Laptop Health Tips: तासनतास लॅपटॉपवर काम करताय? मग पाठ आणि मानेची वाट लागणारच! हे ७ उपाय करा आणि टेन्शन फ्री राहा
सार
लॅपटॉपवर काम करणं सोडून देण्याची गरज नाही. पण जर मान किंवा पाठदुखी सतत होत असेल, वाढत असेल किंवा रोजच्या कामात अडथळा आणत असेल, तर या बातमीत सांगितलेले सोपे उपाय नक्की करून पाहा. योग्य पद्धत अवलंबा आणि आरामात काम करा!
तासनतास लॅपटॉपसमोर बसून काम करताय? मान आणि पाठदुखी कमी करण्यासाठी हे ७ उपाय नक्की फॉलो करा!
आजच्या डिजिटल युगात नोकरी, शिक्षण आणि इतर अनेक कामांसाठी कॉम्प्युटर आणि लॅपटॉपची गरज अनिवार्य झाली आहे. पण दिवसभर स्क्रीनसमोर बसून काम केल्याने अनेकांना मान, खांदे आणि पाठदुखीचा त्रास सुरू होतो. काम करताना शरीराची चुकीची पोश्चर (Posture), स्क्रीनकडे पाहण्यासाठी सतत मान वाकवणं आणि एकाच जागी खूप वेळ बसून राहणं ही यामागची मुख्य कारणं आहेत. काही सोप्या सवयी लावून घेतल्या तर या समस्येचा धोका नक्कीच कमी करता येऊ शकतो.
लॅपटॉप वापरल्याने मान आणि पाठ का दुखते?
लॅपटॉपची स्क्रीन जर खाली असेल, तर ती पाहण्यासाठी मान पुढे वाकवावी लागते. यामुळे मान आणि खांद्यांच्या स्नायूंवर खूप ताण येतो. खूप वेळ एकाच जागी बसून राहणं, शारीरिक हालचालींचा अभाव आणि पाठीला योग्य आधार नसलेल्या खुर्चीवर बसून काम केल्याने पाठीचा त्रास सुरू होतो.
वेदना कमी करण्यासाठी ७ सोपे उपाय
१. स्क्रीन डोळ्यांच्या रेषेत ठेवा: लॅपटॉप स्टँडचा वापर करा आणि स्क्रीन डोळ्यांच्या लेव्हलला ठेवा. यामुळे मान वारंवार खाली वाकवण्याची गरज पडणार नाही.
२. वेगळा कीबोर्ड आणि माऊस वापरा: लॅपटॉप उंचावर ठेवल्यावर वेगळा कीबोर्ड आणि माऊस वापरल्याने हात आणि खांदे रिलॅक्स राहतात.
३. पाठीला योग्य आधार द्या: पाठीच्या खालच्या भागाला सपोर्ट देणारी खुर्ची निवडा. बसताना शरीर एकदम कम्फर्टेबल स्थितीत ठेवा.
४. पाय जमिनीवर टेकवून ठेवा: दोन्ही पाय जमिनीवर सपाट टेकलेले असतील याची काळजी घ्या. गरज वाटल्यास पायांना आधार देण्यासाठी फूटरेस्टचा वापर करा.
५. मध्येच ब्रेक घ्या: दर ३० ते ४५ मिनिटांनी जागेवरून उठा आणि थोडं चाला. एकाच पोझिशनमध्ये खूप वेळ बसू नका.
६. सोपे व्यायाम करा: ब्रेकच्या वेळी मान आणि खांदे हळूहळू फिरवा. पण दुखेल असा जबरदस्तीने कोणताही व्यायाम करू नका.
७. कामाची जागा सेट करा: टेबल, खुर्ची, स्क्रीन आणि कीबोर्ड तुमच्या उंचीनुसार सेट करा. काम करताना मध्येच बसण्याची पोझिशन बदलत राहा.
डॉक्टरांचा सल्ला कधी घ्यावा?
जर मान किंवा पाठदुखी सतत होत असेल, वाढत असेल किंवा रोजच्या कामात अडथळा आणत असेल, तर डॉक्टरांचा सल्ला घेणं केव्हाही चांगलं. हातात मुंग्या येणं, बधीरपणा किंवा अशक्तपणा जाणवत असेल तर त्याकडे दुर्लक्ष करू नका. अचानक हात-पायांमध्ये ताकद नसताना जाणवलं किंवा चालताना त्रास होऊ लागला, तर लगेच वैद्यकीय मदत घ्या.
थोडक्यात सांगायचं तर, लॅपटॉप वापरणं बंद करण्याची अजिबात गरज नाही. बसण्याची योग्य पद्धत, कामाची योग्य जागा, नियमित ब्रेक आणि शारीरिक हालचालींचा दिनचर्येत समावेश केल्यास मान आणि पाठीचा त्रास नक्कीच कमी होऊ शकतो.