑप्शन्स

पेट्रोलच्या वाढत्या खर्चाला कंटाळलात? आता 5 लाख रुपयांपेक्षा कमी सुरुवातीच्या किमतीत तुम्ही इलेक्ट्रिक कार खरेदी करू शकता. छोट्या कुटुंबासाठी बाजारात 4 जबरदस्त पर्याय उपलब्ध आहेत.

Best EV Car Under 5 Lakh: रोज रोज पेट्रोल-डिझेलचे वाढते भाव तुमचं बजेट कोलमडवत आहेत का? जर हो, तर आता तुम्हाला टेन्शन घ्यायची अजिबात गरज नाही. तो जमाना गेला जेव्हा इलेक्ट्रिक कार (EV) घेण्यासाठी 10-12 लाख रुपयांचं मोठं बजेट लागायचं. आता बाजारात अशा छोट्या आणि खिशाला परवडणाऱ्या इलेक्ट्रिक कार आल्या आहेत, ज्या एका सामान्य मध्यमवर्गीय कुटुंबाच्या बजेटमध्ये सहज बसतात. सगळ्यात भारी गोष्ट म्हणजे, तुम्ही फक्त ₹4.69 लाखांच्या सुरुवातीच्या किमतीत एक नवी कोरी इलेक्ट्रिक कार घरी आणू शकता. या गाड्या चालवायला सोप्या तर आहेतच, पण यांच्यामुळे प्रदूषणही होत नाही आणि प्रवासाचा खर्च तर जवळपास नाहीच्या बरोबर असतो. चला, जाणून घेऊया छोट्या कुटुंबासाठी 4 सर्वात स्वस्त पर्याय...

पण या गाड्या इतक्या स्वस्त कशा?

एवढ्या मोठ्या गाड्या इतक्या कमी किमतीत कशा मिळत आहेत, असा प्रश्न तुम्हाला पडला असेल, तर त्यामागे BaaS (Battery-as-a-Service) हे तंत्रज्ञान आहे. जेव्हा तुम्ही कार खरेदी करायला जाता, तेव्हा तुम्हाला फक्त गाडीच्या बॉडीचे (चेसिस) पैसे द्यावे लागतात. म्हणजेच, तुम्ही फक्त बेस प्राईजमध्ये कार खरेदी करता. यामुळे कारची सुरुवातीची किंमत जवळपास 35% ते 40% नी कमी होते. गाडीची बॅटरी तुम्हाला विकत घ्यावी लागत नाही. त्यासाठी तुम्हाला एक ठरलेलं 'भाडं' (रेंटल किंवा EMI) द्यावं लागतं, जे तुम्ही गाडी किती किलोमीटर चालवता यावर अवलंबून असतं.

सर्वात स्वस्त EV Cars

Tata Tiago EV: मध्यमवर्गीयांची पहिली पसंती

टाटाची ही कार भारतीय कुटुंबांमध्ये प्रचंड लोकप्रिय आहे. जर तुम्ही रोजच्या ऑफिस प्रवासासाठी किंवा मुलांना शाळेत सोडण्यासाठी एक परफेक्ट कार शोधत असाल, तर हा सर्वोत्तम पर्याय आहे. BaaS सोबत या गाडीची किंमत फक्त ₹4.69 लाख रुपये आहे, तर या ऑफरशिवाय तिची मूळ किंमत ₹6.99 लाख आहे. याच्या बॅटरीचं भाडं प्रति किलोमीटर ₹2.6 आहे. ही कार दोन वेगवेगळ्या बॅटरी पर्यायांमध्ये येते, जी एकदा पूर्ण चार्ज केल्यावर 226 किमी ते 285 किमीपर्यंतचा प्रवास घडवते.

MG Comet EV: शहरातल्या ट्रॅफिकसाठी एकदम बेस्ट

ही भारतातील सर्वात छोटी आणि स्टायलिश इलेक्ट्रिक कार आहे. तुमच्या शहरात खूप जास्त ट्रॅफिक असेल किंवा पार्किंगची समस्या असेल, तर ही कार तुमच्यासाठीच बनली आहे. BaaS सोबत हिची किंमत फक्त ₹4.99 लाख आहे. तशी तिची मूळ किंमत ₹7.50 लाख आहे. याच्या बॅटरीचं भाडं प्रति किलोमीटर ₹3.2 आहे. यामध्ये 17.4 kWh क्षमतेचा बॅटरी पॅक मिळतो, जो एकदा चार्ज केल्यावर आरामात सुमारे 230 किमीपर्यंत चालतो.

Tata Punch EV: SUV प्रेमींसाठी दमदार पर्याय

जर तुम्हाला थोडी उंच आणि दमदार लूक असलेली गाडी आवडत असेल, तर टाटा पंचचा इलेक्ट्रिक अवतार तुम्हाला नक्कीच आवडेल. ही कार लूक आणि परफॉर्मन्स दोन्हीमध्ये सुपरहिट आहे. तिची मूळ किंमत ₹9.69 लाख आहे, तर BaaS सोबत तुम्ही ती फक्त ₹6.49 लाखांत खरेदी करू शकता. या कारच्या बॅटरीचं भाडं प्रति किलोमीटर ₹2.6 आहे. यातही तुम्हाला दोन बॅटरी पॅकचे (30 kWh आणि 40 kWh) पर्याय मिळतात, जे सिंगल चार्जमध्ये 275 किमी ते 350 किमीपर्यंतची जबरदस्त रेंज देतात.

Citroen eC3: आराम आणि स्पेसचं परफेक्ट कॉम्बिनेशन

फ्रान्सची प्रसिद्ध कार कंपनी सिट्रोएनने आपली ही कार नव्या आणि फ्रेश लूकमध्ये सादर केली आहे. ज्या लोकांना कारमध्ये जास्त जागा आणि आरामदायी प्रवास आवडतो, त्यांच्यासाठी ही एक उत्तम निवड आहे. BaaS सोबत हिची किंमत फक्त ₹6.89 लाख पडते. याच्या बॅटरीचं भाडं प्रति किलोमीटर ₹2.26 आहे. यामध्ये 29.2 kWh क्षमतेचा मोठा बॅटरी पॅक दिला आहे. कंपनीचा दावा आहे की ही कार एकदा पूर्ण चार्ज केल्यावर तब्बल 325 किमीपर्यंत धावू शकते.